أسعدكم الله
الأبيات بدون مقدمات
راحت وأنا من حكيها ما ترويت=لحظات من عمر الزمن كيف تنفع؟
مرت بنا ما كنها غير تسكيت=جابت وليفي وأخذته قبل أودع
أمضيت باق الليل من ليت في ليت=ياليتها لو لحظةٍ(ن)بس ترجع
لا صار صعب تحقق اللي تمنيت=برضى بميسور الغلا وأتقنع
لا هي تهنت بي ولاني تهنيت=من حبنا طول الزمان نتوجع
ركضت خلف أحلامنا ما توانيت=والشوق كنه بالمعاليق يقطع
أسج خيل الفكر ما يوم مليت=ما ردني يأسٍ(ن)بصدري تربع
لا راح يوم أقول باكر يبا الفيت=يكون خير ويطلع الباكر أشنع
حظي معاند والليالي سواحيت=تأكل لتال أعمارنا ما ترفع
لكن بعون الله وصبري تحديت=ما يرخص الغالي ولا وصله أمنع
بكتب قصيدي فيه ياكيت من كيت=باب الوفا مفتوح ماهو مشمع
يمكن يزين الوقت توفي ليا أوفيت=تسقي عروقٍ(ن)بالخفوق المولع
حيث إنها عانت مثل شيء عانيت=تشكي مثل شكواي والشوق يجزع
وإن كان ما عادت لحبي تفانيت=عل القدر يجري لوصل انتوقع
وإلا على ربي جزا شيء لاقيت=واللي يريده ربنا يأتي أسرع
ما هو بينفعني بكاء وإن تباكيت=ما حاصلٍ(ن)لي غير رزقٍ(ن)موزع
كاتبه ربٍ(ن)يرزق الحي والميت=يبعثه في يومٍ(ن)به الناس تزرع
وختامها يارب راجيك وأوحيت=تلطف بروحي ساعة الروح تنزع
يا مالكٍ(ن)للملك وأنس وعفاريت=تعلم بحالي وأنت تبصر وتسمع
راحت وأنا من حكيها ما ترويت=لحظات من عمر الزمن كيف تنفع؟
التميز
الإهداءات
راحت وأنا من حكيها ما ترويت !!!
رد: راحت وأنا من حكيها ما ترويت !!!
