قصيدة من الأرشيف
القلب يا عذال لو تعذلونه=ماهو بطايعكم بمشهاه مغموس
لاتزعجون القلب لا تزعجونه=كافيه ما هو فيه من هم وهجوس
الهم ساكن فيه والهجس دونه=ينخر بحالي مثل ما ينخر السوس
يالله بعون القلب يالله بعونه=الخافق اللي خلف الأضلاع محبوس
مرتج فيه من الليالي غبونه=من عقب فرقا صاحبه صار متعوس
ما عاد حالي يعجب اليوم لونه=ما كني إلا بالعٍ(ن)يا بشر موس
أون ون اللي يعاني مهونه=غديت مثل البن بالنار محموس
القلب يرعد والأيادي تخونه=عجزت تطول اللي نهب عقل ونفوس
أواه يا قلبٍ(ن)تحوفه جنونه=أثر الهوى يا مشغل الروح كابوس
عقب لعقلي خلةٍ(ن)من فنونه=اللي يلونها على حلم مدسوس
وأثر الهوى ما يندفع بالمعونه=ولا ينفع بدفعه رشتات ودروس
اللي وراه يحول يا ناس دونه=ما كنه إلا رمح بالصدر مغروس
جربت طعناته وعارف طعونه=قلبي من اللوعات والشوق مفروس
الليل اباته ساهرٍ(ن)من شجونه=حتى غديت من السهر مثل دبوس
واللي أبيه النوم حارب عيونه=وده مثل ودي ولكن مريوس
دونه حوادي خيبت له ظنونه=لو تنمنع منعتها عنه بفلوس
الحظ لا من شأن تكبر ديونه=ما ينحدي كنه على سير وتروس
ما عادت ظروف الليالي حنونه=الحظ مقفي دق بالسمع ناقوس
هذا قصيدي واضحاتٍ(ن)لحونه=مثل الغصون اللي من الورد ويبوس
بانت معاناته وبانت حزونه=متعوس لو علق على الباب فانوس
القلب يا عذال لو تعذلونه=ماهو بطايعكم بمشهاه مغموس
التميز
الإهداءات
حلم مدسوس !!!
رد: حلم مدسوس !!!
