أسد الله أوقاتكم بكل خير
الأبيات علها تنال رضاكم
قالوا علامك تسهر الليل وسواك=ينام ليله مهتني وأنت هايم
قلت:السهر للعين عادة ولو لاك=يا هاجسي ريحت كل القوايم
ما كان صار العود ريشة ومسواك=والصدر خلفه مثل هب السمايم
من واهجٍ(ن)بالقلب سبب لي إرباك=لا من ذكرت اللي له الفكر حايم
سريت انادي يا أريش العين ذكراك=منها لذيذ النوم ذب الخرايم
اسهر على أمل تجيني هداياك=احلم بها صاحي وماشي ونايم
لكنها قلّت حبيبي عطاياك=على السهر والحلم ببات صايم
ما دام حلمٍ(ن)راود القلب ما جاك=أكيد من نومك فمنته بقايم
يهناك نومك يالغضي لا عدمناك=نوم العوافي يا حسين الوسايم
خل السهر لعيون عاشق بيهواك=لو السهر يهدم شديد العزايم
الحال كله يا أريش العين يفـداك=لن كان مابه حال باقي ودايـم
لكن على قد الجهد بطلب رضاك=وأرمي على شأنك عقال وعمايم
بقضي لباق العمر حالم بلقياك=بسهر وبنشد عندك ذار النسايم
عل وعسى تقدم عليّه مطاياك=تحمل وهايب منك فيها غنايم
للي قضى عمره سهير يتمناك=يحلم يعودن الليال القـدايم
يسهر وكن الفرش مزروع بأشواك=يشكي على ليله جروح وسقايم
التميز
الإهداءات
نوم العوافي يا حسين الوسايم !!!
رد: نوم العوافي يا حسين الوسايم !!!
