طابت أوقاتكم بكل خير
الأبيات
....
اسمعيني ياغرامي اسمعي=ليلي بدونك هواجيسه عذاب
الحلوم تزورني في مضجعي=متعبتني بالمجي وبالذهاب
ما تخليني بليلي اهجعي=خلفها قلبي مثل طارد سـراب
مايروق الجو وانتي مو معي=المرار اطعمه في زاد وشراب
مير تودك لا تغيبي ارجعي=لن رجعتي كل جرحٍ(ن)في طاب
وكان ماجيتي ترى زاد وجعي=اتضايق من كلام ومن ثياب
غير طبك ماش طبٍ(ن)ينفعي=للخفوق اللي من الأشواق ذاب
كن حبك من عروقه يقطعي=كل ما حل المساء حل العقاب
ما يطيب النوم لي في مخدعي=لا لقيته خاليٍ(ن)ما عاد طاب
المكان اللي بدونك يفجعي=والسهر من دون نورك عض ناب
الهموم تحيط بي في مربعي=شيبت بي وأخذت أيام الشباب
تبعد أمالي وتدني مصرعي=ما تهنا لين تجلب للخراب
راح عمري ما تحقق مطمعي=ضعت ما بين الخطية والصواب
هب يا حظٍ(ن)علي موقعي=ما نويت بيوم تهديني ثواب
تدني اللي حبها خلف أضلعي=بالخفوق اللي من الفرقا مصاب
من سنين طوال فيها مولعي=مير حظه مشبهٍ(ن)ريش الغراب
يزرع أحلام الغرام ويقلعي=والسنين أسرع من بروق السحاب
ما طعم محصول زرعٍ(ن)يزرعي=لو هلك من دونها حمر الرقاب
الله اللي كل رزق موزعي=محد يأخذ غير ماهو بالكتاب
خاتمتها يا غرامي إفزعي=قبل روحي تندفن تحت التراب
إشفعي لي عند ذاتك إشفعي=يا جميلة قبل تجميل االخضاب
لا تغيبي ثم روحي تنزعي=غيبتك عني مثل طعن الحراب
اسمعيني ياغرامي اسمعي=ليلي بدونك هواجيسه عذاب
التميز
الإهداءات
لا تغيبي ارجعي !!!
رد: لا تغيبي ارجعي !!!
