أسعدكم الله جميعا بكل مكان وزمان
لا أخفيكم خبرا مرجانة زعلتني وخلاص بنقض العهد اللي بيني وبينها
ما عاد بنزل قصيدة كل يوم يكفيها كل اسبوع ولو زودتها بعاقبها كل سنة قصيدة
وإن تمادت اعتزلت الشعر وخليتها بدون شاعر
ههههههه
المهم اليكم هالأبيات ترضية وطيبة خاطر
علها تروق لكم وإلا مرجانة أعرف سلفا ما بتروق لها
ما بقى من لهيب الشوق غير الجمر=دافنه تحت كومة من بقايا رماد
عقب قفى شريكي بالهوى والعُمر=كل الألوان صارت في عيوني سواد
عافت النفس للمتعة بليل السمر=لو عيني معاندها لذيذ الرقاد
يسري الليل كله كيف جاني ومر=ما شعرت بوجوده كن قلبي جماد
الهوى مات والمدفن بجوف الصدر=دافنه في خفوقي لين يوم المعاد
عاش به لين مات وصار قلبي قبر=ما تحقق طموح ولا تحقق مراد
يا غرام السنين اللي ضناني دهر=شفت وشلون تالي غيبتك والبعاد
مكسبي من زماني ياغرامي قهر=ما نفعني تفاني فيك وإلا حياد
ضعت تالي سنيني في جحيم الصبر=أتجرع لمره بالضحى والهجاد
بعت للمر من عمري لما هو أمر=فات حلو السنين وما مضى لا يعاد
سنة الله بخلقه في جميع البشر=المقادير تجري فوق كل العباد
الله اللي مسيرني بحكم القدر=راضي بحكم ربي ما كتب لي وأراد
أتسلى بشعري والبقا بالشعر=العوض في لحونه زمهرير وبراد
ما بقى من لهيب الشوق غير الجمر=دافنه تحت كومة من بقايا رماد
التميز
الإهداءات
بقايا رماد !!!
رد: يقايا رماد !!!
