أسعدكم الله دنيا وأخرة
هذه القصيدة كان مقرر لها أن تلقى في الحفل السنوي للخريجين من ضباط عتيبة
من كلية الملك فهد الأمنية لعام 1435 هـ
لكن نحن نريد والله يفعل ما يريد
فقد الغي الحفل بسبب وفاة أحد المحتفى بهم للتخرج في حادث مروري
وهو الملازم فادي المقاطي
نسأل الله له الرحمة ولذويه الصبر والسلوان
انا لله وانا اليه راجهون
وقد أجلت نشرها لهذا السبب لأكثر من شهر
الليلة أطرحها بين أيديكم علها تروق لكم
وتصل لمن كان المفروض أن تلقى أمامهم
طابت أوقاتكم أين ما كنتم
قبل عامين جيت ولا حصل لي نصيب=ارتقي منبر الهيلا وارد السلام
جيت ماني غريب ورحت ماني غريب=يوم صاروا على المنبر سواة الحيام
وبعد عامين عدت وشوفكم لي نصيب=والمقدر يصيب ولو بعد كم عام
ياسلامي عليكم مثل وبلٍ(ن)صبيب=السما تدفعه والخير يدهف قوام
وقفتي بينكم تشريف ماهي بعيب=ياشباة السيوف وياسنان السهام
عضد جنبي ليا قابل حريب لحريب=تاج راسي ليا نادوا لشد الحزام
يا نجوم الجزيرة ما طمسها مغيب=ياحماة الوطن في كل خاصٍ(ن)وعام
نفتخر بالشباب جنود والا طبيب=الوطن من هله والمجد ماهو كلام
الوطن هو حبيب الكل وأغلى حبيب=غرب مع شرق وجنوبه ووسطه وشام
في ذرى محكمين الشرع مافيه ريب=أسرةٍ(ن)ما تهاب المعضلات الجسام
مكرمين القريب ومكرمين الغريب=قسمهم من قسوم المجد ذروة سنام
من عهد باني المصمك بوقتٍ(ن)عصيب=اجتمع شملنا من عقب طول إنقسام
خمسه ملوك والسادس لشعبه قريب=الحكيم المبجل والمليك الإمام
خادم البيت عبدالله مكانه مهيب=ما يحرم حلال ولا يحلل حرام
صقر يعرب عريبٍ(ن)حر وأصله عريب=الطرايد تموت من الذعر كان حام
عاش حرٍ(ن)ليا منه نهض مايخيب=مخلبه ما يرده غير صم العظام
في يمينه عضيده سيف ساطي عطيب=شيخ من صلب شيخٍ(ن) عالياً بالمقام
كلنا يا عتيبة من شبابٍ(ن)وشيب=صف واحد مع اللي محكمين النظام
نفتخر ونتفاخر بالوطن والطنيب=ضيفنا والخوي في ظلنا ما يضام
ما يروح لعتيبة بالمطالب طليب=الشرف والشهامة للعتيبي وسام
من بعدها ببارك للشباب النجيب=نخبة من عتيبة ما لحقهم ملام
الله إنه يبارك بالشباب العجيب=ذخرنا للوطن في حرب وإلا سلام
ياعتيبة وصاتي زيدوا الطيب طيب=وإن داعاكم مليك الدار كونوا حسام
حاسبوا للنفوس وراقبوا للحسيب=الأمانة عظيمة والتحية ختام
التميز
الإهداءات
الشرف والشهامة للعتيبي وسام !!!
رد: الشرف والشهامة للعتيبي وسام !!!
