أسعدكم الله أينما كمنتم
هذه القصيدة أسميتها ذات الوجهين
فمن يعرف سبب التسمية ؟
الأبيات
لا تقولي ليش شعرك مختلف ما هو بعادي=كيف شفتي لي خلافي ما عرفتي وش خلافك
اختلفتي واختلف فكري وغير في فؤادي=واختلاف الشعر يا المضنون سببه اختلافك
القصائد صارت بوجهين ولحونٍ جدادي=قاف يرقص في فرحك وقاف يبكي من عيافك
وضعنا ما هو كما ما كان يا غض النهادي=المشاغل نصب عينك والهوى عود خلافك
يوم كنتي لي قريب كان سهل لك إنقيادي=والعشيه لا بعيد ولا قريب يا حسافك
لونك الوردي تغير صايرٍ(ن)شبه الرمادي=والمشاعر باهته ما عاد تدفع لإنجرافك
كان عدتي مثل ما كنتي جميل الشعر عادي=والمشاعر من شتا الهجران يدفيها لحافك
وإن تماديتي بصدك ما لكِ(ي)غير التمادي=صده بصده ومن عفتيه بنت الناس عافك
لا تحسبيني على قول المثل هين قيادي=ماني اللي يتبعك لن بان بالدرب إنحرافك
والله إني ما الحق المقفي عزيزات الجيادي=دام وضعك مختلف للعين بينت إنكشافك
مقبل الأيام يكشف لك بياضه والسوادي=وقتها بيبان وضعك في صمودك وإرتجافك
حين ما تعرف قراري في رحيلي وإبتعادي=تدرك إني ما رحلت إلا بعد ما القلب طافك
بالنهاية ودي أمزح معك يا غاية مرادي=والله إني لو بيدي كان دبرت إختطافك
يا عديل الروح وأغلى من صحاب ومن بلادي=يا هني منهو بعينه ياغرام الروح شافك
والله إنك غالية وأغلى مخاليق وعبادي=القصائد ما تزين إلا ليا غنيت قافك
فيك سحري والك حبي وأعشقك رايح وغادي=ما يروق البال لين أذكر مفاتن في وصافك
سامحيني يا غناتي كان زعلك إجتهادي=الغرام اللي سطا في شاعرك وكاد لافك
سامحيني والك مني زود تقبيل الأيادي=المشاعر ما تغير لا يكون الشعر أخافك!!!
والله إنه ما يهون أزْعلك يا وردي وكادي=ما عرفت بطعم عمري لين فيه القلب أضافك
من عرفتك صرت للشعار زيزوم وقيادي=والقصيد يزين لا منه بمعناه استضافك
الهوى ماهو بعادي والشعر ما هو بعادي=بعد شفتي لإختلافي ما عرفت أنا خلافك
التميز
الإهداءات
ذات الوجهين !!!
رد: ذات الوجهين !!!
