الذكريــــات !!!

أسعدكم الله


رحل بي شريط الذكريات الى زمان فات

فإقتطفت لكم بعضا من جوانبه دون الغوص بأعماقه

اليكم هذه الأبيات علها تروق لكم

يافيصل تجهز قوم شغل لي الجكس=على بال ما أقعد صلفتي من وجاري
على تكوة الدلة قبل طلعة الشمس=طرا لي من الهوجاس مليون طاري
شريط الفكر منلف كنه على ترس=ياسرعه على ماض السنين استداري
تذكرت عمرٍ(ن)فات ماكنه الا أمس=زمن وإنطوى في سرع ماني بداري
تذكرت للأصحاب في قاعة الدرس=وتذكرت شرح أشياء ذكرها البخاري
تذكرت باب الريع والهاف والبقس=تذكرت ظلمة ليلنا والغداري
قبل لا نعرف الرنج والفكس والجمس=بوقتٍ(ن)غريبة فيه حس البواري
تذكرت فرحتنا على العيد باللبس=وتذكرت سطوتنا بليل ومساري
تذكرت بعض الناس وثويبه المرس=لكنه سواة النمر بين الضواري
تذكرت يوم الصقر ما صاحب النمس=تذكرت يوم إن الحباري حباري
تذكرت رفقتنا فدا النفس للنفس=قبل لا تفرقنا بيوع ومشاري
تذكرت فزعتنا لمظلوم بالحبس=نعين الذي تجري عليه الجواري
تذكرت يوم الراي ما يتجه عكس=تذكرت حشمتنا لكل الكباري
تذكرت قبل الذئب يغدي كما البس=تذكرت قبل يشيخ ناسٍ(ن)صغاري
تذكرت يوم الزين ماخالط النجس=زمان التباهي بالرمي والسواري
تذكرت يوم الناس ما تعرف النحس=زمان التصافي مثل جو البراري
تذكرت يوم البدو للماطر تعس=تقافا الظعون لدار فيها خضاري
تذكرت يوم علاجنا للوجع فكس=قبل لا نعرف لمختبر وإستشاري
تذكرت يوم أروحنا حيه تحس=نعرف الخطأ ونشيم قبل الزواري
على تكوة الدلة قبل طلعة الشمس=طرا لي من الهوجاس مليون طاري

عبق الماضي وماادراك ماعبق الماضي شي جميل ان يتذكر الانسان شريط الذكريات فيحن لماضيه ويود لو انه يعود وهيهات ان يعود ولكن الذكريات هي التي تبقى فالذاكره فشاعرنا جزاه الله خيرا حلق بنا في محيط الذكريات وذكرنا بما فات فلله درك ياابا حازم نظمت فابدعت وتذكرت فاجزلت لك خالص تقديري ومحبتي واعجابي

صح لسانك مليون يازين الماضي ويازين الذكريات . القديمه لها طعم خاص يشهد الله . بيض الله وجهك.






تقديري لك..+تقييمي

صح لسانك



قصيدة تستحق الاشادة

صح لسانك مدد ماهو عدد





تقبل التحية

صح لسانك مليون ولا يكفون







وفقك الله

صح لسانك للرضا ابداع لا هنت تقديري لك

الله الله



ابداع شاعر وصوت شاعر لله دركما



تقديري لكم

لله درك


قصيدة اصيلة من راع الاصالة


صح لسانك وبيض الله وجهك

لله درك



قصيدة تستحق ان تكتب بماء الذهب