مجموعة قصائد الشاعر
ضيدان بن قضعان
سم الله الرحمن الرحيم
السلام عليكم ورحمة الله وبركاته وبعد
فهذا ديوان للشاعر الكبير/ ضيدان بن قضعان ويحتوي على مايقارب (40) قصيده
آمل ان ينال اعجابكم
عقب العفو
عقب العفو من سيد الجود كله
طاحت بي الدمعه على كف سلطان
الدمعه اللي جعلها فدوةٍ له
وانا بعد فدوة مواطي كحيلان
ويفداه من جاش البكا رهبة له
ويفداه دمع العين شكرٍ وعرفان
حبيت ركبة سيدي حشمة له
ولي الشرف ويصير لي عقبها شان
البارحه كني على صلو مله
واليوم مشرافي على راس مابان
عديت روس النايفات المطله
واخترت من غر القوافي والاوزان
في مدح من شرد القوافي تدله
تنقادله قود العسايف بالارسان
المدح ماله غير سلطان لله
والجود ماله غير سلطان عنوان
اسمه لحاله دولة مستقله
ويعيش في ظله شعوب وسلفان
وان قلت حكام العرب تحت ظله
عندي على قولي دلايل وبرهان
لياحصل في بعض الاوضاع خله
وتشتت فالروس الاريا والاذهان
هام الصعاب وكل عقد يحله
مهوب في حل الصعيبات بحلان
يشيل حمل اللي عجز مايشله
ويذري ذراه من أشهب اللال شيخان
واليا بطش كل ثبت في محله
واليا تغاضا طمرته طمرت حصان
والعفو عند المقدره عادةٍ له
والحلم لوصدره من الغيض مليان
والجود من له غير سلطان من له
ومن للمحبه والمكارم والاحسان
الله خلق فيه المكارم جبله
والله خلق فينا محبة بليهان
ياحبنا له والمحبه من الله
نشري رضاه ونؤمن بحبه ايمان
وعن الشعر والمدح كثره وقله
يغنيه من يغني به اشعوب واوطان
وان عاش راسي والسعد مقبلٍ له
لعوض روحي فالقصايد لسلطان
العمر مشوار
يــا لـلـه يـالـلـي الـيـا ضـاقـت تـفـرجـهـا
يـا فـارج الـهـم والـضـيـقـات والـكـربـه
يـامـخـرج الـعـبـد لا ضـاقـت مـخـارجها
عـن مـوقـفٍ يطحن السربه ورا السربه
افـرج لـمـن كـايـد الـطـرقـات يـنـهـجهـا
لـو مـاش بـكـره ولا مـزهـب ولا قـربـه
بـمـرك يـهـوم الـدروب ايـلـين يسهجها
ولـولا الـرجـابـك قصر ممشاه عن دربه
ثــم الــرجــا فـي رجـالٍ مــا يـخـالـجـهـا
فـي نـفـوسـهـا شـك والـطيب تفاخـر به
شـرواك يـالـلـي الـيـا صـكـت نـعـرجـهـا
صـوبـك شمال الشموخ وشرقه وغربه
نــنــصــاك نــرثــعــبـهـا ولا نــدرجـهــا
ومن شاف وجهك نسى الهم وتباشر به
يـامـن تـسـر الـنـظـر والـنـفـس تبهجها
أنـا أشـهـد ان الـعـيـون لـشـوفتك طربه
لـو حـدهـا عـنـك شـيءٍ قـام يـحـرجـهـا
مـن عـلـةٍ جـات والاوضـاع مـضـطربـه
والـعـلـه الـلـي نـحـولـي مـن نـتـايـجهـا
لــيــه أتــعـبـر بـهـا يـالـهـرجـه الـذربـه
لا صـار صـبـري عـلـيـهـا مـا يـعـالـجها
مــاعــاد لــي عـذر وش عـاد أتـعـذربـه
هـب الـهـوى والـسـفـيـنـة قـام يـدرجها
مـوج يـهـول الـعـقـل فـي جمبها ضربه
امــا نــطــحــهـا الـهـوى ولا تـولـجـهـا
ولا كـل مـن غـربـوا عـادوا مـن الغربه
الــبــحــر غــدار وامــواجـه تـمـوجـهـا
يـخـفـي الـمـنايا وصوت الموت يجهربه
الاقــدار تـخـفـى نـجـومٍ فـي تـوهـجـهـا
ويـمـوت مـيـعـادهـا الـلـي كان تظهر به
قــلــتـه والايـام مـدخـلـهـا ومـخـرجـهـا
مـاهـوب مـثـل الـجـمـال الـلـي تظاهربه
عــادات الايــام لــو يــغــري تـغـنـجـهـا
لا بــد بـيـن الـضـلـوع تـمـكـن الـحـربـه
ومـن لا يـشـد الـرسـن بـيـده ويسرجها
ويــضـرب بـهـا كـل ربـعٍ كـايـدٍ ضـربـه
يــمـوت مـن ونـةٍ مـاأحـتـال يـزعـجـهـا
وحـسـبـه على اللي عن اليمه تياسر به
وكــثــر الـقـنـوات ومـتـابـع بـرامـجـهـا
مـا تـلـحـق الـرجـل مـقـصـودٍ يـفـكر به
والايـام كـثـر الـتـرف فـيـهـا يـسـمـجـها
والـعـمـر مـشـوار والـرجـل إيـتـعـبر به
الشرفه
البارحه يوم شمس الشعر تسطع بي
وانا أتحرى لشمس الله من الشرفه
ولعي على واحد قبلي تولع بي
مايوم غنى ولا أسهر للهوى طرفه
الين حتى تولع بي وولع بي
نار من الشوق صاليها لحق طرفه
من بعدها ياشقى حالي ويا تعبي
نفسي عن الشعر واهل الشعر منصرفه
مانيب يم الشعر يالشاعر الشعبي
يا بتوع مش عارف وشي ما أعرفه
تبي تهز الجبل بمسدس لعبي
والناس من وارد المنصور منجرفه
لاتستفز القصيد ولا ترفع بي
الشعر ماهوب مهنه لأجل تحترفه
وأن كان يا محترف تقدر على لعبي
خلك على جنب لين اشوف لك صرفه
ما أحد عبالك ولا لك عندنا معبي
يا كود باب مداه أكبر من الغرفه
وأنا من الناس ياسهلي ويا صعبي
بحر تشوفه ولاتقدر على غرفه
مسكون بالشعر من راسي ليا كعبي
والشعر ملكي وكل الناس معترفه
أنا (ملــك) مير يوم أصبحت من شعبي
حذفت تاج القصيد وصابني قرفه
أستاذ مشارك
يا مرحبا يا صاحبي نواف نواف الدبل .. دبل
من وين ما مرت حروفك توّعيني قافله .. قافله
شاعر واعّرفك اهل البحر واهل الابل .. وقبل
واكلمك واخاطبك واهل العقول الغافله .. غافله
دقت طبول الحرب واسوحيتها طبل طبل .. طبل
وانا ادري ان الريع من صوبي ودرب القافله .. القافله
لكن على الله تسبل الغيمه على راسي وبل ,, وأبل
كبدي واصلّي الفرض والحقه النوافل نافله .. نافله
وانا اعرف المرقب واععرف الضلع واعرف الجبل ..جبل
واعرف اقول الحق واصحاب القلوب الجافله .. جافله
لو اقدر امنح درجة استاذ نواف الدبل .. قبل
استاذ ومشارك من اليوم وبعد ما طافله .. طافله
وانا ليا من شفت كل الناس فعيوني عبل .. وابل
مافيه شور اثنين يا نواف عندي قافله .. قافله
حي الله اللي
حي الله اللي ليا ابطى واق له ويقه
حيى بها اللي من الوحده نفد صبره
البارحه ليلٍ اغفـي منـه وافيقـه
كني عليل يوايق بـه علـى قبـره
واخوي سلطان مثلي ناشفٍ ريقـه
جاني كتابه وزود عبرتـي عبـره
يالله يـا كافـلٍ عيشـة مخاليقـه
عليك ياللي عليك الحـل والدبـره
والشمل يابو محمـد لـم تفريقـه
للمعتبر يا رفيـع المنزلـه عبـره
وان كان مـا الله وفقنـا بتوفيقـه
لو نشبر ايامنا ما هـي بمنشبـره
يالشاعر الشعبي
البارحة يوم شمس الشعر تسطع بي
وأنا أتحرى لشمس الله من الشرفه
وألعي على واحد قبلي تولع بي
مايوم غنى ولا أسهر للهوى طرفه
الين حتى تولع بي وولع بي
نار من الشوق صاليها لحق طرفه
من بعدها ياشقى حالي وياتعبي
نفسي عن الشعر وأهل الشعر منصرفه
مانيب يم الشعر يالشاعر الشعبي
يابتوع مش عارف!!وشي ما أعرفه!!
تبي تهز الجبل بمسدس لعبي
والناس من وارد المنصور منجرفه
لاتستفز القصيد ولا ترفع بي
الشعر ماهوب مهنة لأجل تحترفه
وان كان يامحترف تقدر على لعبي
خلك على جنب لين أشوف لك صرفه
ما أحد عبالك ولا لك عندنا معبي
ياكود باب مداه اكبر من الغرفه
وأنا من الناس ياسهلي وياصعبي
بحر تشوفه ولا تقدر على غرفه
مسكون بالشعر من راسي ليا كعبي
والشعر ملكي وكل الناس معترفه
أنا(...) مير يوم أصبحت من شعبي
حذفت تاج القصيد وصابني قرفه
الغرام انواع
أه ياغـفوت الاسـحار ماقـبل الطلــوع
وأه ياشـي ذكـــــرت وعـلى بالي طـرى
العيون ليا ضـمت شوف تسقـيها الدموع
وان روت من دمعها العذب يظماها الكرى
والقلوب تـذوب بصـدور صلفين الطـبوع
والغلا يذكر على الما من البـدو اقصرى
والهـوى لاهـب فـي قـلب رجـال جــزوع
والله ان يصـبر بـرى الجـرح ولا مابرى
والحـياة افـراح وأهات والفرقا تلوع
والمـحـبة لاسـرتـنـي سـرى لـــيل سرى
لين اغـني للفـراشات فـي عيد الشموع
وتهـتـف لـي كــل شــمعة ورى ورى ورى
واذكـر انـي مانسيتك ويغريني الرجوع
ياغـرام تنشــد الـناس ويـــنه ياترى
والغـرام انواع والقلب مدهـل كل نوع
والله اعـلم منهو اللي من الحدب وورى
وانت ياللي منزلك ماورا حـدب الضلوع
تـدري انك مــن وراهــا وغـيرك مادرى
تمتلكني يا اطرق العود من عادك فروع
قـبل تغـريك المـديـنه ويطـغيك الثرى
يـوم عادك تـكـره السبت وتحب الربوع
والمـواجـه كان مسـمـوح والوصل اجهرى
جعـل تسـقي ذيك الأيام سجـدات وركـوع
رحـمـــة مـن رب طـيـبة ورب ام القرى
رحمة تغفر خـطا الفجر ما قبل الطلوع
يالزمـــان اللي ذكـرت وعلى بالي طرى
نجوم الصبح
بانت نجوم الصبح واللي في عيوني من عصر
ماهوب دمع لا تضايقت آتنهت واسكبه
لا والله الا حلم شيخ عن طموحه ما قصر
لو قصرت سود الليالي من يمينه وشنبه
وانا لو اني ماتعلمت الهزيمه والنصر
ماكان ذقت في الهوى مره واعذبه
شاعر وعصري فاتني واعيش في أغرب عصر
لا الوقت وقتي والزمن مابيني وبينه شبه
لكن هنوف مثلت دور العزيزه في مصر
قدت قميصي واسرفت في وصلها قبل انتبه
يوم انتبهت استشهدت ضدي بحراس وقصر
قلت ارحمي عزيز قوم ذل وارخى منكبه
ماني نبي الله اقاوم حسن خصرك لا انصهر
أنا بشر..عبد ضعيف وكل برق يجذبه
قالت وهي توي تثنى كن مافيها خصر
الشعر يا ضيدان ورث جدود ولا موهبه؟!
قلت الشعر سحر يسخر لي القلوب ويختصر
عمر المسافات الطويله والسنين المجدبه
والحب شي لو حصرته في ضلوعي ما انحصر
يطغى على حدب المحاني لين ابيحه واكتبه
وان علمتني الفاتنه وشلون اسير بلا بصر
علمتها الفنجال وشلون اتحدى واشربه
وعلمتها إني كذا طال الزمن ولا قصر
وان اعذب الحب اصدقه وان اعذب الشعر اكذبه
موجز النشره
إنعـسـت عـين الغـلا والهـوى هـدا
خانـت الأيام والملـح والعـشره
وابـتـديـت تشـوف نـفـسـك وتتحدا
وأنـت ما كـنت تـغـلى ولا تشره
كنـت مجـروحـي وصـرت الدوا والدا
كنـت أه وصـرت أهـات مـنـتشره
غـلطـة اللي بالمـحـبه أخـذ وأدا
واعـترف لك بالغلا وأبصمت عشره
الهـوى جـاب الغـــلا والهـوى ودا
وأنت وجروح الزمن بالحشا خشره
يابعـد مـن بعـد جـا ومــــن هدا
ويابعد من ساج روض الحشا نشره
يـوم صار الحـب جـزيـه ولك تــدا
والقـصيد أسهل من كتابته نشره
خـذ قـصـيـدي ياشـذا الـورد لاندا
وانتبه لي واستمع موجز النشره
والله انـك بالغـلا فـــــارق جدا
مـثل فـرق الابتسامه عن الكشره
معلوق معلوق
طلي علي من شرفه القصر من فوق
وتبسمي لي واضحكي في وداعي
أومي بكفين الغلا ؛واشعلي الشوق
في قلب شيخ جاك في ثوب راعي
حده غلاك يجيك ياشيخة الذوق
لو كان ما للحب والذوق داعي!
واقفى يتل القلب معلوق معلوق
في درب فرقا ما وراها اجتماعي
مايتبع المقفين ياكود مطفوق
وانا رصيدي ماتحوشه ذراعي
لو كنت ضايع..كل مطرود ملحوق
يكفيني انك كنت سبة ضياعي
الدنيا حظوظ
المثل حده الأدنى بعوض
قول رب لما أنزل حفيظ
له سجود النوافل والفروض
وله دموعي من الخشية تفيض
احتمى القيظ والميراد حوض
والظوامي تهيض وتستهيض
مايبل الظما برق ينوض
ولايسد الرمق ريح النجيض
والخطا سر والسر معروض
والعذر حق والسفهه تغيظ
وانت ياللي لك السر امحفوظ
عاذرك مثل عذري للمريض
لا لعب فيك تسديد القروض
ولا لعب بك من الشرد غضيض
يلعب الحظ والدنيا حظوظ
والحظيظ انت مانيب الحظيظ
انت ترعى الربيع بكل روض
والا انا من شتاي العز قيظ
يقصر الهرج عن ظلم العروض
ويشهد الله وجيه القوم بيض
والنهايه ونور البدر يوض
ودي أقول بلسان غليظ
(فـ)الكسير ترى الرده تعوض
قلتها كاش بالخط العريض
ياعــظــيـمـه
ياعــظــيمـه كل شـيٍ لــه حــدودولــه نهـايـه
لـكن انتـي ماوقفـتي عـنـدحـدّك ياعـظـيـمـه
اسـتلـذّيتـي بطـعـناتـي واخــذتـيهـا هـوايـه
كـن مالـك حــربـةٍ تـوجـع وطـعـنـاتٍ ألـيـمـــه
آه لـيتـك مـاتماديـتـي بطـعـنـات الـبـدايــه
لـين صار لـكـل طـعـنـه فالـحــشا مـعنىوقـيمـه
الـلـه يبيحــك ولـكـن كـيف فـي أغـرب روايه
تكـتبين الـحــب كـذبــه والهـوى دقّـه قـديمــه
وانتـي الـلـي كـل مـالـدّت عــيونـك فـالـمـرايـه
مالمـحـتـي الاالـيتيم اللـي خـذت قـلـبه يتيمـه
والـيتـيمـه فالـيتامــى مــالـهـا حـق الـوصايـه
الـوصـيّـه عــودهــاالـغــض ونواياه الـسلـيـمه
لـكن انتـي صار لـك حـق الـوصـايـه والولايه
واسـتبدّيتـي وشـدّواالـبدو واضـحـيتـــي مـقيمـه
مارحـلـتي لـين حـطّـمـتي بمـافـيـه الـكفايـه
عـاقـلٍ حب الـجـنون وصـوت نارك فـي مـشـيـمـه
اسـتبحـتي حـرمـة الـمـجـنون بادراك وعـنايـه
والـتـفـتّـي لـه بعقلك وارتـكـزتي في صـمـيـمـه
امـتلـكـتي غـايتـه لوكـان مـالـه فــيك غايـه
وانتـصـرتي في عـيونه واعــــترف لك بالهـزيمـه
مـن كـثـرمايعـشـقك مـاقـال لـك بالـــــحـب رايـه
خـايـف الأيـام لاتـطــلـع عـواقـبـهـا وخــيـمـه
فـي طـريقـك كـل مـاكـنّه لمـــس درب الهـــدايـه
تـاه ودروب الحــياةالمـسـتـقـيمـه مـسـتـقيمـه
تـايـهٍ بـصـري ومـن جـابـه لــبيت الـلــه تـايــه
عـذر مـن غـمّـض بعـين وعـينه الأخــرى كـريمــه
فـدوتـك مـافـات مـن لـيّـام والـلي عـاد جــايـه
يا بعـدعـمـرٍ مـخــاسـيره مـعـك عـندي غـنـيمـه
أنتـي الـفــارع بـقـد وجــد واسـمـاء وكنايـه
مـن عـشـق مـثلـك يجـوزمن الهوى وشـداد ريمــه
لـيه لا وانتي بحــسـنك فـي ذوات الـحــسـن آيــــه
لاذهـــب لامـاس لايـاقـوت لااحــجـارٍ كـريـمه
شـاعــرٍلــه مـع هـل الـرايات فـالـمـرقــاب رايـه
كـل مـاهــبّـت هــبوبك فـلّـهـا قـدروحــشـيـمـه
سـامـحـك مـن ألـف بـاء الـذنــب الى مـالا نـهـايه
واسـتباحك عـن خـطـاه وكـل طــقٍ بتعلـيـمـه
يـوم قـلـتـي أعـطـني حــرّيتـي أطــلـق يـدايـه
مـا ذخرعـن وجـهـك الا طـعـنتينٍ فـي صـمـيـمـه
سكر الخط
سكر الخط صبري وصل حده
او تراجع لو الخاطر كسرته
صرت تلعب بقلب منت قده
غربلته الليالي وانت بورته
عقب ذيك الموده صرت ضده
ولو تجاهلت حبك مانصرته
بين مزح الزمان وبين جده
لا قبلت الغرام ولا نفرته
كنت اقدر غلاك وكنت اوده
قبل ساعات لكني خسرته
حتما انسى الغلا لو بعد مده
وان ذكرته نسيته ماذكرته
شي عادي وسد الخط سده
يلعن الليل كان أني سهرته
ويلعن الحب ويلعن جد جده
انتهينا وسعيك ماشكرته
خطر غصن القنا
أنا .. أنا وأعوذ بك يارب من كلمة أنا
عبد وهبته من بديعات المواهب ماوهبت
آمنت بك وأسلمت لك أمري وأناوأنا وأنا
المنتهي كل أربعاء والمبتدي في كل سبت
أخاطب عقول الرجال الفاهمه وانا هنا
وان شاء ربي ثم أمرني ماتحاكيت وكذبت
أجمل نساء الارض غنت لي بصوت ((الله لنا))
وأنا الفقير اللي رزقه الله بمرعى كل نبت
طرقا عرض فستانها الازرق خطر غصن القنا
نازل على الوادي بنا يشرب وانا قبله شربت
حبيتها لين انفرط سلسالها بعد وعنا
وأبعدت عنها في حياتي كثر ماعنها قربت
قولوا لها يا أجمل نساء الارض ((أما آن لنا))
أن ننهي الحلم القديم ونكبت الغايات كبت
سديري وطاقية
كفى يا الأمير أرجوك يكفي كفا يا أمير
ترى الخال مايسمـع نصيحـة بناخيَـه
وترى يا طويل العمر ما عادني بصغير
كبـرت ودريـت بمـا عليَه..وماليَـه
وترى يا طويل العمر ما ينفع التفكيـر
على واحد ٍ ماله عن اللـي يبـي نيَـه
أقوله وأنا ياميـر مـا عادنـي ببخيـر
على بنت ٍ شيخ فـي عبايـه ملوكيـه
طموح ٍ على شاني وأنا شايم ٍ عن غير
هواها..ولا فكـرت فـي ذي ولا ذيَـه
وإلى هب نسناس الهوى للحزين عصير
وربط غترته من تحت حلقـه بأياديَـه
ويم بوجهه للهوا وقـم حومـة الطيـر
وتنهد..وون..وحـط ايديـه بمخابيَـه
تذكر ذعاذيع الهوا يـوم كـان صغيـر
يوم ان أكبر احلامه سديـري وطاقيـه
وقفَا وهو مابيـن واقـف وبيـن يسيـر
ووقف..من جديد وحط ايدينـه فأذانَيـه
بنت الشيوخ
بنت الشيوخ اللي يسمون العنـود
من كثرها يـا زيـن حتـى قلهـا
وان ذعذعت لي بالهوى مع كل نود
يا مل عينـي بالهـوى يـا ملهـا
البارحه هبت على صوت الرقـود
وأنا علـى ميعادهـا شفـقٍ لهـا
طرقا بهمستهـا تعدّينـي الحـدود
ميـر أحتـرم مقامهـا وجلـهـا
ما في مواريث الفهود إلا الفهـود
وأنـا مواريـد الـذيـاب أدلـهـا
النوخــــذه
العذر لويحسب على الرجل تقصير
فرضٍ ليا اخطا للرياجيل يبديه
وبعض الخطايا تحتملها المعاذير
وتدمح وتحسب شبه غلطه وتنبيه
وبعض الخطايا مالها اي تبرير
ولاعاد فيها لا لماذا ولا ليه؟
لكن على شان الرجال المناعير
يدمح خطا المخطي من الهيه للهيه
الا ليامن عادها عقب تحذير
واخطا علي بالعمد مالله بحاديه
واصبح بحلقي من حساب الزارير
وبذ الخفا واطغى غروره تماديه
آقف واضيع كل حشمه وتقدير
ومن قال ياضيدان؟ ماقلت لبيه
واجيه لو دونه جموع وطوابير
واسوي اللي ماتمنيت اسويه
واللي يصير يصير ويصير
لابو صبيٍ مايعادي معاديه
واهل النخل لوحسبوا للعصافير؟
ماتهيوا ماء بيرهم في سواقيه
والنوخذه لو ما احتمل للاعصاير؟
امداه لاقفى يقطع الياس راجيه
برج الــعاج
الـدلـو والـمـيـزان والـقــوس والـحــوت
مـاغـيـر بـــرج الـعــاج تـغــري وصـوفــه
وبـــرج بقـلـبـي بـــرج لـولــو ويـاقــوت
لا يـــا بـعــد بــــرج الـحـمــام ورفــوفــه
ما يسكنـه غيـرك مـن السيـف للكـوت
لــو ينتـحـي راس الـولــد عـــن كـتـوفـه
عــلــم وكــيــد بالـمـواثـيـق مـثــبــوت
مــا هــو عـــذر الـلــي يـفــرك كـفـوفـه
والله لا سـافـر لــك لــو ارجــع بتـابـوت
وانـا مــن الـلـي مــا ربــوا فــي مـروفـه
علـى الشقـا لاع الهـوى كـل شفلـوت
وانـتــي تلـوعـيـن الـحـشــا بـالـطـروفـه
والـوقــت للـجـاحـظ والايـــام هـــاروت
والقـلـب حـاتـم وانـتـي اغـلـى ضـيـوفـه
يــا مرحـبـا ترحيـبـة عـقـاب يـــا نـــوت
والـحــي يـلـحـق لـــو تـحــده ظــروفــه
صوتـك يكفينـي عـن الشـرب والـقـوت
وشـوفــك غـنـاتـي والـحـيـاه مخـلـوفـه
يااقوى من اللوعات واسخف من التوت
وابـلــغ مـــن الـبـيـت الاخـيــر وحـروفــه
رجـــل تنـاديـنـه ولا يـسـمـع الـصــوت
خـســارة سـمـعـه وصـوتــه وشــوفــه
ورجــل يضـمـك بـيـن ايـاديـه ويـمــوت
والله مــــا يـلـحــق حـيـاتــه حـسـوفــه
أضحى الضحى
أضحى الضحى وأنا على رجمٍ بديته من عصير
أدرى خواطر كايد العجمـان مـن منقودهـا
رجمٍ جنوبي طلعة العشّار شرق أبـو ظهيـر
غربٍ من الصرار والونان أشـوف حدودهـا
ومحمد بن سعود بن حثلين غير الناس غيـر
إمّيـزه ربـي خـوال وقـدهـا وقـدودهـا
حفيد من جابه معزي كنـه الـداب الضريـر
مع ابن لامي والدويش اللـي يقـود فهودهـا
عمود حمران النواظـر كلهـم قايـد مطيـر
يوم الفغم والسور حـراس البلـد وجنودهـا
وليت يا مسلـط
وليت يا مسلـط كريـم السبالـي
من هول بيتٍ يستحـق الزعامـه
بيتٍ تمنيتـه وهـو مـا ينالـي
ودامه خطف قبلي فلا لي ملامـه
انا اتهم انه خاطفـه مـن منالـي
في غفله كل غـرق فـي منامـه
لو كان وقتـي غرنـي عزتالـي
وغديت طير وهو الشبك والحمامه
وقت ٍ على كسابه الطيـب مالـي
يلعب بشيخان العرب لعـب دامـه
من اول تذرى خشـوم الجبالـي
واليوم يغني عن ذرا الضلع خامه
ومع كل ذا مـا جمعـت الريالـي
ويهون موتي دون جرح الكرامـه
واجود باليمنى وتجهـل شمالـي
وهبال مسلط يعطي الراس زعامه
حي مهبـول صامـل مـا يبالـي
ولا صاحي وقت الشدايـد هلامـه
الشعر بنت لبـو زيـد الهلالـي
وبيت مسلط يلوح بخدها كنه شامه
انأ اتهم انه ماخـذه مـن منامـي
في لحظه قلبي غرق فـي منامـه
في عبدالله شرفان
الا يالله من فضلك علينا
سجدنا لك سجود الشاكرينا
بعد ماالله نصرنا وانتصرنا
سلام الله علينا كلبينا
وسلام الله لبن شرفان واثني
سلامي عد ماحنا ثنينا
على ربعي محزمت القنازع
هل الفزعات لا باح الكنينا
كذا وقفاتنا وسلوم اهلنا
مواريث الجدود الاولينا
وليا من فاز ربعي ثلاثه
علي الشاهد الله ماعلينا
بعد مافاز خالد والبصيري
رقينا المجد وحنا قد رقينا
وليا من فاز ابن شرفان فزنا
وحنا كلبينا فايزينا
ياعبدالله ياعبدالله تفاخر
يليق المدح بك دنيا ودينا
وتفاخر الارض من مشيك عليها
وحنا نتفاخر بك لا خلينا
وانا سعودي ولي صوت كويتي
ولا يشكل علي ابن الذينا
سلام الله على كل القبايل
وعلى يام الكرام الاكرمينا
رديـّة مع الشاعر سلطان بن وسـّام
الهاجري
يامرحبا عد مالاح بارقها
بالصاحب اللي تعنى علشاني
كانه رفيقي على اللين والشده
كله علشان لاحي وليحاني
ضيدان
ياالهاجري بندقك لاتعلّقها
مادام في ديرة القوم عرجاني
واللي مع الهاجري مايقف ضده
كله علشان لاحي وليحاني
الهاجري
ياراعي الساعة اللي دقايقها
أطول من أيام غره وشعباني
بالله لاتحسب الوقت وتعدّه
كله علشان لاحي وليحاني
ضيدان
ياليت لك حلة ماتفارقها
مادام أنا وانت صربي وشيشاني
والحلف لابده يزول لابده
كله علشان لاحي وليحاني
الهاجري
أم الكبائر بعد شاب مفرقها
طبت على حيد ناري ودخاني
ضربة بلنتي وهجمات مرتده
كله علشان لاحي وليحاني
ضيدان
سلمت لحيتك لأحمد وحلّقها
الشغل مجان والموس مجاني
لكن لاترخي الحبل واشده
كله علشان لاحي وليحاني
الهاجري
ياملفق السالفة لاتلفقها
أرجوك لاتِزعل قبور جداني
والوقت قاسي والأوضاع مشتده
كله علشان لاحي وليحاني
ضيدان
وان شفت أنا القوم رزت بيارقها
وابي على نطحة القوم وصاني
أُقدم وكلٍ يوقف على حده
كله علشان لاحي وليحاني
الدور واحد وخمسين
البارحه في الدور واحد وخمسين
شبيت من راس الفتيل الزقاره
وكنيتها لين أمتلن الشرايين
لعلها تطفي لهيب الحراره
ولفتها والدمع في محجر العين
والدمع ماسال لكنه رهين الأشاره
أقرأ وأعيد الخط مره وثنتين
وأقول من صدرً تحطم عباره
لبيه يا سلطان لو نازح البين
يزوي سرابه ويتركز غباره
غربة حاديني من الفقر والدين
ماحد أبو عرام يجلب قشاره
ونصيت ربي ثم نصيت السلاطين
اللي تحفظ لكل رجل وقاره
ومن فضل رب البيت مابين عدين
بين أحمد وحمدان والعلم ساره
في فلةً في دبي ملكي ودورين
تعلم البدوان فن الحضاره
قدامها لنكن وكدلك ورنجين
وفي البر عزبة وفي المدينه عماره
وأن طعتني روح علي ياأحمر العين
بشت الغناة ولا بشوت الأماره
ومن لاعشق له وحدة من هل العين
عز الله أن باقي حياته خساره
ياوجودي
يا وجودي كل ما هـبّ نسـناس الشمـال
وجد من حدّه زمانه علـى اللـي مـا يبيـه..
ويا وجودي كلما اضحيـت ثـم مـال الظـلال
لا غفت عينـي ولا ذقـت شـي ٍ مشتهيـه...
وجد من قفّى وهْـو فـي رجـا كلمـة تعـال
وإلتفت من عقب ماْ اقفى ..ولا أحد ٍ لدّ فيه..!!!
ويا عذابي لا دنـا الليـل مـن روس الجبـال
وانتهى يوم ٍ من العمـر مـا عـاد أرتجيـه..
وانتي أبعد من سمـا الحلـم ووصالـك محـال
يا بعد من هلّ دمعي ضحـى الفرقـا عليـه..
يـا غناتـي لا تحسبيـن دمعـي يـوم ســال
ضعـف ولاّ خـوف ..ولاّ كـذا ولاّ كذيـه !!
والله إنـي مـن رجـال ٍ يضـدّون الـرجـال
لكن الحظ ّ الردي ..ساق دمعـي كـل أبيـه !!
ووالله إنـي كلـمـا دار حولـيـك الـجـدال
قمت كنّ الموت يشّـر علـى قبـرى بديـه !!
ووالله ان قد لي وانـا اصّـد لا جالـك مجـال
صدّة اللـي لا تضايـق تذكّـر قبـر أخيـه !
ومن سألني قلت مـدري..وإذا عـاد السـؤال
قلت له تكفى سؤالـك تـرى ماهـو وجيـه !!
وش تبيني اقول عن من ترى ذبحـي حـلال ؟
والخطا منها عليّ..صـرت أحبـه وأهتويـه!!
عذرها لو مـاْ تْعـذّر مثـل واضـرب مثـال..
واحد ٍ ما يعـرف الحـرّ الاشقـر يشتويـه !!
وان رجعناللـتـواصـيـف لله الـكــمــال
لاْ انتهـى ليـل المزاييـن جاتـك تبتـديـه !
كنّهـا غفـل ٍ مـع البـدو طاويهـا الحـيـال
مـا يميّـز وصفهـا إلا نبيـه ٍ مـن نبيـه.!!
وآهنـي اللـي وصلهـا وذاق مـن الــزلال
شربـة مـع غفلـة النـاس مـن فيهـا لفيـه
ياْ اول أحـلام الطفولـه علـى حـد ّ الخيـال
الرجى باللي حمى البيت مـن حملـة بريـه..
حال دونك سيف عنتـر وتاسـع حـول حـال
باْثر حول ٍ حال دونك وانا ادعى هيـه هيـه !!
هيه ياللي غـرّك الحسـن واطغـاك الجمـال
والله أني اموت ما شفت لأوصافـك شبيـه !!
لـو يسـام الحسـن والتيـه بجنيـه وريــال
ما بقى في سوق غيـرك ريـال ولا جنيـه !!
كيـف أهـدّك للمقاديـر وانتـي راس مـال؟؟
راس مال ومال..والمال ماْ يغطـي السفيـه !!
حافظك حفظي لعينـي ورمشـي لـك جـلال
وانتـي تْشحّيـن بالما..وانـا شفّـي مويـه !!
شايف ٍ ظلمـك وساكـت وطـال الليـل طـال
لا نويتي طعن قلبـي وانـا مـا قلـت ليـه...
لو بقـى للهيـل صبـر ٍ علـى فـوح الـدلال
ما بقـى للهيـل صبـرٍ علـى شـي ٍ يجيـه!!
وانتـي تْسوقيـن عقلـي علـى حـدّ الهبـال
تحسبين ان من بغى شي ..يقـدر يشتريـه !!!
ولاّ انا يـا وجـد حالـي وجـود ٍ مـا يقـال
وجد مـن ضحّـى بغاليـه لْرضـا والديـه...
ويا وجودي بأول العمـر قبـل ألبـس عقـال
وجد من باع آخر العمر ..في رغبـة ذويـه !!
ويا وجودي كل ما هـبّ صوتـك مـن شمـال
وجد من حدّه زمانه على اللي ما يـبيـه !!!
ضيدان بن راكان
سلام الله من ضيدان ابن منصور ابن قضعان
على ضيدان ابن راكان ابن ضيدان ابن حثلين
سلام الله سلام مايساق إلا على ضيدان
يليق بهيبته وجدوده الاقصين والادنين
سلام مايساق إلا لبيت امارة العجمان
لبيت ثايت ساسه وسوره مثل سور الصين
سلام عطره الكادي وريح المسك والريحان
تسوقه من هبايب خاطري يمنى وقلب وعين
سلام احلى من الما لا تدفق في ظما الظميان
واغر من الخزامى لا انثنت عقب اليسار..يمين
وارق من النسايم في عتيم الليل للسهران
والذ من المواصل واللقا مع هجعة السالين
على ذاك الامير الشامخ اللي للزعامة بان
سلام الله مابانت نجوم الليل للسارين
سلام ذعذعت به للولا والشكر والعرفان
ذعاذيع القصيد اللي تذعذع بين حين وحين
وانا شاعر ليا جات الحقايق واسخر القيفان
على صفحات ابو الطيب دروس أقلام طه حسين
وابذكر في قصيدي للفخر ضيدان ابن راكان
وابكتب له حروف من ذهب تبقى ليوم الدين
ابو خالد وريث المجد والتاريخ والصمان
وريث اهل الشدايد اللي عليه العلم الى ذالحين
ابو خالد ذرانا لا اختلف وجه الزمان وشان
لنا ذخر وذرى فالنايبات..وفـالقسى واللين
ذرى كل القبيله في ذرى الله ثم ذرى سلمان
ولد عبدالعزيز اللي ذراه يذري القاصين
ذرى نجد وذرى الشعب وذرى الدين وذرى ضيدان
عسى عمره طويل ابو فهد يا السامعين آمين
تحت ظله وسيفه قالها ضيدان بن قضعان
سلام الله على ضيدان بن راكان بن حثلين
الحجاج
ياصاحبي غابت على الشمس بأطراف النخيل
وامسيت اشوف الباسقات اللي تميل عذوقها
وانا على بشت حساوي..لا قصير ولا طويــل
والمزنه الغرا على راسي تلوح بروقهـــا
والعالم الله يدرك العطشان منهاسلسبيل
ولا يوقف يومه الموعــود قــبل يذوقهــا
ياصاحبي.ياناس.ياللي فوق.ياللوزن الثقيل
لد النظر للعالم اللي ماتبل حلوقهــا
والعمر مرة.والقلوب البيض ماتبغى دليل
والناس إذا طابت نواياها..تطيب وفوقهـا
لو كل من سمى{نبيل}يصير مثل اسمه{نبيل}
سميتها{ليلى}على ليلى..وانا معشوقهــا
كذا..كذا..يا(حرفة التمويه في نعش القتيل)
يا صاحبي غمض عيونك وادفنه في موقها
وانا تعبت من:{الحجاج السمح والكف البخيل}
ولاعاد عندي حل أعالجها واخيط فتوقها
صحيح أنا ممكن اسويها..واسوي المستحيل
لكن رجلي في هوى نفسي ماعــاد اسوقهــا
وشلون ابرر موقفي واجزا جميلك بالجميل
وانا يديني في فم الحيه..ورجلي فوقهــا
حنا بدو
يلي على وجهي قريتي كل صفحات الشقى
اقري وأنا باكتب قصيدة واشعـل الساحـة حريـق
باقي كثر ما راح واللي راح نصـف اللي بقى
وان ماوصلت لغايتي باموت في نصف الطريـق
يابنت يوم امطر غـلاك بقلـب ضيدان وسقى
تدرين وش سبة شقـاه وسبـة الجـرح العميـق ؟
شقاه من يمناه واسم الشيخ والنفس امحقى
والجرح منك ياأعذب العذبات يالموت الرقيـق
يا بنت ما دام البـدو تخلـف هقاوي من هقى
وانا بدوي مني يشيل من الزمن ما لا يطيـق
ابفتخـر حنـا بـدو نعشـق على وضح النقا
حنا بدو فينا الولد للقمة العليـا عشـيـق
حنا بدو فينا الولد لو شاف موته ماأتقى
حنا بدو فينا الولد يرقـا ولو ماله رفيـق
حنا بدو فينا الولد لا من رقا رقا رقا
الين يوصل غايتـه لـو كـان في قمة طويـق
يابنـت جيتـك والثمـن عمـري ابـي ليلـةٍ لقـا
يما كذا والا بلاش من الصداقـة والصديـق
وساعة تبسمتي وشفت الجمر والثلج اصدقا
قلت أشهد أن الموت حق وصحت لك صيحة غريق
واعتقت دمعي والزعل والحـزن لرضاك أعتقا
وأغفت عيوني في عيونك ياعساها ما تفيـق
وامنت باللـي سخـرك تقريـن صفحات الشقا
واشعلت بردي في دفاك وشبت الساحـة حريـق
البتول
يابسم الله على قلب البتول وحسنها الفتان
عليها ذكر ربي من قدمها لين هامتها
أسمي كل مامرت علي بأسم الله الرحمن
على من تجمع قلوب الأوادم في محبتها
لها القلب وغلاه ورحمته والشوق والتحنان
ملاك أبدع الرحمن في تركيب صورتها
وهبها الحسن من فضل ملايكته على الأنسان
عسا ربي يعديها العيون وشر نظرتها
عليها يشبهون أغلا الذهب واللول والمرجان
وهي ماتشبه إلا ماتشوفه في مرايتها
أنا لو شفتها مهره لها فوق السحاب عنان
متى ماهب ذعذاع النسيم تفل غرتها
ماشافوا المترفات أحلى وصوف شافها ضيدان
من الغيره عيون غمضت وعيون شافتها
يحق ألها التباها بالجدود وعودها الريان
وانا مالي حقوق إلا محبتها وضحكتها
محبتها حياة وبعدها عن ناظري حرمان
وش أسباب المحبه فالحياة إلا ابتسامتها
يا ذكر الله على وجه البتول وحسنها الفتان
يابسم الله عليها من ذكاها لي براءتها
هبايب نجد
ذعذعي يا هبايب نجد لاطاب نوم السالي
وانعشيني بريح من رضى نجد للشرقيه
رحمة الله نسناسك على غترتي وعقالي
كأنه الوصل والبيد شهباء والدير محميه
مرحبا يا هبايب ياهلا وان خطر في بالي
صاحبن مانساني مرحبا به على طاريه
يحسب اني نسيته وانجلا همي وغربالي
واثرني مانسيت اللي سبا بالهوى عانيه
وكل ماهب نسناس الغلا من ديار الغالي
هب في القلب من ريح الصبا عبرتن نجديه
وان جحدت الدموع من الملا آه واعزالي
وان غشتني دموعي لعنبا الحب والحنيه
والله اني صبور والبلا ياصرايم حالي
لاتذكرت دمع ماغبى لو جحد راعيه
واحدن ماجحد حبه ولا شمت العذالي
جاهر بالغلا حلو النبا من صفات النيه
كان ماله سوا تاج الحلا واسم جد وخالي
وصار بلقيس وفؤادي سبأ والحشا واديه
وله جموع تنادي بالولاء منتخبته الوالي
في خفوق حماه من الظبا واحرمه وسميه
ولي عيون تحدى وتخلى من كراه الحالي
كأنها تقول للنوم تهبى منت بكفو ليه
لي على الدنيا ثلاثين وكفاني
الله الواحد ولا الله ثاني
وحده عبد سجد قلب وعقيده
مومن يصبر ليا جار الزماني
في رجا اللي مدته تغني عبيده
وان تحداني زماني و احتداني
للدروب العوج والكف الزهيده
شمت عن باقي حياتي في ثواني
والجسد لابد ما للدنيا تبيده
ما خلقت اعيشها عيشة هواني
يا عسى روحي وروح ابي شهيده
ولا ياما روح الليل وسراني
و كم سريته غي و احلامي سعيده
و كم خذا مني الزمان و كم عطاني
و كم قصر يمناي عن شي اريده
ما سألته لو بعد جار و خذاني
الا عن عمر غدا وشلون اعيده
لي على الدنيا ثلاثين وكفاني
منها العشر الاخيرات الشديده
علمتني كيف اوقف ولا دهاني
ما دهى سعدون فعقاب وعضيده
علمتنني كيف لا ماتوا اخواني
و مات ابي و الكف ما تصفق وحيده
كيف اوقف و اتشهد في مكاني
و اثبت بيوم عسى الله ما يعيده
يوم لحق العلم الاول علم ثاني
والحق والحظ...الفقيده بالفقيده
آه من شي على قلبي كواني
لين وقف دم قلبي في وريده
والشجاع الي وطاه اللي وطاني
عزتي له لو بني عمي عبيده
يابني عمي عريبين المجاني
ياهل الوقفات والارياء السديدة
يا سلايل من يروون السناني
لا قدح حد الحديدة فالحديده
علموا السبع عن سهيل اليماني
الفريد اللي مطاليعه فريده
وعلمو اللي يحسبن ضيدان واني
يا عوينه كان ذا حده وجيده
وقولوا اني فالرفاع من الطماني
وكل درس من حياتي مستفيده
ان ثقل حمله فانا الهرش العماني
وان تربق فالقيود افك قيده
و علموا اللي لاصفت الايام جاني
وفالرخا يسوى ثلاثميه بديده
وان قست الايام شفته ما يداني
مترف ماله على الرمضا كببيده
وعلموا اللي يوم زانت له نساني
لا يحسب اني ليا من صحت ميده
يوم اصيح ...اصيح للي لا غشاني
نفحه منه تذكرت القصيده
وان تناوشت القلم والليل داني
ماغدا لي من شرايدها شريده
والله ان اغلى القصايد في كياني
فالملك عبدالعزيز ...وفي حفيده
الكريم اكرم كريمين اليماني
الشجاع اللي له امجاد تليده
الفعل هو عنتره والغيهباني
والكرم هو حاتمه وابن مهيده
ابلج من دون سياه الحساني
رايته عليا ونظراته بعيده
أذكره لا لفني الوقت وطواني
واعتزيت وكل قلب صار حيده
واتذكر لا قسى الوقت و رماني
في دروب التهلكه والدرب سيده
اتذكر بسمته و العمر فاني
وجود كفيه ومساعيه الحميده
ذاك ابو عبدالعزيز اللي كساني
بالجمايل من قديمات و جديده
أشهد انه قصرنا زين المباني
من حداه الوقت شوفه يوم عيده
درعنا اللي فوق الامتان امتحاني
ضافي هجل مقاضيبه جويده
وسبفنا اللي لا تولى الضد لاني
في نهار ياقف الضد لضديده
عدنا هداج لا اجدب كل ساني
كن مورادنا على جاله تزيده
الفخر للفيصلي ريف العواني
خالد اللي يكسب الطالات بيده
ياهل التاريخ جزلين المعاني
يالرجال اللي مصادركم وكيده
انشدوا منهو الحصان ابن الحصاني
ومن زعيم الطيب ولا من عميده
عن حفيد موحد الدوله وباني
مجدنا اللي باربعينه مستعيده
اشهد ان الجد شرف يوم باني
واشهد ان العود عقب له وليده
ياطويل العمر وقف لي تراني
كان ما وقفت لي طحت النضيده
موقفك ما هوب لفلان الفلاني
وعن مقام الذيب ما يغني وليده
بيض الله وجه من وقف عشاني
ساعه كل طرف بشته قعيده
والا انا لله شكري وامتناني
ثم ملكنا ثم حكومتنا الرشيده
سيدي يا سيدي لو كان اعاني
ما درت الاذن القريبه والبعيده
وان وصل صوتي لصقهان الاذاني
كيف اصب العلم فقلوب بليده ؟؟؟
في كتاب الاصفهاني للاغاني
خير مما في المجلة والجريده
و الشعر لو ما تحاكيته حكاني
موهبه من واحد يصدق وعيده
ان بغيت ادلعه قمت و زهاني
و ان بغيت أطوعه عمه و سيده
وان بغيت يقال : صح الله لساني
سعد من خالد على الدنيا رصيده
الطيـــر
( الطير موجها قصيده لضيدان )
ضيدان أنا أسمي دهام ما هوب فواز
أما أدعني يا دهام ولا بلاشي
ما هوب حق تغير أسمي بلا أرماز
وأنا عذاب الخرب لا أقبلت حاشي
(فرد عليه ضيدان قائلاً :)
لعيون بعض الناس سميت فواز
أسم يشابه لاسم صعب المناشي
اللي غلاه بثومة القلب حزاز
تقبل له طعوني وتقفي عطاشي
( فرد الطير :)
ما أرضى تسميني عليها ولا جاز
تغيير الإسم إلا بذبح الكباشي
إذبح تميمه وأقلب الإسم فواز
إذا ذبحت الكبش ما صار ماشي
( فرد ضيدان :)
قلت فواز تكفى فكني بالتلعواز
الحل عندي وأسمع العلم كاشي
لازم تشوف اللي لها القلب ينحاز
عقب (ن) تجي فواز ولا شلاشي
( قال الطير :)
يالله مشينا والعمر يبغي إنجاز
يا ما نجز بالهدي ولا عراشي
قم جهز اللي ذاخرينه وممتاز
وعلي الطلاق إن عزبته من معاشي
(وعنما وصلا الا التي سمي الطير عليها شال ضيدان البرقع عن الطير وقال له هذي اللي سميتك عليها )
( فقال الطير :)
أنا أشهد إني يابن قضعان فواز
واني بعد فواز جاني خراشي
ياحظ قلبك يوم في حبها حاز
كحيلة ما عاشرة كل لاشي
ياليتني رجلٍ لو أمشي بمعكاز
وأنخاك وأنخى مبعدين المعاشي
وأنهض لطيف الروح وأجلا لشيراز
وأقضي بقايا العمر ما أحتر جاشي
في شرع أبن حنبل بتأكيد ابن باز
معروف راعي الحب قلبه هشاشي
وأنا لوصل ملوع الشيخ معتاز
أعوز من فراق السبوق الرواشي
أبا أتمنى والتمني به الغاز
ياليت جنحاني لخلك فراشي
أو ليتني بيجر على الورك هزاز
ولا قلم بين الجسد والقماشي
الجادل
حببتي والقلم يشـره علـى أوراقـي
وأوراقي البيض للمشروه خضاعـه
خذت القلم والعيـون تخيـل براقـي
وأمطر قصيدي على صيفه ومرباعه
هلت سحايب قصيدي فايح اشواقـي
وانبت جمالك قصيدي باجمل انواعه
يامن جمالـه تعـدا هقـوة الهاقـي
خلا قصيدي على النفنـوف دراعـه
واقول للنـاس هـذي عـز ميثاقـي
اللي لها لين اموت السمع والطاعـه
الجادل اللي من اهل المستوى الراقي
رفيعـة الـذوق للمعلـوق مزاعـه
الله فرقها علـى زينـات الاخلاقـي
بيت الشرف بيتها وتعيـش برباعـه
بنت الترف واسم ابيها درعها الواقي
والخال شيخ يحوش الطيب بذراعـه
مـن ماكـر مالجابـه كـل نعاقـي
ماكر حرار تشوق العيـن طلاعـه
ريحانة في ظـلال وتحتهـا ساقـي
من دونها الموت والسلال واتباعـه
خذت من اوصاف يوسف كل ما لاقي
زعيمة الحسـن مياسـه وجزاعـه
ان اقبلت قلت ماتت لوعـة افراقـي
وان دبرت قلت عاش البين واوجاعه
ان اقبلت قلت ماتت لوعـة افراقـي
وان دبرت قلت عاش البين واوجاعه
وان وقفت وقفـن تلعـات الاعناقـي
وان عرضت من لمحها دق باصباعه
يخضع لها الراهب العاصي وينساقي
وقلوب الابطال منها شبـه مرتاعـه
حبيبتـي والغـلا ماعـاد ينطـاقـي
شرواي ماتدركـه فزعـاة فزاعـه
انتي مدار الفلـك وعيونـك افاقـي
وانا الذي عاش حبك باربع ارباعـه
لبيه...لبيـه يافـيـي ومشـراقـي
ياغلا غلا في حياتي يااثمن بضاعـه
يالذ من فرحتي بـك لحظـة عناقـي
قلب وهبته عيونك ترفض ارجاعـه
مدامني لك مليك وترفـض اعتاقـي
قلب يكسب الكنز عاش ومات ماباعه
حبيبتي والقلم يشرب مـن اعماقـي
عساي بينك وبين الشـر واطماعـه
لا يابعد عمري اللـي راح والباقـي
ياجعل يومي قبل يومك لو بساعـه
حفيد أبوبكر
راكب الي ماتجيبه بالبيد
ولايجيبه بهبهاني ولا وضيحي قطر
ادهم وسم الجميح على جنبه جديد
مهبل الي يوم عرض يحسبنه شفر
جمس شكمانين ملقبينه با الوليد
من سرابه ما يغبط القصيبي والجبر
كاتبين في ضمانه حديده ما يبيد
تمرة قاري عليها حفيد ابوبكر
كن وجهه لانطحته تشعشع يوم عيد
وانقفيته كنه السيل لاسال وحد
وان عرضلك في مزاياه من عنق الفريد
وان ركبته تحسب انك على سطح القمر
دقته نغمة عبادي على سلم فريد
لا عزف الاول وجاوب عاشر وتر
لاشتغل قالت شكامينه اركد يا حديد
والقزوز تقول للقاع روح يا فقر
كن شكمانه الايمن صدا عبد المجيد
وكن شكمانه الايسر صدا نايف صقر
والبلوف تقول للكهربه هل من مزيد
والسيور تقول للمروحه اين المفر
كل اغانيهم على درب واصل يا عنيد
لين تلفي قصر شيخ العليا شهر
سايقه من صلب ربعي وله باس شديد
ما يخاف البعد والليل والموت الحمر
من صناديد ال عرجا هل العلم الوكيد
لابة من جن تمشي على هيئة بشر
لبــــا عيـــونك
لبا عيونك ولبا خدك وخاله
ولبا المحيا ولبا الليل والشفه
فديت عمرك بتجريحه وغرباله
لوتشربه الارض غبره والبحر جفه
هلي كما البدر غيضي كل حفاله
وسجي عن الليل لايلهيك في صفه
وهزي على صوت رجف القلب وهباله
الطار قلبي وكف توجعه شفه
ياشفه العين قبل تجين جماله
وجيتي ولاشفت غيرك لو رفع كفه
كنك لحالك حضرتي الحفل في الصاله
ولاشفت غيرك بشر ياقمه العفه
انتي زعيم رفع للقوم فنجاله
وكل تعذرشروبه ليله الزفه
انتي بيمني الحلا والناس بشماله
ثقيله العقل فيك الدم ياخفه
احيي فقيد بغيت ابكي على اطلاله
في غيرك يموت لو احييه وازفه
وان عودت للغلا غلاك بلحاله
انتي بكفه وباقي الناس في كفه
ياباشة الروم
يا باشة الروم لا تطلع على متني
اطلع على متون رومك وانت شرواها
انا مسير فقط والرجل جابتني
من دار حكام نجد اللـي انـت بحماهـا
يما اكرم الضيف باول فوح لا يثني
والا اترك الداب وشجرته ودعواهـا
لو ادرى مجلسك والبرد بيتني
ماني مـن ربعـك اللـي تفهـم لغاهـا
جعلك فدا وقفتي لو جلستي حتني
وحبة خشم وانت قاعد جعلك فداهـا
مابيع نفسي لو الايـام باعتنـي
ولا جيـت ادور الإهانـه واتمناهـا
الحاجه اللي على شرواك حدتني
والا انت مانت بقد النفس ورضاهـا
ياللي على دارة الأقدار ساقتني
ميـز هديـر الجمـال وميـز رغاهـا
بداية الدرب عن تاليه كفتني
بشعب ذلولـي عشـاه يطيـب مسراهـا
من يوم شفتك الامام وتشرب التتني
حرمة اصلي ورا اللي تجلد لحاها
انعست عين الغلا
انعست عين الغلا والهوى هدا
خانت الايام والملح والعشره
وابتديت تشوف نفسك وتتحدا
وأنت ماكنت تتغلى ولا تشره
كنت مجروحي وصرت الدوا والدا
كنت آآه صرت آآهات منتشره
غلطة اللي بالمحبه أخذ وأدا
واعترف لك بالغلا وابصمت عشره
الهوى جاب الغلا والهوى ودا
وأنت وجروح الزمن بالحشا خشره
يابعد من مابعد جا ومن هدا
ويابعد من ساج روض الحشا نشره
يوم صار الحب جزيه ولك تدا
والقصيد اسهل من كتابته نشره
خذ قصيدي ياشذا الورد لاندا
وأنتبه لي واستمع موجز النشره
والله أنك بالغلا فارق جدا
مثل فرق الابتسامه عن الكشره
يــمــر القلــــب
يمر القلب من دار وراء الخفجي طريق ودرب
وامرك يالطريق اللي لك اقدامي مصخرها
واذا مريت مع ذاك الطريق اللي يجي من غرب
ذكرت أحلى ليالينا من اولها لـآخرها
ومريت الحشى بالونه اللي ماجذبها طرب
ومريت العيون بعبرتن للدرب ذاخرها
وشفتك في خيالي بين طيات الدفى والقرب
وناديتك فديتك خل ايدينك لا توخرها
عفى الله من ظميان حصل الماء في الطريق وشرب
وعفى الله عن ليالي ماجهلنا في اواخرها
عقلنا وألتطم حب المواجه يالعفيف الذرب
كما موج لطم في غبة واغرق بواخرها
وسقت الرجل صوبك ياحبيبي والليالي جرب
ولا اهتميت في ناس تبي ترفع مناخرها
حبيبك ياحبيبي من سلالة اهل دروع وحرب
ولايعشق من اصناف الجواهر كود فاخرها
تفاخر يابعد من حطله بين الحنايا درب
تفاخر وأفتخر واغلى القصايد فيك اصخرها
واذا مريت مع ذاك الطريق اللي يجي من غرب
تذكرت احلى ليالينا من اولها لـآخرها
وتقبلوا تحياتي
منقول للفائدة
التميز
الإهداءات
مجموعة قصائد ضيدان بن قضعان الصوتية
