أسعدكم الله بكل خير
الأبيات مثل ما جات أهديها لكم وطاب مساؤكم
ياحلاة الجو في هذا المسيه=يسعد اللي بالهوى مسعد مسايا
نيته وحده ولا له الف نيه=بالعذارى كلهن ماله حلايا
الله إنه يحفظك من كل سيه=يا شبيه البدر في عالي سمايا
يا حسين الوصف في كل البريه=يا رفيع الذوق يازين النوايا
يا حلاة الهرج من ذيك الشفيه=ويا حلاة لبيض من خلف الشفايا
أخذت لقلبي هنيه يا هنيه=يا عساه فداك يا عذب السجايا
أنت تستاهل لحبي ما عليه=فيك يا عذب اللما كل المزايا
جاك مني ما خذيته بالسريه=وما منعته عنك بجنود وسرايا
كل ما قدمت لك مني شويه=منك لجروح الهوى بأخذ دوايا
من بعدها كل عرقٍ(ن)حي فيه=من هواك مسويٍ(ن)فيني سوايا
ما يكيف بالهوى غير بدويه=ما تخاف الناس وتهاب المنايا
دام عز اللي لها روحي شفيه=من كرمها دزت بغال العطايا
ارسلت لي قلبها قالت:هديه=ما درت اني لها كلي هدايا
يا هلابك يا هدايا اليعربيه=مدةٍ(ن)جزلة من كفوفٍ(ن)ندايا
لو بغيت أجزاك راع الأوليه=قالت الأمثال ما تلحقه المطايا
مير بكتب فيك شعري ياسويه=وأرسمك بسمات في وجه المرايا
يا طموح الروح في صبح وعشيه=وين مغدي طيفك الساحر معايا
صرت انا المجنون وأنتي عامريه=ياعسى كل النساء لأجلك فدايا
ياغرام الروح يالنفس الزكيه=عهد حبك لحفظه بين الحنايا
ما يفرقنا يقع سهم المنيه=يا مناة الروح يا كامل غلايا
ما بقا من عمر لعيونك فديه=ما تبعدنا مسافات ونحايا
ياحلاة الجو في هذا المسيه=يسعد اللي بالهوى مسعد مسايا
التميز
الإهداءات
ما يكيف بالهوى غير بدويه !!!
رد: ما يكيف بالهوى غير بدويه !!!
