يحيا العدل
(القاضي والأمير)
تأليف :مجدي الحمزاوي
الجزء الثاني
المشهد السابع
الفتاة أنا مش عارفة أنا كنش مشدودة ليه وأنا باعمل الدور ده..حسية إنه جايز يوصل لحكاية حسن.. أمال المؤلف حاطط ده وسط ده ليه.. حاجة تلخبط.. المهم القاضي العز بن عبد السلام ومش القاضي الأمير,هو ومندوب السلطان رجعوا تاني ودخلوا الجلسة(تتحرك لتأخذ مكانها كعزة في المشهد)
العز (لرجل 4) يعنى أنت شفت حسن وهو بيدافع عن عزة,وكمان شفتهم وهم بيرفعوا السيوف عليه؟يعنى كان بيدافع عن نفسه في نظرك؟
مرزوق أيوه يا فضيلة القاضي
العز طيب ومارحتش قصر الوالي ليه عشان تشهد باللي حصل؟
مرزوق رحت
العز وبعدين؟
مرزوق ضربوني
العز ضربوك؟
مرزوق أيوه لما قلت لهم إن حسن مش غلطان وإنه كان بيدافع عن نفسه جه حارس من جوه( يلتفت حوله ويلمح أحد الحراس ويشير إليه) الحارس ده جه ونادى على اتنين كمان وضربوني وقالوا لي لو رجعت تاني أو قلت الكلام ده لحد حندخلك السجن
العز (للحارس المشار إليه) تعالى هنا
الحارس (ينظر إلى كبير الشرطة الذي يشير إليه بالذهاب فيذهب)
العز إنت ضربت الراجل ده؟
الحارس (يتردد)
العز انطق.. انت ضربت الراجل ده؟
الحارس أيوه
العز ليه؟
الحارس الأوامر
العز أوامر مين؟
الحارس (بخوف)كبير الشرطة
ك الشرطة يا كداب يا حقير.. أنا أمرتك بحاجة زي دي؟ ياله غور من هنا وأنا حعرف شغلي معاك
العز (لمندوب السلطان) يا صاحب العزة أنا باطلب إن ما حدش يدي أوامر هنا غيري
م السلطان (لكبير الشرطة والأمير) سامعين
ك الشركة والأمير_ أيوه يا صاحب العزة
العز مين حضر لما عساكر الأمير جم يقبضوا على حسن؟
مرزوق أنا كنت موجود
3 وأنا كمان يا فضيلة القاضي
العز شفتوا إيه؟
مرزوق العساكر جات قبضت على حسن وعملوا دايرة حوالين القتلى وماحدش قرب ناحيتهم, وواحد منهم مشي.. بعدين رجع معاه الأمير وكبير الشرطة
العز الأمير وكبير الشرطة؟
3 أيوه
العز وبعدين
3 من بين فتحة في صف العساكر لقيت الأمير بيقلب فيهم أو يعاين الله أعلم.. وبعدين خد نفسه ومشى
العز بس كده؟
مرزوق فيه حاجة كمان
العز إيه
مرزوق الأمير خد حاجة من بين هدومهم
العز حاجة زي إيه؟
مرزوق حاجة كده زي صرة أو شكارة لونها ابيض
العز (للأمير) إيه الحاجة دي؟
الأمير لا حاجة ولا محتاجة ده بيخرف
العز دفنتم الجثث فين؟
الأمير (يصمت)
العز دفنتم جثث الأغراب فين؟
الأمير اصل يا فضيلة القاضي
مرزوق دول ما اندفنوش هنا
العز بتقول إيه؟
مرزوق دول مااندفنوش هنا..كبير الشرطة أمر إنهم يتلفوا كويس وبعدين عربية جت خدتهم ومشت
م السلطان اسمح لي بالانصراف يا مولانا(للأمير) كل السلطات في إيد فضيلة القاضي(ينصرف)
مرزوق عربية من عربيات الأمير
العز (للأمير) راحوا فين؟
الأمير لا.. أنا قلت مادام أغراب يندفنوا في حتة بعيد
العز (لعلي همسا) شوف سواق العربية, حاول توصل له واتحفظ عليه لغاية ما أطلبه منك
علي أمرك(ينصرف)
العز (للأمير) يندفنوا بعيد..كويس.. واندفنوا فين؟
الأمير أنا قلت للتباع يدفنوهم في الصحرا
العز الصحرا
الأمير أيوه يا مولانا
العز وليه التصرف ده؟..مش كان ممكن تدفنهم هنا؟
الأمير أيوه..بس
العز (لكبير الشرطة) تعالى هنا
ك الشرطة مين أول واحد شاف حسن وهو ميت؟
ك الشرطة حارس السجن يا مولانا
العز هاته لي هنا
ك الشرطة حاضر يا مولانا ( يوشك أن ينصرف 9
العز استنى...استنى
ك الشرطة أي أوامر تانية يا مولانا؟
العز مين المسئول عن السجن؟
ك الشرطة السجن له قائد يا مولانا
العز (للأمير) ممكن ورقة منك عشان نحضر حارس الزنزانة وقائد السجن؟
ك الشرطة حاروح أنا يا مولانا
العز لا ..خليك هنا معانا( للأمير) بسرعة لو سمحت
الأمير حاضر يا مولانا(يشير لأحد الحجاب فيتقدم ويعطيه ورقة , الحاجب ينصرف)
العز إيه هي الحاجة اللي أخدتها من هدوم الأغراب.
الأمير حاجة إيه؟
العز اللي بيقول عليها مرزوق
الأمير ده بيخرف يا مولانا
العز يعنى ما كانش فيه حاجة؟
الأمير أبدا يا مولانا
العز (لكبير الشرطة)انتم حاكمتم حسن؟
ك الشرطة لا يا مولنا كان في السجن مستنى ميعاد المحاكمة
العز وأنت بتقول إنه انتحر؟
ك الشرطة أيوه يا مولانا
العز إزاي؟
ك الشرطة طعن نفسه يا مولانا بآلة حادة
العز آلة حادة زي إيه؟
ك الشرطة خنجر..سكينة..أي حاجة من دي
العز أو سيف؟
ك الشرطة ممكن يا مولانا (يدخل علي)
العز (يلمح علي داخلا) تعالى هنا يا علي(يشير إليه) عملت إيه(يتهامسان)
علي لسه مارجعش يا مولانا
العز على كده المشوار اللي رايحه طويل؟
علي الله أعلم يا مولانا
العز وبعدين؟
علي أنا عملت حسابي ووقفت ناس ع الطريق أول ما يرجع حا يجيبوه هنا على طول
العز ماشي..روح اقعد مكانك(لكبير الشرطة) انت بتقول إن حسن طعن نفسه بآلة حادة.. ممكن تكون سكينة..خنجر .زسيف أو أي حاجة مشابهة؟
على (للعز) تسمح لي يا مولانا
العز فيه إيه يا علي؟
علي عاوز أشوف الجثة تاني
العز ليه؟
علي (يقترب منه ويسر له بشيء)
العز ماشي..وتعالى بسرعة(لكبير الشرطة) ولقيت الحاجة اللي بتقول عليها؟
ك الشرطة حاجة إيه؟
العز الحاجة اللي ضرب بيها نفسه..الآلة الحادة؟
ك الشرطة لا ما لقينهاش
العز أمال راحت فين؟
ك الشرطة يمكن رماها يا مولانا
العز رماها ..إزاي؟ وفين؟
ك الشرطة يمكن لما طعن نفسه كان لسه فيه الروح وبعدين رماها من شباك الزنزانة
العز نفرض إنه رماها من شباك الزنزانة.. شباك الزنزانة بيطل على إيه؟ع الشارع؟
ك الشرطة أيوه يا مولانا
العز يعنى جدار السجن ع الشارع على طول؟
ك الشرطة لا يا مولاي فيه حوش وبعدين سور
العز الحوش ده عرضه كبير؟
ك الشرطة حوالي 20 دراع يا مولاي
العز يعني لو رمى حاجة كنت تلاقيها في الحوش؟
ك الشرطة أيوه يا مولانا...بس...لكن
الأمير تسمح يا مولانا
العز أتفضل
الأمير أنا لما جاني الخبر نزلت أشوف ومريت ع الحوش لقيت خنجر مرمي تحت الزنزانة بتاعته
العز خنجر مرمي؟
الأمير أيوه يا مولانا
العز وفين الخنجر ده؟
الأمير موجود يا مولانا(للحارس) هات الخنجر(يتردد الحارس.. ينزع خنجرا كان متدليا من وسطه ويسلمه إليه)اتفضل يا مولانا
العز (للحارس)ده الخنجر اللي لقيتوه؟
الحارس (يتردد ولكن نظرة الأمير تنطقه) أيوه يا مولانا
العز وكنت شايله في حزامك ليه؟
الحارس أصل..أصل...أصل كنت خايف عليه لا يضيع
العز طيب..يعنى الخنجر ده هو اللي حسن طعن بيه نفسه؟
ك الشرطة والأمير_ أيوه يا مولانا(يدخل علي ويتجه للقاضي)
العز (لعلي) عملت إيه؟
علفي فيه واحد بيعاين وحيجيب النتيجة بعد شوية يا مولانا
الأمير نتيجة إيه؟
العز لسكت لو سمحت
الحاجب قائد السجن وحارس الزنزانة يا مولاي(يدخلان ويتجهان للأمير)
العز تعالوا هنا( يتوقفان ويشير إليهما الأمير إشارات غامضة) مين قائد السجن؟
ق السجن أنا يا مولاي
العز (للحارس) وانت حارس الزنزانة؟
الحارس أيوه يا مولاي
العز (ل ق السجن) مين اكتشف موت حسن؟(للحارس) خليك انت بره دلوقت(ينصرف الحارس)
القائد الحارس ده يا فضيلة القاضي..جه بلغني على طول
العز وعملت إيه؟
القائد بلغت كبير الشرطة يا فضيلة القاضي
العز وكبير الشرطة كان رأيه إيه؟( يحاول كبير الشرطة أن يشير بإشارات لقائد السجن, فيلمحه القاضي)
العز (لكبير الشرطة)بتعمل إيه؟
ك الشرطة ولا حاجة يا مولانا ولا حاجة
العز طيب اقف ساكت(للقائد)تقدر تقول لنا إيه رأي كبير الشرطة؟
القائد أمر إن إحنا نعمل تحقيق تحت إشرافه يا مولانا
العز وإيه كان الغرض من التحقيق؟
القائد إننا نعرف حسن مات إزاي ومين اللي...
ك الشرطة التحقيق خلص واتقفل خلاص..
العز لو سمحت اسكت انت(للقائد)كمل
القائد وزي ما قال كبير الشرطة يا فضيلة القاضي
العز زي ما قال إيه؟
القائد زي ما قال لفضيلتك يا فضيلة القاضي
العز أنا عاوز اسمع منك انت
القائد أنا تحت أمر فضيلتك يا فضيلة القاضي..قول لي عاوز تسمع إيه وأنا أقول
العز اتكلم كويس.إيه كان الغرض من التحقيق؟
القائد يا فضيلة القاضي
العز اتكلم
القائد كنا عاوزين نعرف حسن مات إزاي وبعدين وإحنا بنعمل التحقيق جه وقال خلاص حسن انتحر,وقفلنا التحقيق على كده..الحكاية باينة زي الشمس
العز طيب,وفي نظرك كبر الشرطة عمل التحقيق ليه مادام الحكاية باينة زي الشمس؟
القائد شكليات...شكليات يا مولانا
العز بس؟
القائد طبعا يا مولانا
العز (يشير بالخنجر) انت شفت الخنجر ده قبل كده؟
القائد (يتأمله) الخناجر اللب زي دي كتير يا مولانا..كل واحد م الجنود أو الحرس معاه واحد زي ده
العز يعني انت مش عارف الخنجر ده بالذات؟
الأمير يا مولانا أنا لقيت الخنجر وماورتوش لحد..آه عرفت الحكاية قلت نقفل التحقيق
العز اسكت يا حضرة الأمير(للقائد) انت عارف إنك كده بتعرض نفسك للخطر؟
القائد إزاي يا مولانا؟
العز الأمير بيقول إن حسن اتقتل بالخنجر ده ..وانت بتقول إن الصنف ده موجود مع الحراس.. يبقى الحراس هم اللي قتلوه يا إما هم اللي إدوه الخنجر
القائد طيب وأنا مالي؟
العز إزاي؟ مش انت قائد السجن؟
القائد أيوه
العز تبقى انت المسئول عن موت حسن
القائد أنا!!
العز أيوه انت...عاوز تقول حاجة؟
ك الشرطة حيقول إيه؟... هو مقصر في الحتة دي وأنا أمرت بإحالته لمجلس عسكري عشان الإهمال
القائد أنا!!
الأمير اخرس
العز مش معقول كده.. ما حدش يتكلم إلا بإذني(للحاجب) دخل حارس الزنزانة(يخرج الحاجب ويدخل معه حارس الزنزانة)
العز مش عاوز حد يتكلم...انت حارس الزنزانة؟
الحارس أيوه يا مولانا
العز (ملوحا بالخنجر) حسن قتل نفسه بالخنجر ده..إزاي وصله؟
الحارس مش ممكن يا مولانا
العز إيه اللي مش ممكن؟
الحارس مش ممكن يكون الخنجر ده معاه
العز لأنه حسب الأوامر كنت بافتشه كل يوم خمس مرات...لا..ومش هو بس .بافتشه والزنزانة كمان
الأمير يمكن...
العز (للأمير) اسكت(للحارس(كمل)
الحارس لا يمكن يكون معاه خنجر يا مولانا
العز إيه اللي حصل يوم ما مات حسن؟
الحارس ساعة ما جيت ادخل له الغدا لقيته مرمي على الأرض فقلت..
العز لا..أنا عاوزك تحكي من قبل كده..من الصبح من ساعة ما دخلت له الفطار
الحارس إحنا ما بندخلوش فطار يا مولانا
العز ليه؟
ك الشرطة جايز..
العز اسكت (للحارس) ليه مابتدخلوش فطار؟
الحارس الأوامر يا مولانا...ياكل مرة واحدة في اليوم بس
العز أمر مين؟
الحارس أمر القائد يا مولانا
العز (للقائد) ليه أمرت بكده؟
القائد أوامر كبير الشرطة يا فضيلة القاضي
العز (لكبير الشرطة) ليه أمرت بكده؟
ك الشرطة يا مولانا..دي العادة..كل اللي متهمين بالقتل بياكلوا مرة واحدة في اليوم
القائد آه تمام
العز طيب خلاص اسكتوا(للحارس) كمل..إيه اللي حصل م الصبح؟
الحارس الصبح بدري الأمير جه يزور السجن
العز الأمير؟
ك الشرطة (للأمير هامسا) انت ما قلتليش الحكاية دي يا سمو الأمير
الأمير (لكبير الشرطة)اتنيل دلوقت...أفهمك بعدين
الحارس أيوه الأمير
العز (للأمير) ليه رحت السجن؟
الأمير كالعادة يا مولانا..باطمن..الأمور ماشية إزاي..زيارة عادية وبتحصل كتير(لكبير الشرطة وقائد السجن) مش كده؟
الاثنان أيوه تمام...
العز (للحارس) الأمير كان معاه مين؟
الحارس لوحده
العز وبعدين
الحارس بعتني أنادي له الحاجب..ناديت عليه وبعدين الأمير مشي بعد ما إداني المفتاح
العز مفتاح إيه؟
الحارس مفتاح الزنزانة
العز خد منك المفتاح ليه؟
الأمير كالعادة يا مولانا..أمال حافتش ع السجن إزاي؟
العز آه(للحارس) بعد كده سمعت صوت من الزنزانة
الحارس لا يا مولانا,السجين ماكانش متعود يصدر صوت
العز وبعدين؟
الحارس وقت الغدا فتحت الباب لقيته مرمي ع الأرض,قفلت الزنزانة وبلغت كبير الشرطة
العز انت فتشت الزنزانة بعد ما مات حسن؟
الحارس أيوه يا مولانا
العز لقيت فيها حاجة غريبة؟
الحارس لا يا مولانا مالقيتش فيها حاجة...لقيت..لا ..دي حاجة مش مهمة
العز إيه اللي مش مهمة؟
الحارس الخرزة
العز خرزة إيه؟
الحارس أصل لقيت خرزة واقعة في الزنزانة
العز وديتها فين؟
الحارس مش فاكر..آه حطيتها في جيبي
العز طلعها
الحارس (يفتش في جيوبه) مش معايا دلوقت باين عليها في البيت
العز (لأحد الحراس) روح معاه وهاتوا الخرزة وتعالوا(يدخل علي ويتجه للقاضي ويشير إليه بشيء...يقوم القاضي ويتجه هو وعلى بعيدا عن الباقيين)
علي حاجات خطيرة يا مولانا
العز اللي كان بيدفن الجثث رجع؟
علي لسه يا مولانا(يمد يده في جيبه ويخرج أوراقا) اقرا الحاجات دي يا مولانا.وباقول إيه الوقت جه عشان نكمل لعبتي أنا
العز وده وقته؟
علي هو ده وقته , أنا كنت فارك الحكاية حتطول لقيتها قصرت خالص
العز طيب فين رسول السلطان؟
علي مش عارف,بس أنا شفته بيلم الحراس الجايين معاه وبيقول لهم كلام كده(يدخل مندوب السلطان)
م السلطان السلام عليكم
العز وعلي وعليكم السلام
العز كنت فين؟
م السلطان إيه الأخبار؟
العز لسه شوية حاجات كده وباقول نرتاح شوية وعلي يكمل تشخيصه
م السلطان ماشي(للأمير) يا حضرة الأمير
الأمير أمرك يا صاحب العزة
م السلطان إحنا عاوزين علي يكمل الحكاية بتاعته
الأمير ما نروح القصر أحسن يا صاحب العزة
م السلطان لا خليها هنا برضه
الأمير أمرك يا صاحب العزة
م السلطان (لعلي) اتفضل يل سيدي
علي ياللا انت وهو نكمل الحكاية بتاعتنا..اندهوا للغايب والحاضر يجهز نفسه..ياللا ياللا
المشهد الثامن
الفتاة الحكاية اتلخبطت ورسول السلطان لما استأذن م القاضي وطلع يكلم الحرس اللي كانوا جايين معاه في السكة وسمعت طراطيش كلام بتقول إن فيه عساكر تانية جاية ..معاهم نائب السلطان بنفسه..ليع ماعرفش..إلا وحكاية اللي رايح يدفن الجثث من أربع أيام ولسه ما جاش..وللا الخرزة.. والخنجر اللي بيقولوا ضرب بيه نفسه..لا.. وكمان الأمير اللي بيزور السجن...والقتلى كانوا رايحين للأمير...حاجة تلخبط يا ساتر.. وكمان إيه فوق اللخبطة دي نكمل تمثيل الحكاية...الأمر لله نكمل(تأخذ مكانها وسط المسرح ويضاء المسرح . علي وأمير يمثل القاضي ,نفس الأشخاص الذين وقفت عندهم الحكاية الداخلية ,ويجلس من كان يأخذ دور المساعد ويخرج ورقا ويكتب)
علي كنا واقفين فين؟ فين..فين آه افتكرت (للأمير الذي يمثل دور القاضي)انت يا قاضي...كنت بتسأل أم سكينة عن الشهود...صح...ياللا كمل
القاضي (لأم سكينة) عندك شهود؟
أم سكينة أيوه عندي
القاضي مين دول؟
أم سكينة جيراني دول(تشير لبعض الواقفين)
القاضي (يشيرالى إثنين من الواقفين)تعالوا هنا..اسمك إيه انت وهو؟
عثمان أنا عثمان المرغني جار الست دي
بيومي وأنا بيومي المزين جار الست دي
القاضي (لعثمان) إيه اللي تعرفه عن الحكاية دي؟
عثمان والله يا حضرة القاضي أنا كنت قاعد في البيت سمعت دوشة وزعيق,طلعت أشوف إيه,لقيت الصوت جاي من عند الست أم سكينة...دخلت كانوا في الأوضة اللي ع الشارع لقيت صابر واقف وجنبه أم سكينة قاعدة تزعق وهي ماسكة الأبريق المكسور في إيدها
القاضي هو اعترف ساعتها بكسره للإبريق؟
عثمان لا..كان بيزعق ويقول لها شوفي التاني اللي كان مع بنتك لكن..
القاضي لكن إيه؟
عثمان لكن سكينة ساعتها قالت إن هو اللي كسره
القاضي تعالي يا سكينة
سكينة (في اشمئزاز)عاوز إيه؟
القاضي انتى قلتي امبارح إن هو اللي كسر الأبريق..دلوقت بتقولي لأ ليه؟
سكينة لأن هوه ما كسرش حاجة..خلاص ما كسرش حاجة يا ناس وربنا يشهد على كده
الأم أيوه يا ختى ؟ ربنا يشهد على كده!أمال مين اللي كان شاهد امبارح؟
القاضي خلاص يا ست انتى وهيه(لبيومي)انت شفت حاجة تانية غير اللي قاله عثمان؟
بيومي لا يا حضرة القاضي
القاضي يعنى انتم الأتنين ما شفتهوش وهو بيكسر الأبريق؟
بيومي وعثمان- لا ما شفناش...لكن شفنا الأبريق مكسور وهو واقف..
القاضي يعني ما كانش فيه راجل غيره موجود؟
بيومي وعثمان- أيوه يا حضرة القاضي
القاضي يعني هو لوحده وبس وما كانش فيه تاني م اللي بيقول عليه
علي (ينهض)باقول إيه يا حضرة القاضي(يشير إليه بشيء)
القاضي استراحة شوية وحنرجع تاني,ماحدش يمشي من مكانه
علي (يسحب القاضي لمقدمة المسرح ويدور الكلام بينهما) أنا شايف إن إحنا نستعجل شوية
الأمير نستعجل إيه؟
على الناس حتزهق..وفضيلة القاضي واقف يشاور إن إحنا نخلص بسرعة
الأمير طيب خلاص نفض الموضوع
على لا.. القاضي مش عاوزنا نفض الموضوع..القاضي عاوزنا نستعجل الموضوع
الأمير يعنى أعمل إيه يعني(يخرج ورقا من جيبه)ما أنا ماشي زي ما انت قلت أهه
علي طيب هات يا سيدي(يأخذ منه الورق) بلاش ده وده وده..أيوه نخش على كلام صابر..انت دلوقت تسأل صابر وبعدين فيه كلام بيني وبينك وبين المساعد بتاعك كمان
الأمير ما تشيل الكلام اللي بينك وبيني ده
على ليه؟
الأمير ما لوش لازمة,حتقعد تسألني راسك مخبوطة من إيه؟ وجرح إيه وبتعرج ليه..أنا ما بعرجش
على لكن انت في التمثيل ده بتعرج..الدور عاوز كده
الأمير أنا باقول نشيله
على نشيله(يذهب إلى الناس) يا جماعة حنختصر الحكاية شوية..كله يطلع الدور اللي معاه(يخرجوا أوراقا) أيوه حنشيل من أول صفحة 15 ل 25 مش 25 كلها لغاية آخر كلام أم سكينة...ماشي
الجميع ماشي
علي (للأمير) ياللا ارجع بقى كمل يا سمو الأمير
الأمير ما بلاش
على انت عاوز مندوب السلطان يزعل واللا إيه؟
الأمير ماشي نكمل..
الفتاة (تتجه إليهم) ما تفضوها سيرة بقى ..نكمل ولا نختصر..الحكاية اتلخبطت قوي..إيه اللي بيحصل ده يا جدعان؟
م المسرح بلاش خروج عن النص
الفتاة الله ده طلع تاني..
على ياللا ..ياللا حنكمل(للأمير) اسأل صابر عن شهوده(الأمير يجلس ويأخذ دور القاضي)
القاضي (لصابر) تعالى يا نيلة انت عندك شهود نفي؟
صابر عندي
القاضي مين؟
صابر سكينة نفسها
القاضي سكينة
صابر أيوه
القاضي إزاي؟
صابر اسألها..أنا اللي كسرت الأبريق واللا لأ
سكينة (للقاضي) تسمح أكلمه كلمتين
القاضي اتفضلي
سكينة (تأخذ صابر وتحاول أن تتجه به إلى المقدمة)
صابر ابعدي عني
سكينة اهدا يا صابر
صابر ابعدي عني..عايزة مني إيه؟...جواز ومش حاجوز خالص
سكينة (وقد نجحت في جذبه بعيدا عن المجموعة) إهدا يا صابر أنا حافهمك على كل حاجة بس بعدين
صابر وليه مش دلوقت؟
سكينة انت مش فاهم حاجة, وأنا اللي كنت باحسبك حتداري عليا وتقول انت اللي كسرته وخلاص...اصل..اصل ماقدرش أقول(تقول الكلمة الأخيرة بصوت مسموع)
القاضي كفاية كده (لسكينة) قلتي غيه في الموضوع ده يا بنت الناس..حطي عقلك في راسك تعرفي خلاصك..لو قلتي إن هو اللي كسر البريق يبقى الموضوع تمام والحمد لله,أما لو قلتي مش هو, اللي كسر الأبريق ده يبقى مين؟..خدي بالك من الكلام واعرفي مصلحتك فين..
على إيه ده اللي انت بتقوله يا حضرة القاضي؟
القاضي اسكن انت..اخرس
المساعد (للقاضي) يا فندم ده المفروض إن ده المفتش اللي جاي يفتش علينا..خش في الدور خش(لعلي) ياللا نكمل
علي إيه اللي بتقوله ده يا حضرة القاضي؟
القاضي إيه.فيه حاجة غلط؟
علي لا مافيش..اسأل سؤال محدد.. هو وللا لأ
القاضي طبعا سؤال محدد(لسكينة) سؤال محدد هو وللا لأ؟(يشير بحركة يفهم منها أنه يريد أن تقول أنه هو)
سكينة (حائرة تضع يدها على رأسها) هو؟ مش هو؟ هو؟ مش هو؟ ما عرفش
علي فين اللي حيعملوا عم صابر وجاره (تسمع جلبة من الخارج ,يدخل اثنان يتجهان للقاضي)
القاضي انت مين انت وهو؟
العم أنا عم الواد ده
القاضي (للآخر) وانت؟
الجار أنا حسين جارهم, ساكن في البيت اللي جنبهم
القاضي (للعم) انت بتقول انك عم الواد ده؟
العم أيوه
القاضي وتعرف إيه عن القضية دي؟
العم والله يا حضرة القاضي والله يا حضرة القاضي صابر كان معايا وبعدين قال لي أنا خارج أتمشى شوية,قلت له الدنيا ليلت حتروح فين؟ قال أشم شوية هوا
القاضي وبعدين وبعدين
العم قصر الكلام هو مشي وأنا قعدت مع الراجل ده نتسامر شوية..بعدين جه اللي قال لي إن فيه مشكلة ويا صابر مع حماته,خدت نفسي ورحت على هناك على طول
القاضي رحت لوحدك؟
العم أيوه.. أصل حسين قال لي حاروح اقفل داري وبعدين أحصلك
القاضي وحصلك على هناك؟
العم أيوه
القاضي طيب..كمل كلامك
العم رحت لقيت صابر هناك.سالت هم اللي نادوله واللا دخل لوحده؟..ردوا عليا وقالوا ظبطوه مع سكينة بالليل وده ما يصحش يا جناب القاضي..لا إحنا ولا عاداتنا ترضى بكده..أيوه هو اللي غلطان وهو اللي يستاهل..
القاضي (بابتهاج) يعني انت بتعترف إن ابن أخوك
العم أيوه غلطان, والغلط راكبه من فوق لتحت..هو يقدر يقول كلام غير كده؟
القاضي عظيم..عظيم(لحسين) وأنت طبعا حتقول نفس الكلام اللي قاله عمه؟
حسين لا يا حضرة القاضي
القاضي لا..أمال حتقول إيه؟ حتألف؟
على (للقاضي) مش كده يا حضرة القاضي مش كده
القاضي (لحسين)انطق عاوز تقول إيه؟
حسين يا حضرة القاضي..أنا اتأخرت عن الحاج في المرواح..رحت بعد مال قفلت داري
القاضي بلاش رغي كتير..انطق عاوز تقول إيه؟
حسين يا حضرة القاضي أنا جايلك في الكلام أهه.. أول ما قربت على بيت أم سكينة سمعت صوت كده..
القاضي صوت إيه؟
حسين زي ما يكون واحد بيتألم
القاضي (بعصبية) وبعدين
حسين دورت ع الصوت ده جاي منين.. لقيت تحت الشباك واحد زي ما يكون قاعد بيتألم..أنا خفت ..قلت لنفسي اجمد ياواد يا حسين ما ياخدش الروح إلا اللي خالقها
القاضي وبعدين
حسين اتشجعت ومسكت العصاية بتاعتي وقربت منه, كان قاعد على ركبه مديني ضهره ,غمزته ببوز العصاية في ضهره
القاضي (لنفسه) هو انت؟
علي فيه حاجة يا حضرة القاضي؟
القاضي لا مافيش(لحسين)كمل وبعدين
حسين قام جري مني على طول..قلت سيبه جايز واد صايع ولا حاجة,وبعدين دخلت عند الناس..والباقي انتم عارفينه..بس أنا افتكرت الحكاية دي لما لقيت صابر مصر على حكاية الراجل التاني ده
سكينة اخرس
القاضي أيوه اخرس...تلاقي كان بيتهيأ لك..أيوه كبرت وخرفت
علي (للقاضي) اسأل حسين إن كان يقدر يعرف الراجل والا فيه حاجة شدت انتباهه
القاضي حاضر(لحسين) باقول لك
سكينة تسمح يا حضرة القاضي
القاضي عاوزة إيه؟
سكينة اكلم صابر
الأم تكلميه؟عاوزة منه إيه؟ يخفى,يروح في ستين داهية ياللا يا حضرة القاضي آدي انت سمعت وشفت..ياللا احكم حكمك العادل اللي يبرد ناري...آه يا ناري
سكينة بس يامه
الأم بس إيه يا بت؟ بقى بعد ما رما كي وقال قدام الناس خلاص مش عايزك, جاية تقولي لي كفاية يامة؟!!
سكينة (تتجه نحو صابر وتأخذه وتتجه به إلى الأمام) لم الموضوع يا صابر..انت مش فاهم حاجة.. أنا حاريحك..أيوه واحد تاني اللي كسر الأبريق
صابر أيوه اعترفي وقولي الكلام الجد..ياللا قولي قدام القاضي
سكينة ماقدرش يا صابر...مش عشاني..عشانك انت,والله العظيم عشانك انت
القاضي بس خلاص بلاش دوشة(للمساعد)اكتب بعد الإطلاع والاستماع لأقوال الشهود قررنا...
علي يا حضرة القاضي..قلت لك اسأل حسين إن كان يقدر يعرف الراجل اللي شافه وللا فيه حاجة كدة وللا كده شدت انتباهه
القاضي وإيه لزومه... ما الحكاية واضحة زي الشمس
علي نفذ اللي باقول عليه
القاضي حاضر(لحسين) تعالى هنا
حسين أمرك يا فضيلة القاضي
القاضي انت تقدر تعرف الراجل ده لو شفته تاني؟
حسين لا الدنيا كانت ضلمة,الكدب خيبة
القاضي (لعلي) خلاص..(لمساعده) اكتب...قررنا
علي لسه السؤال التاني
القاضي سؤال إيه؟
علي إن كان فيه حاجة شدت نظره في الموضوع ده؟
القاضي إيه لزمته؟
علي اسأل
القاضي حاضر(لحسين) يا حسين.. فيه حاجة غريبة شفتها في الراجل ده؟
حسين أيوه افتكرت
القاضي افتكرت إيه يخرب بيتك
حسين افتكرت , وهو بيجري كان بيعرج
القاضي (يمسك راسه بيده)
ص من الجماعة- ما حدش في البلد بيعرج
ص آخر أيوه ما حدش فيها بيعرج خالص الا القاضي
علي القاضي!؟
القاضي اخرس...اخرسوا(ينظر لعلي) بلاش دوشة في المحكمة
علي أنا من رأيي انك ترتاح شوية على جنب وتخلي مساعدك هو اللي يكمل
القاضي لا.. أنا اللي حاكمل...أنا اللي حاكمل
علي كمل...بس نادي علي صابر
القاضي تعالى هنا يا زفت
علي (لمساعد القاضي) ما تكتبش السؤال اللي أنا حسأله لصابر
المساعد حاضر
علي (لصابر) انت بتقول كان فيه واحد تاني
صابر أيوه
علي شفته؟
صابر لا..لكن ضربته
علي ضربته؟
صابر أيوه ضربتين واحدة في وشه والتانية على دماغه(يلمس القاضي رأسه ويحدث هرج ويدخل من كان يمثل دور الخادم)
علي (للمساعد) ده مين؟
المساعد ده خادم القاضي يا ناب المفتش
علي انت جاي هنا ليه؟
الخادم أصل القاضي كانت العصاية بتاعته ضايعة من امبارح ,وأنا لقيتها وجاي أديهاله,أصله مابيعرفش يمشي ألا بيها..
علي لقيتها فين؟
الخادم تحت شباك سكينة (يحدث هرج ويدخل العز ومندوب السلطان)
م السلطان بس كفاية كده...كفاية
الأمير أيوه كفاية.كفاية
المشهد التاسع
الفتاة خلاص الحكاية خلصت لغاية كده...المؤلف قال كده...للحكاية نهاية واضحة للجمهور ,عليه بس يشغل دماغه شوية صغيرين وأنا دلوقت حسيت إن الحكايتين بيدخلوا في بعض.. المهم القاضي رجع ومعاه مندوب السلطان ,وواضح إن القاضي عاوز يخلص بسرعة لأنه وهو خارج كان بيقرا ورقة إداهاله علي, قراها وراجع,وإحنا لسه برضه مستنيين سواق العربية..والحارس اللي راح يجيب الخرزة..نخش في الموضوع
العز (لمندوب السلطان)لو سمحت تخلي الحرس بتاعك هو اللي يحفظ النظام
المندوب ليه؟
القاضي لو سيادتك تطاوعني مش حتخسر حاجة
م السلطان حاضر( يشير بيده يذهب إليه الأمير الذي يشير للحرس فيخرج ويدخل آخرون)
العز يا حضرة الأمير
الأمير أيوه يا حضرة القاضي
العز انت بتقول إن حسن قتل نفسه بالخنجر ده( يشير اليه بالخنجر)
الأمير أيوه..لقيته مرمي تحت الزنزانة
العز طيب إيه رأيك إن الطبيب اللي كشف ع الجثة بيقول إن الطعنات طعنات سيف مش خنجر
الأمير سيف؟..لا يمكن..ثم ما فيش طبيب كشف ع الجثة
العز وده الغريب...ليه ما أمرتش بطبيب يكشف ع الجثة.. المهم أنا كلفت طبيب وده تقريره(لعلي) اقرا التقرير يا عبي
علي (يمسك بالورقة) توجد هناك طعنتين واحدة في أسفل البطن والأخرى في مقدمة الرقبة.. والواضح من عمق الطعنة أنه لا يمكن أن تكون الأداة قصيرة بل سلاح طويل له ذو نصل مستقيم
العز إيه رأيك
الأمير ماعرفش.. ماعرفش(يدخل حارس الزنزانة مع المكلف بحراسته)
الحارس الخرزة أهه يا فضيلة القاضي(يخرج جوهرة من جيبه)
العز دي اللي بتقول عليها خرزة؟(يصفر وجه الأمير ويتداعى)
الحارس أيوه يا فضيلة القاضي
العز (يتأمل الجوهرة بين أصابعه)
ص من الجمهور- الجوهرة دي أنا عارفها
الأمير اخرس...اخرس
العز تعالى هنا تعالى
الرجل أمرك يا فضيلة القاضي
العز إيه أقوالك
الرجل الجوهرة دي أنا اللي حاططها بإيدي في مقبض سيف الأمير
العز سيف الأمير؟
الرجل أيوه يا فضيلة القاضي
عزة اظهر يا حق وبان..اظهر يا حق وبان
العز اسكتي يا عزة(للأمير)وريني سيفك
الأمير (يتردد)
العز (يشير لعلي الذي يتقدم مع أحد الحراس وينزع سيف الأمير ويظهر مكان الجوهرة المنزوعة وبسلمه للقاضي الذي يطابق بين الجوهرة والمكان الموجود بالسيف) تمام..تمام بإيه تبرر ده يا حضرة الأمير؟
الأمير أصل الحكاية إن... (يدخل رجل يشير لعلي)
علي تسمح يا فضيلة القاضي( يخرج من المسرح ويعود تانية معه رجل آخر)
العز مين ده؟
علي ده سواق العربية اللي شالت جثث الأغراب
العز أنت؟
السائق أيوه
العز تعالى هنا...انت وديت الجثث فين
السائق بره الحدود يا مولانا
العز حدود الإمارة؟
السائق لا حدود المملكة
العز حدود المملكة؟
السائق أيوه
الأمير اسكن ما تنطقش
العز اسكت يا حضرة الأمير وإلا حاسكتك بالقوة(للسائق)قول الحكاية من الأول
السائق سمو الأمير أمرني إني آخد الجثث دي وأروح بره الحدود
العز حدودنا مع مين؟
السائق الحدود الشرقية
العز وبعدين؟
السائق قال لي حتلاقي حتة..وصفها واداني خريطة..وقال لي حتحط الجثث عندها..وتجيب اللي يكون هناك..
العز هو كان فيه حاجة هناك؟
السائق أيوه
العز وجبتها؟
السائق أيوه
العز هي فين؟
السائق أه
مرزوق شبه الصرة اللي خدها الأمير من هدومهم
العز الحكاية ابتدت تبان أنا باقول..
م السلطان يا فضيلة القاضي الحكاية حتكبر..أنا من رأيي نستنى نائب السلطان
العز نائب السلطان إيه اللي حيجيبه هنا؟
م السلطان السلطان بعت بالحمام الزاجل إنه على وصول بسبب القضية دي
القاضي بسبب القضية دي؟
المندوب أيوه(بروجي ويدخل أحد الحجاب)
الحاجب حضرة صاحب العزة نائب السلطان الأول(يدخل نائب السلطان ومعه بعض الحرس)
النائب إيه الحكاية(ينظر للأمير المنهار تماما) آه فهمت
المندوب الحكاية إن...
النائب مافيش حكاية خلاص(للقاضي) السلطان بنفسه اهتم بالقضية دي وشافها ودرسها وقال حسن انتحر
العز انتحر؟؟
النائب أيوه انتحر... دلوقت أنا عاوز منك تعلن الحكم ده ع الناس
العز لا يمكن
النائب لا..يمكن وحتعلنه
العز مش ممكن...دور على حد غيري
النائب كده,طيب( يشير لحارسين يحوطان بالقاضي وعلي ويأخذوهما إلى خارج المسرح)
النائب (للناس)السلطان بنفسه اهتم بيكم والقضية بتاعتكم,والحقيقة إنه سهر فيها ووصل للحكم العادل
الناس إيه هو؟
- ما إحنا خلاص قربنا نوصل
عزة قصدك وصلنا للقاتل
النائب ما فيش قاتل ولابد حسن انتحر
الجميع انتحر
النائب أيوه انتحر..أمر السلطان..انتحر (يتجمع الناس)
- يا ساتر إيه الريحة دي؟
- ريحة إيه؟
عزة ريحة...ريحة..الجثة..ريحت دلوقت بس يعني إيه؟ حسن مات دلوقت بس... يعني إيه تعرفوا تقولولي يعني إيه؟
النائب مادام الريحة طلعت يبقى إكرام الميت دفنه,روحوا ادفنوه
الأمير (ينتصب واقفا) يندفن من غير جنازة..يندفن من غير جنازة
النائب ماشي كلامك...يندفن من غير جنازة
(ينسحب الأشخاص والأنوار ولا يبقى إلا الفتاة والكورس الذي كان معها في البداية)
الفتاة بعد كل ده يندفن من غير جنازة..وإيه انتحار إزاي؟
- ما خلاص الحكاية خلصت
- أيوه المسرحية خلصت
الفتاة مسرحية إيه؟
- اللي إحنا كنا بنمثلها
الفتاة بذمتكم كانت مسرحية؟... عملتوا إيه؟ عملتوا إيه...اندفن من غير جنازة
المسرحية خلصت
مــــنـــــقـــــــووووووووول
التميز
الإهداءات
رد: يحيا العدل(القاضي والأمير)الجزء الثاني
