غرد الشوق غرد !!!

هاض القصيد وغرد الشوق غرد=بالخافق اللي خلف عوجي تمرد
من نار شوقه يشتعل ما تبرد=يا ويل حالي منك يا قلب ويلاه
الليل كله ساهرٍ(ن)وأتوجد=على وليفٍ(ن)غاب عيا يعـود
همٍ(ن)تلحفته وهم متوسد=يا ويل حالي منك يا قلب ويلاه
أسهر وأساهر مرقبات النجومي=أتبع هواجيسي وأطارد حلومي
القلب خلف العوج بالصدر يومي=يا ويل حالي منك يا قلب ويلاه
أون وأكتم ونتي عن قريبي=ما أبي بشر تدري بمنهو حبيبي
اللي كواني بالهجر والمغيبي=يا ويل حالي منك يا قلب ويلاه
خايف من الشامت يشمت علينا=ويزيد كية فوق ما احنا انكوينا
يفرح بنا الشامت ليا من بكينا=يا ويل حالي منك يا قلب ويلاه
أنا وليلي والهواجس رفاقه=عدة سنين مجودين العلاقه
والشعر للشاعر هوية بطاقه=يا ويل حالي منك يا قلب ويلاه
أكتب قصيدي في حبيبي وأغني=لو كان مبعد بالمسافات عني
طيفه يجيني كل ليل متعني=يا ويل حالي منك يا قلب ويلاه
أعاتب أطيافه وأعاتب ظروفي=والشوق ناره تشتعل جوف جوفي
يا خوف قلبي من زماني يا خوفي=يا ويل حالي منك يا قلب ويلاه
حسبي على بعد المسافات حسبي=اللي حدتني غصب ما شوف حبي
والذنب ذنب البعد ماهو بذنبي=يا ويل حالي منك يا قلب ويلاه
وحسبي على حظٍ(ن)بشينه حداني=عن ولفي اللي بالنواظر فداني
حاولت أعدل خطتي ما مداني=يا ويل حالي منك يا قلب ويلاه
العمر يمضي والليالي تقافى=والقلب من جرح الهوى ما تشافى
من بعد خله مبتلى ما تعافى=يا ويل حالي منك يا قلب ويلاه
ياليت ليلي يبلغ الزين مني=سلام ويقل له تراني بجني
يمكن على ما قيل فوقي يحني=يا ويل حالي منك يا قلب ويلاه
أما يجي وإلا يرحب وأجي له=وأحفظ لخلي في زماني جميله
وإلا على ما قيل يطوي صميله=يا ويل حالي منك يا قلب ويلاه
أشقيتني وأشقيت شعري وروحي=قامت تزايد من غرامي جروحي
عذبتي وأدميت عيني بنوحي=يا ويل حالي منك يا قلب ويلاه
هاض القصيد وغرد الشوق غرد=بالخافق اللي خلف عوجي تمرد
من نار شوقه يشتعل ما تبرد=يا ويل حالي منك يا قلب ويلاه

الله الله معزوفة راقية

صح لسانك ولا هنت

تقبل التحية

يسلمو شاعرنا الرايع صح بووووحك

صح لسانك واحساسك العذب شاعر الابداع

صح لساااانك ولا هنت ايها الراقي


احترامي

صح لسانك ولا هنت ايها الراقي ابدعت لا هنت

رايع استاذنا وشاعرنا صح لسانك

صح لسانك قصيدة رايعه


احترامي

راقت لي ..
صح لسانك شيخنا ودام الإبداع

صح لسانك ابدااااااااع


احترامي