أسعد الله أوقاتكم بالخير والمسرات
البرق له تأثير على النفوس فيه جاذبية
طلبا للرحمة والغيث ويذكر بما هو جميل فلونه نقي لا تشوبه شائبة
كنقاء القلوب الطيبة
الأبيات التالية سجلتها بجوالي مساء البارحة حينما كنت متوجه للطائف
لحضور مناسبة سعيدة
اليوم جمعتها وكتبتها وعلها تروق لكم
يالله يالله من نوٍ(ن)سرى برقه=يشبه لخد الغضي برقه ليا ناضي
الليل لا ناض برقه جاي له شرقه=تلامع البرق كنه كهربٍ(ن)ياضي
ياسرع نوضه سهومٍ(ن)جا لها زرقه=العين من شدته تلجأ للإغماضي
شوقني لشوفة اللي دارها شرقه=راع الثمان الرهايف وأترب غضاضي
مشاعري لا ذكرته صابها شرقه=والقلب يزاد به خفقة ونباضي
الروح ملهوفةٍ(ن)والكبد محترقه=الشوق يدهج بقلبٍ(ن)بالعنا راضي
شيب غيابه بشعري وإختلف طرقه=حير معاني قصيدي وأعجز الفاظي
عامين ما شفتها بالعين مندرقه=ما سلوتي غير ذكرى جات بالماضي
الروح من حبها بلحيل منسرقه=اللي مضى من عمر وشلون ينعاضي
أواه يا عز حالي موجعه فرقه=الوصل كايد ظروف طوال وعراضي
اليأس حطم حلومٍ(ن)فيه مغترقه=الوقت نضب عدودي وأنشف حياضي
أخاف قلبي يطق من القهر عرقه=لن مر حبي بلاش وراح بالفاضي
ياليت للحب حامي والتجي درقه=وإلا محاكم واقاض الحب للقاضي
يالله يالله من نوٍ(ن)سرى برقه=يشبه لخد الغضي برقه ليا ناضي
التميز
الإهداءات
البرق !!!
