سالفة عمري
مسا الخيرات وإن طال البطا يا المنزل المجهور @@@ ترا ما ابطابي حالة مثلك يقدرها
إذا عندك عتب لا مانع من معاتب المذكور @@@ و إذا عز الرضا تفداك الاعذار ومقابرها
انا اللي جيتك والريح تعوي والشتا مسعور @@@ ولا به من دفا والمربعانية بواخرها
تغير وانطبع دربك بلون المسك والكافور @@@ وهذي رعشة كفوفي ولابه من يدثرها
بعد ما كنت اجي بابك بدستور وبلا دستور @@@ ولا ادري الا وذيك الدرفة اليمنى على اخرها
طموحي عارضتة اللي معاها كل شي يبور @@@ وجا كسر الطموح علي اهون من كسر خاطرها
سنة ما اقبل نذير الشيب كانت باول الطابور @@@ وكنت احلامها ذيك السنة واول سرايرها
لقت قدامها فوضى وقلب وشاعر وجمهور @@@ وجات ورتبتلي من جديد وصرت شاعرها
بقيت اسريلها لا همني وحشة ولا ديجور @@@ اشيل احلامنا تحت النجوم وهي تفسرها
سقا الله يوم جابتلي قبل يومين من عاشور @@@ هذاك العسجد اللي جابه الله من عشايرها
غلاها كان تحويشة عمر بشعور فوق شعور @@@ الين اقضت الاشواق و الهاني تكاثرها
ربت ماهي تحت ريشة نعام وفي بلاط قصور @@@ ولكن لا ترفة قيمة الا تحت اوامرها
يحملن امهات البيض تسع شهور تسع شهور @@@ على رجوى بشايرها ولا لاحت بشايرها
تقول بدر ولا بايات بدر تقول بدر بدور @@@ ولا بايات بدر بدور يعني منت خابرها
لو استقصوك عنها منت محتاج لشهادة زور @@@ تحت سقفك سحايب ملحها وامواج سكرها
مرق المتحف اللي من ورا ضلوعك فدتك الدور @@@ وانا مقدر نظر فية بعد غياب ناظرها
حديقة بيت اهلها سورها العالي حمام السور @@@ زخارف بابها شباك غرفتها ستايرها
ورق جدرانها سجادها تقسيمة الديكور @@@ خزاينها هداياها رسايلها خواطرها
تحفها مزهريتها قصصها شعرها المكسور @@@ صورها مكتبتها اقلامها لمة دفاترها
زمام السيف شال الليل حن الكف كحل الحور @@@ حلقها عطرها فستانها الابيض جواهرها
مرايتها فصوص الساعة البيضا ام خمس سيور @@@ خواتمها قلايد جيدها نقشات اساورها
ملابسها بروق الوانها دولابها الممطورو @@@ من ازرقها الى احمرها الى اخضرها الى اصفرها
نسانيس الهوا اللي ترتشف يشمومها المنثور @@@ سخيفات المناديل اللي احتضنت عبايرها
مصابيح النهار اللي خذا منها النهار النور @@@ سنون امشاطها اللي ما نست عشرة ضفايرها
بطاقات يطرزها صغار يحملون زهور @@@ رحيل الدبلة اللي ما تهنت في خناصرها
زوايا كنها بلور في بلور في بلور @@@ مسار ازنامة غاب الحرير اللي يغيرها
وش اقول ليتامها الكثير اللي ممتلين كسور @@@ وانا اشياها تحاصرني واحسب اني محاصرها
بكيت وصارت الدنيا قفص واستوحش العصفور @@@ ضحكت وملت شبوك القفص من كذب طايرها
عرفت اشلون الارض تدور وايام الزمان تدور @@@ والاعيان ان صفت كيف ومتى تذبح محاجرها
ومتى تصير القبور بيوت وتصير البيوت قبور @@@ وكيف الذكريات تذوب ماضيها بحاضرها
على الله وان تبيك المتحف اللي للعرب معذور @@@ الى جتك العيون وصدت ابوابك نواضرها
تمر اجيال وتصدر سواليف وتعيش عصور @@@ وتروي سالفة عمري من اولها الى اخرها
-------------
التميز
الإهداءات
سالفة عمري
