أسعد الله أوقاتكم
قد يقول قائل قصيدة ربيعية بأيام صيفية
نعم هذا ما حصل فلا تستغربوا وأترككم مع الأبيات
ياما حلا السجة ليا ربع البر=في ديرةٍ(ن)عن كل شين محشومه
صوت الطيور بفج خالي ومخضر=يفرج هموم لروح دوم مهمومه
في روضةٍ(ن)والنبت نامي ومزهر=عاشت غصونٍ(ن)قبل شبه مهشومه
وياما حلا فنجال بنٍ(ن)مزعفر=يبعد صلف راسٍ(ن)تزاحم علومه
وياما حلا الطاروق لامن تفجر=من فكر شاعر والهجوس محكومه
خصٍ(ن)ليا منه ذكر من تمخطر=في داخل المعنى ينشن سهومه
أسامر أطيافه ليا مطلع الفجر=وأذكره لو نفسي بحال مغمومه
أخلصت له بالحب والبعد دمر=صروح حلمٍ(ن)من بعده مهدومه
كل ما جمعته من شتاته تبعثر=الحظ صادم والظروف محسومه
يالصاحب اللي كل ما بالفكر مر=جدد غرامه لو حرمنا قدومه
على فؤادٍ(ن)بالهوى ناخره نخر=صيف وربيعٍ(ن)ما تبدل قسومه
في داخله وقاد يغلب على الجمر=تلهب مشاعر للموده كتومه
أشاهده بالفكر والوجد بالصدر=والعين من شوفه زمان محرومه
أقفت به الأيام والحظ كشر=عن نابه الشاين وخابث سلومه
هبت علينا من عواصفه صرصر=ريح الفراق أظلم من أظلم حكومه
أحلامنا شابت من الكر والفر=حنا تعبنا والحلوم مهزومه
ياصاحبي بذكرك بالبر والبحر=والله يلوم اللي وفانا يلومه
مهما يزين الجو بشكي من الحر=والنفس دايم للبنادم ظلومه
ومهما يكون الصبر وشتالي الصبر=لا صارت الفرصة وكاد معدومه
مافيه داعي ياهوا البر نغتر=أيام والمرباع تقفي رسومه
حنا تعودنا على الجو مغبر=دوم الحوال محال برد وسمومه
نصيبنا بنعيش بالخير والشر=كلٍ(ن)على ما قيل داعيه يومه
مابين حلم وعلم وهموم نفتر=وأعمارنا مابين قعده وقومه
الخاتمه يالله يارازق الذر=أعمالنا بالعفو منك مختومه
التميز
الإهداءات
الفراق أظلم من أظلم حكومه !!!
رد: الفراق أظلم من أظلم حكومه !!!
