جريت لي مع عجعة الناس طاروق !!!

قصيدة جديدة علها تروق لكم

يالله يا معبود يا خير والي=يا مطلع فوق المخاليق من فوق
الليلة الهاجوس يصلاه صالي=وجريت لي مع عجعة الناس طاروق
غنيت بالمسحوب يا هم لالي=أجر عال الصوت ما عندي شفوق
أشكي على شعري مباتي لحالي=وأثر الشعر لاحقه من حالتي عوق
عزي لحال الشعر مدري لحالي=مدري من اللي محرقه لاهب الشوق
اللي نريده مبعدته الليالي=روح علينا غصب ماهو بملحوق
تصفق يميني من قهرها شمالي=ما عاد تسعفني فعايل ومنطوق
أقفت به الأيام والهم طالي=طال المشاعر والشعر صار محروق
كل ما كتبته فيه للحزن مالي=ما عادت الأفكار تسعفه برفوق
أنا بليت وثوب الأشعار بالي=من عقب راح اللي جمع كامل الذوق
أنا وشعري فاقدين الجمالي=ما عاد فينا شيء ترتاح له موق
كل شيء صار رخيص لو كان غالي=والقلب كنه من عنا الوقت مشقوق
لا من ذكرت لحال مزيون حالي=تبدلت حاله من الزين لمحوق
الله يا ذيك السنين الخوالي=أيام كان الوصل هين ومطيوق
قدام يرجع مقدم العلم تالي=وأمسي وأنا صدري من الضيق مطبوق
يخطر عليه شيء ما هو ببالي=أنا وهاجوسي مع الليل بسبوق
ما بين عدل وميل وين إعتدالي=يا ليل أنا والفكر سارق ومسروق
أقلب الأفكار والحظ مالي=وأكبر غليبة حظ لا صار مصفوق
يكوي كبود مرعربين الرجالي=وتضيع بأسبابه مطاليب وحقوق
يالله يا معبود يا خير والي=يا مطلع فوق المخاليق من فوق

استاذي صح لسانك ونبضك
ابدعت بكل حرف ..
تقديري

اقتباس : المشاركة الأصلية كتبت بواسطة عبير الشوق [ مشاهدة المشاركة ]

استاذي صح لسانك ونبضك ابدعت بكل حرف .. تقديري

مشرفتنا الفاضلة صح بدنك ولا هنتي

تشرفت بردك الطيب

لا عدمتك

تقديري

صح لسانك مدد ماهو عدد


تقبل التحية

رايع صح لساااااااانك


تقبل الاحترام

يسلمو وصح بوحك العذب شاعرنا المبدع

ممتاز صح لسانك ولا هنت


موفق

صح لسانك رائع لله درك تقبل اعجابي

صح لسانك وكل كيانك بوح شجي رائع

رائعة من روائعك المتكررة صح لساااااااااانك