أسعد الله أيامكم ولياليكم
اهديكم هذه الأبيات المتواضعة
....
كنت افرح بليلي على شان لقياك=ماكنت أظن الليل يزعج ليا حل
لو كان ليلي مثل ما اهواك يهواك=ما كان طال وضيق الصدر يا خل
أساهره بآهات والوجد ينخاك=مابعد قلبي منك يامشغله مل
ما مقصده برضاي مشغول برضاك=الليل كله ساهرٍ(ن) وأتململ
بالروح لهف وكن بفراشي اشواك=كل ما بغيت اهجع شبح ونتي طل
ودي بشوفك واسمعك لا عدمناك=صوتك يداوي خافقٍ(ن)بي معتل
ماله غرام سواك لولاك لو لاك=ما كان نبض القلب بالقلب يختل
في ذمتي ما مشغله واحد سواك=إلا أنت لكن ماتحقق له الوصل
مديت لك يمناي واريد يمناك=اريدها بالجود ما اريدها بخـل
وان كان ما تقدر والايام تحداك=عطني خبر واعتق لقلبي من الذل
ريح فؤادي من صراعت وارباك=قدام فكري يا اريش العين ينشل
عندي سؤال وجاوبه مطلبي جاك=يازين اظنك للمشاعر ما تجهل
كانك تدور ذبحتي حد شلفاك=وكانك تدور راحتي هاتها عجل
ياعلني أفداك والبوح يفداك=ياريحة الريحان والورد والفل
ريح فؤادي من صراعت وارباك=قدام فكري يا اريش العين ينشل
كلي لكلك ياغلاي اترجاك=دور لحالي يابعد ناظري حل
راح العمر وانا هواي اتحراك=ماباقي الا الموت موعده ماحل
الموت لا من حل ماعاد يمداك=تنقذ لروحي وقتها لازم أرحل
ما عاد أنا في وقها ملك ليداك=ولا عاد بدري عنك لو كان تزعل
وأنا ترى موتي تعجله فرقاك=عجله وإلا وخره قول وافعل
كانك تريده بحسبه من هداياك=يا مرحبا به ريح الروح ثم صل
نذرت لله ما برد لعطاياك=اللي يجيني منك يا ساحري فضل
اللي تريده نفذه لأجل عيناك=كل ما تسوي فيً يا فاتني عدل
راضي بما يرضيك لو كان الإهلاك=كل ما يجيني منك ممنون لو قل
عسى الرزايا يا عشيري تعداك=كمل جميلك وأنت في عيني أجمل
كنت افرح بليلي على شان لقياك=ماكنت أظن الليل يزعج ليا حل
التميز
الإهداءات
مشغول برضاك !!!
رد: مشغول برضاك !!!
