اقدم لكم رائعه من روائع الشاعر الكبير / محمد بن سمير الحزيمي العتيبي
يا نجد يوجـد بـك سلاطيـن وخـدوش =دار يعيـش حصانهـا مـع جحشـهـا
لكـن اشوفـك بالهلابيـج مـدشـوش =وامست بـك العقـرب تهاجـم حنشهـا
وفي كل دار يصيـر باطـش ومبطـوش =ونـاس ٍ تعقـد للمشـاكـل شوشـهـا
ناس ٍ لها في المجد مطـلاع وعـروش= ونـاس ٍ فعايلهـا تـسـود خششـهـا
والعيب فـي رجـل للأسـرار نابـوش =أسـرار ربعـه بالمجـالـس نبشـهـا
اللي يشيل السـاق والسـاق معـروش= مشتالهـا مـن واحـد قـد عرشـهـا
غشه وقال الحق ورافـق هـل الهـوش= تلقـاء المراجـل كلهـا فـي هوشـهـا
خدش ٍ تقرقش عن هل البيض قرقـوش= وللسـود شايـوش ٍ يشـوش لولشهـا
ولا قط رافق مع هـل الطيـب طـاروش= ولا فيـه طرقـه فاشلـه مـا طرشهـا
ودايم فراشـه لـاهـل النـم مفـروش= وإليـا سمـع كلمـه منافـق رقشـهـا
وقلبه كبير وبيـن الأضـلاع فشفـوش =ووجهـه متيـن لكـل سـوداُ كدشهـا
اليا احتاج حلو لسان والوجـه باشـوش= واليـا قضـاء لازم رمــاك إبلشـهـا
اما طلع راشـي رشـاء كـل مريـوش= وإلا تـوكــل لليـتـيـم ولطـشـهـا
صااحب رخاء عن ماقف الضيق مخروش =ثور ٍ مغابيـش الشـرف مـا غبشهـا
وإليا نصحتـه كثّـر الهـرج والـدوش =وعينه علـى الناصـح يطيـر رمشهـا
وكنه مركب فـي الحناحيـن خرطـوش =وسوالفـه بيـن المجالـس عفشـهـا
ومن التجارب ما فهـم بـارد الجـوش =شيّـب ونفسـه ماشيـه فـي جغشهـا
حتيش لو شيّب علـى مـاش ياخـوش =دايـم ونفسـه مــن رداه بطفشـهـا
وبعض البشر خلقه على القلـب داروش =والله هـو اللـي حـط معهـا درشهـا
ونص العرب يمشي مع النـاس دابـوش =وربـي فـرق بيـن الرجـال ودبشهـا
واهل النمايم فـي قفـاء كـل داغـوش =اللـي علـى الشينـه قـوي ً عطشهـا
قضابة المركـاء علـى مـاش ودفـوش =الـلـي سوالفـهـا تبـيـن دفشـهـا
نصابـة بالديـن لـو جالهـا طــوش =ياتـي لهـا يــوم ٍ يبـيـن فنشـهـا
جحادة المعـروف مـا تنطـح البـوش =الله يعـجـل حملـهـا فــي نعشـهـا
والحقد في راعيـه يطلـع لـه نقـوش =وإلا قلـوب النـاس مـا احـد ٍ فتشهـا
ولا فيه عين ٍ مالهـا حجـاج ورمـوش =لكـنْ تعـرف مرطهـا مـن عكشـهـا
والطيب لو يشراء من السوق بقـروش =يمـدي غـراب الـدار رافـق وحشهـا
ويـن الرجـال معطـرة كـل نامـوش =اللـي تــروّي بالمـواقـف نمشـهـا
اهـل الشهامـه مكرمـة كـل هاتـوش =حمّـايـة القـالـه بصـكـة بوشـهـا
عيني عليهـم تسقـي الخـد برشـوش =واللي رزق خلقه علـى ارض ٍ فرشهـا
كن الفـؤاد مـن المعاليـق محشـوش =وروحي من الذكـرى يجيهـا حششهـا
ما طلعـوا مـن بينهـم كـل مغشـوش =والناس تطلـع مـن عضاهـا غششهـا
اليا صار ضرسك بين الأسنان ناهـوش =قلعـه علاجـه عـن سنـون ِ نهشهـا
ياويلهـم مـن ماقـفِ فيـه رابــوش =يــوم الأوآدم يجـمـع الله طششـهـا
اليامن يـوم الملتقـاء حاشهـم حـوش =تشخص به الأبصـار مـن مـا ربشهـا
يوم الحساب اليا جمـع كـل مطشـوش =يذهل جميع الخلـق مـن مـا رهشهـا
حتى الجبل يصبح كما العهـن منفـوش =واهـل القلـوب المؤمنـات يخرشـهـا
تمـت بذكـر الله وقافـي عـلـى اوش =والناس تعـرف خدشهـا مـن دغشهـا
قول ِ يسقـي كبـود الأبطـال نقـروش =وحبوب روس اهـل الـدوادي جرشهـا
التميز
الإهداءات
الشاعر محمد سمير الحزيمي العتيبي
