أسعدكم الله
اليكم الأبيات
لا عاد وقتٍ(ن)بعد الولف لا عاد=الحال من بعده من الهم نازل
حاولت نسيان الهوى والشقا زاد=مالك ومال طوالها والمجادل
لو تتعبين الروح يابنت الأجواد=ما عاد أنا عن حبكِ(ي)بمتنازل
بنظم قصيدي فيك وأرد الأنشاد=وليا غزاني ساحر الطيف أغازل
الحب ما يقتله بالروح الابعاد=دامه على ما قيل تحصيل حاصل
كنه بجوف الصدر زلزال رعاد=ترجف ضلوعي منه والعود ناحل
ما عاد لي فاقه بشربٍ(ن)ولا زاد=والنفس وقفت عن حضور المحافل
دام الحبيب اللي ملك خافقي ناد=ماني عن أطيافه ولو ناد غافل
بسامر لطيفه ولو كان ما فاد=والجأ بظل الصبر عند النوازل
عله يجي بالصدف وإلا بميعاد=لو كان بأخر يوم يا أهل القوافل
وإن كان عيا الحظ بالوقت ينقاد=وإلا انقطع منه الرجا والتواصل
بقضي بقايا العمر مايشبه جماد=من بعد كنت بيوم ضمن البواسل
وإن كان حظي جاد وحبيبي جاد=بقضي بقايا العمر بليا فواصل
مع ولفي اللي صار لي سيد أسياد=القلب بيته دون كل المنازل
نهار حبيته ترى عيد ميلاد=هواه جوف القلب طاقة مفاعل
فرحة هواه أجمل من أفراح الأعياد=والحس مثل الجسم فيه المفاصل
لكن حداه البعد والبعد لا عاد=من عقب غاب الحال والحظ نازل
التميز
الإهداءات
لا عاد وقت بعد الولف لا عاد !!!
رد: لا عاد وقت بعد الولف لا عاد !!!
