طابت أوقاتكم
الأبيات كالعادة بدون مقدمات
يا عين وشبك ما تحسين بنعاس=راسي تجافا عن نعومة مخدته
الليله أنا حافني سهد وعماس=بالصدر علمٍ(ن)طير النوم لهدته
لا بأس يا صدري من الضيق لا بأس=والله يعين اللي لياليه حدته
جنس البشر واحد ولو صاروا أجناس=دنيا البنادم زايله لو بدته
محدٍ(ن)يعيش إلا بدمه والأنفاس=وباقي حواله لو يقلن سـدته
مهما شكى من قل وإلا من اليأس=من لا صبر كثر الغرابيل جدته
سود الليالي مالها حد وقياس=ياكم شامخ غبر الأيام هدته
شكواي ماهي قل باليد وإفلاس=ولاني بمنهو تحقر الناس مدته
أنا احمد الله جاني العرف من ساس=من صد عني ما ترجيت لدته
انا بلاي اللي مثل نادر الماس=مقدر على بعده ولا احب صدته
غيره ترى ما شاقني زين واحساس=لو جابته دنياه بالحال ردته
ماني بمرخص غالي النفس للناس=منهو تغلى ما طلبت لمودته
بعيش حر ورافعٍ(ن)عالي الراس=واللي جفانا غبر الأيام ودته
من لا يدوس الراي بالراي ينداس=ومن ضيع لجده يعود لجدته
البوم ما يخر من الطير قرناس=الحر معروفٍ(ن)بعينه وهدته
السيف فعله غير ما يشبه الفاس=كله حديد وفرق سعره بحدته
لا من تناصوا فوق صلفات الأفراس=حدب السيوف اللي تلاقيه قدته
لكن بسهر وأضرب أخماس بأسداس=ليلي بهمي قد كساني ببردته
يا عين هذا سر ما جالك نعاس=وراسي تجافا عن نعومة مخدته
التميز
الإهداءات
الليله أنا حافني سهد وعماس !!!
رد: الليله أنا حافني سهد وعماس !!!
