أسعد الله أوقاتكم بكل خير
الأبيات علها تروق لكم
ليت خلٍ(ن)زرع بين الضلوع المحبه=يسقي لزرعه اللي حامي القيض لافه
صافي الوصل لا منه على الزرع صبه=يروي عروق عطشانه لحقها خلافه
مير خلي بعد ما زيَّن الزرع كبه=يحترق من لهيب القيض والله حسافه
السمايم تهبه والبروده تهبه=تحته الشوق نار وصد خله لحافه
لين يبست غصون الشوق ما جاه طبه=المشاعر جريحة والأماني مُعافه
ما تهنت بجو ولا تهنت بشربه=العطش صاب روحي بالنكد والصلافه
نكبةٍ(ن)عامريه ما تقارن بنكبه=غير نكبة فلسطين وضياع الخلافه
حظ عمري جمع هم الزمن ثم ذبه=خلف عوجٍ(ن)من الهجران تشكي نحافه
الأمل مات صدقه ما بقا غير كذبه=القسا في عيون الوقت والقلب شافه
يا وليفٍ(ن)بقلبي صالي الشوق شبه=ليش كل القساوة بعد ذيك اللطافه
حالي اللي سقمته بعد حبك لعب به=ابتدأ بالحقيقه وإنتهى بالخرافه
بعد قلبي كويته بالجفا دش حبه=مختلف نبض قلبي صار فيه ارتجافه
كني اللي رماه الموج في وسط غبه=صعب منه النجاه وهان فيه انجرافه
يبصر الموت قدامه مجهز لحربه=ماش طوقٍ(ن)يعدل وجهته وإنحرافه
المواجع كبيرة والملمات صعبه=أشتكي من جروح وتشتكي من كلافه
مير ما خاب منهو يشتكي فوق ربه=يالله إني طلبتك رحمتك والريافه
تلطف بقلبي اللي جَرحَته المحبه=أنت مبصر لحاله جاير الهم لافه
التميز
الإهداءات
غصون الشوق !!!
رد: غصون الشوق !!!
