كالعادة بعد التماسي
الأبيات بدون مقدمات
بين الرضا والزعل والصبر والقهر=ياليل ولول معي ياويل قلبي ياويل
حبيب قلبي مقاطعني مقرب شهر=وأنا على شان حبه صانع المستحيل
تعبان حالي ومتعبني طويل السهر=حلو الأماني تقافت ما بعدها بديل
والقلب بين الحنايا من هواه إنصهر=كن الجمر في فؤادي مشعلينه شعيل
قلبي من العشق كنه يا هلي منفطر=ينزف من الشوق فيني كل صبحٍ(ن)وليل
وقلب الحبيبة يا كافي قطعةٍ(ن)من صخر=ما ترحم لحال منهو في هواها عليل
وأظن هذي طبيعة نادرة بالبشر=ننهي جميل المحبة بالبكاء والعويل
من عقب حلو الليالي تحت ضوء القمر=ياسرع مقفا الليالي حين حان الرحيل
ما باقي إلا توجد كل حلو إندثر=حمل المواجع بقلبي حمل جاير ثقيل
حبل الرجا منقطع واليأس ركبه حضر=يحمل بشاير تباعدنا كثير وقليل
حلم الليال القديمه من عناه إنتحر=بين الحنايا وحل الهم فيها نزيل
القلب مثل القزازة طاح به وإنكسر=مسكين قلب الشهامة كيف يصبح ذليل
إرتاح ياليل حالي من كدر في كدر=ما عاد تفرق معي من يوم راح الخليل
قرب همومي وهات المر واللي أمر=الكل عندي سوى ما عاد شيءٍ(ن)جميل
قانع بحظي وراضي بالقضا والقدر=صبري على همي أحسن من ترجي بخيل
الرزق والعمر تكمل مابها من مفر=تدبير خالق لخلقه والشواهد دليل
بين الرضا والزعل والصبر والقهر=ياليل ولول معي ياويل قلبي ياويل
التميز
الإهداءات
تعبان حالي ومتعبني طويل السهر !!!
رد: تعبان حالي ومتعبني طويل السهر !!!
