طابت أوقاتكم
![اضغط على الصورة لرؤيتها بالحجم الطبيعي](https://fbcdn-sphotos-b-a.akamaihd.net/hphotos-ak-xtp1/v/t1.0-9/12115494_1025004510884623_7157968596201466431_n.jpg?oh=9e1eccff502c6316c62010eb1f0b6105&oe=569C9DE1&__gda__=1452889543_5dd25ee83d33a39d0cc4c96d22a940bd)
حيالله اللي يظنه بالزمن بارع=قبلك من الناس واجد حظهم مـالي
بالهون بالهون توك نابت ويافع=لا تندفع بالحماس تخر من عالي
لا تنخدع بالشباب وحسنك الطالع=ما مر بك مر بي سرعان ما زالي
هذي نصيحة محب ومالها مانع=تجارب الناس تتوارث بالأجيالي
بيني وبينك مسافة فرقها شاسع=بعد الزمن ما يقاس بطول الأميالي
البعد بعد العمر والشاهد الواقع=اللي تريده ما اريده يابعد حالي
لو كنت ماني بلا راضي ولا قانع=تعبت ما عادني داله ولا سالي
يكفيني اللي لقيت بعالمٍ(ن)واسع=أخذت ما هو كتب حلوٍ(ن)وغربالي
اللي مضى من عمر ماعادهو راجع=واللي بقي يعلمه سبحانه الوالي
نمشي مع الوقت ونصارعه ويصارع=نغلي رخيص العمر ونرخص الغالي
نحسب قصير العمر بيطول ونسارع=نحصد من أفعالنا ما جاء على البالي
وليا إنتهينا يجي لأعمارنا قاطع=نرحل ونترك ورانا مر مع حالي
لا بد في يوم مهما طال بنوادع=أعمارنا طولها حلٍ(ن)وترحالي
والأخرة يعلم الله ويش بي صانع=بالنار وإلا بجنة وين منزالي؟
يارب في رحمتك ياخالقي طامع=ياعالم بذنب نفسي فأول وتالي
يالله يامالكي يالخافض الرافع=إرفع مقامي ياربٍ(ن)عال متعالي
هذا مصير البشر ياصغيرٍ(ن)بارع=قبلك من الناس واجد حظهم مالي