الشاعر:عيضة الثبيتي
بسم الله الرحمن مبداء كلامـي=مبدا القصيـد ومطلـع القيفـان
ولا خاب من يبدا بذكره كلامـه=رب العباد الواحـد الرحمـان
واردّ من حلو المثايـل واغنّـي=كـلام مـوزونً علـى ميـزان
هبت هبوب الشعر منّـا زمنّـا=ببيوت مثل الطرقـي العجـلان
تسابقنْ مابينهم فـي ضميـري=الكـل ودّه يصبـح العـنـوان
واخترت من زين المعاني معاني=وبنيت مبناهـا علـى سيسـان
بيوت شعرً في ضميري تزاحم=تارد مثل مـا يـارد الضميـان
ارسم معانيها وارتّب حروفهـا=صنعة عقود الـول والمرجـان
وانا لياجات المواقـف عتيبـي=واسعـد منهـم ربعـه العتبـان
العزوه اللي من خيار العزاوي=اللي لهـم بيـن القبايـل شـان
قومً يعرفـون القبايـل فعولهـا=زبن الدخيـل وسـم للعـدوان
كم نزّحو لابه وعاشوا مكانهـا=يوم أنها سيف وفـرس وعنـان
تربعوا في وسط نجد وخذوهـا=يـوم إدراج الخيـل فالميـدان
قحص المهار اللي عليها رجالها=تقضّـب المـديـون للـديـان
ومصقلاتً عشت النمر والفهـد=والطير منهـا ماضـوا جيعـان
ربعي هل الطالات لطّامة العدا=لا زادت الشعله على الدخـان
أهل الفعول اللّي تبيّض وجيهـا=لا عدّت الأفعـال كـان وكـان
أفعولها يزري لسانـي يعدّهـا=والله مايحصيهـا كـلام لسـان
ولو تكتب الأقلام مايكفي الحبر=ويمدي الورق خلّص من الدكان
برقا وروق أهل السلوم العريبه=تاريخهـم بالمرجلـه ملـيـان
سمّوهم الهيلا لكثرة جموعهـم=هيل المطر من رايح الأمـزان
وذباحة الحائل لكثـرة كرمهـم=قـومً كـرام تكّـرم الضيفـان
ولطامة العايل للطمـة عدوهـم=قولً على فعـلً علـى برهـان
أمجادهم مثل النجـوم المطلّـه=ماتختفـي يـاكـود للعمـيـان
وحصونهم مثل الجبال الرواسي=امرسّيـه مارسّـت الضلعـان
وأديارهم في قلب نجد الموقّـر=وقلب الحجاز الشامـخ الفتـان
هذي منازلهم وهـذي ديارهـم=وهذي مسيرة ربعـي العتبـان
ووالله مايكفي قصيـدي بحقهـم=لو أنّي اكتب لـي 100ديـوان
التميز
الإهداءات
وا سعد منهو ربعه العتبان؟؟؟؟
