طابت أوقاتكم
الأبيات كالعادة بدون مقدمات
...........
يالله تعوض فالخساير بالأرباح=خسارتي ماهي رصيد المصارف
خسارتي يارب دم الحشا فاح=بأسباب غيدا كن ما غيرها شـاف
راحت لكن الحب موجود ما راح=كل ما هدا عرج على القلب عاصف
يشعل لنار الشوق والشوق ذباح=لا من ذكرت لزينها والسوالف
خلت فوادي مغلق بدون مفتاح=ما عاد يقبل من بعدها موالف
خلف الضلوع ليا ذكر صاحبي ناح=والعين عيت لا تهل الذوارف
أذكر غلاها كل ممسى ومسراح=قلبي على ذكرى غلا الروح عاكف
عدة سنين السر مكتوم ما إنباح=يحرسه قلبي في جميع المواقف
ما غيرت قلبي جميلات وملاح=غرامها بالقلب يعجز لواصف
ما عاد يغري ناظري بارقٍ(ن)لاح=ولا عاد جوي يعتدل بالطوارف
إن قلت أنا مرتاح ماني بمرتاح=في داخلي بركان من لهف جارف
كل الكفوف الباذلة عندي شحاح=لو أجزلت بالمد عمد ومصادف
ما أريد غيره سكري فيه قد ماح=لو ضامني بعده فلا زلت واقف
الرأس شامخ فوق والعزم ما طاح=شامخ شموخ طويق فوق المشارف
ثاقب بصيرة بالبديهات لماح=لو كان عودي يشبه الرمح ناشف
للكايدات ليا دعى الأمر نطاح=اللي يسد بلازمي دوم طارف
ماني سنافيٍ(ن)مزاياه مسباح=وإلا شورديٍ(ن)رباية مكالف
يالله تعوض فالخساير بالأرباح=خسارتي ماهي رصيد المصارف
التميز
الإهداءات
قلبي على ذكرى غلا الروح عاكف !!!
رد: قلبي على ذكرى غلا الروح عاكف !!!
