الله مـن فكـرٍ تعـكـر مـزاجـه=اصبح بغبات الهواجيـس ممـزوج
كن الضلوع العـوج فيهـا انفراجـه=اونس لضى جمر الغضى داخل العوج
جـرحٍ عطيـب وماتيسـر علاجـه=لاحسنـي ودي مـع افكـاري ادوج
ودي بقفـرٍ مابعـد حـي داجــه=من خلقته محمي ولاهـوب مديـوج
تعبت مـن وقـتٍ تطايـر عجاجـه=مهما تحاول فيـه مامنـه منتـوج
مافيـه غيـر المعمعـه واللجاجـه=بابه على زيف الحضارات مفجـوج
الحـر طـار وجـا مكانـه دجاجـه=ماعاد تفرق بيـن عاقـل ومرجـوج
العقـل نعمـه والسماجـه سماجـه=ياشينهـا لاقالـوا النـاس ملبـوج
كـلٍٍ علـى عرفـه يـدور خراجـه=راضي بتفكيره ولاهـوب مزعـوج
شجاعـة الرجـال وقـت المواجـه=تبين لو وجهه من السيف مشجـوج
ياكثر من لاجـاك يرقـص حجاجـه=ولااقفى حصانه بالقفى دوم مسروج
للحـق طـلابٍ يـولـع سـراجـه=واللي بطل باطل ولو طـول يمـوج
لليـل جنـح وللصبـاح انبـلاجـه=تـداول مابيـن عالـج ومعـلـوج
ماعاد لـي بمقـرد الخلـق حاجـه=بيني وبين المهزلـه بـاب مزلـوج
هذا هـوى فكـري وهـذا مزاجـه=لاصرت في وسط الهواجيس ممزوج
الشاعر المبدع: عبدالله المرشدي
التميز
الإهداءات
الحـر طـار وجـا مكانـه دجاجـه..؟؟؟
