أسعد الله أوقاتكم
اليكم الأبيات نسجها خيال المساء علها تروق لكم
ياليت شرق الجزيرة يدني لغرب الجزيره=يلتم شمل القلوب اللي حداه البعد عامين
عامين ما شفت مضنوني ولا جاني بشيره=مدري عن اخباره وحاله بعسر الوقت واللين
العهد به يوم وادعته عسى ربي يجيره=ساعة يقول أنت تبطي غيبتك والدمع بالعين
قلت:أدع ربك يليم شملنا بأهون بصيره=والله لولا الظروف القاسية ما روح يا زين
تدري بودك محطمني وتعلم بالسريره=ما أظن مثلي ومثلك بالهوى فالعالم إثنين
لكن أنا لي مصالح وإرتباطات وعشيره=مقدر افرط بعاداتي واضيع مكسب سنين
بروح وأرجع على شأنك وأكمل للمسيره=القلب مقسوم ما بينك وبين أشخاص غالين
قال:آه من حظي العاثر ولوعاتٍ(ن)مريره=يا كيف بصبر على فرقاك يا نبض الشرايين
قلت:أصبري قد ما تقوين والغيبة قصيره=وإن كان تشكين لوعة مثلها فيني ملايين
ما بين شوق وغرام وفوقها لوعات غيره=هذي معاناة قلبي لين أجي وأنتي تردين
عامين مرت وأحس بداخلي مثل السعيره=ما مر بي ليلةٍ(ن)ما هزني الوجد والبين
ما كنت أظن السفر بيطول والغيبة كبيره=وأنا الذي ما تمنى غيبته لو كان يومين
ياليت شرق الجزيرة يدني لغرب الجزيره=يلتم شمل القلوب اللي حداه البعد عامين
التميز
الإهداءات
عامين ما شفت مضنوني !!!!
