طورت ذاتي

قصيدة تطوير الذات بدون دورات :
يقول شاعرها

يامطورين الذات بحثاً عن الذات..
انا بعد طورت ذاتي بذاتي

لأنني غيرت روتين الاوقات
ولها السبب قدرت اغير حياتي

ماعاد افكر بالسنين القديمات

ولااشيل هم سنيني المقبلاتي

اللي مضى ماهوب راجع بعد فات..
والجاي يمكن قبله الموت ياتي..!!

يعني اعيش اليوم واليوم ساعات
واللي يبي الراحه يسوي سواتي

العمر رحله والليالي محطات
والموت رمحه مثل رمح الزناتي

اثري من أول عايش في متاهات
ومقزر ن عمري على ذكرياتي

لكن بلا تعقيد.. واحزان واهات
قررت ألملم مابقى من شتاتي

وعملت في نفسي شوية اصلاحات
واصلاحي لنفسي على نحو اتي :

بنيت في صدري مساجد وروضات..
وقمت اتهجد يوم غيري يباتي

وحفظت من فضل الولي عدة ايات
وجلت غبار الحزن والاغنياتي

وسويت فلتر للهواجيس بالذات
والحزن داخل سلة المهملاتي

ورتبت بالترتيب بعض الملفات
وحطيت بالرف القريب امنياتي

وركزت في وقتي على الأولويات
والأول الأهم ...عندي صلاتي

واثنين بالاثنين بر ومرضات
بابوي وامي سلوتي مع غناتي

والثالث الاحسان مع المساواة
لعيالي الغالين وايا بناتي

والرابع امشي ماحسبت المسافات
لان السفر ألقابه اجمل صفاتي

وخمسه حرمت الذات بعض الملذات
والاتزان اصبح سمه من سماتي

والحمدلله عايش في سهالات
متريح بالي... ولاعاد احاتي

يعني كذا ماني بحاجه لدورات
في عقلي الباطن أو ايحاء ذاتي

انا فقط محتاج رب السموات
يغفر ذنوبي قبل ساعة وفاتي
منقول

قصدة راقية صحت ذايقتك


احترامي

تسلم الايادي قصيدة جزلة يعطيك العافية

لمن هذه القصيدة يا اخت روح القصيد

احسنتي بالاختيار


خالص الود

صح لسان الشاعر والناقل

موفقة اختي

قصيدة جزلة صح لسان شاعرها


تحياتي

اختيار يدل على الذوق قصيدة جميلة

قصيدة هادفة

يعطيك الف عافية

صح لسانك ولسان الشاعر


احترامي