ياهيه ياللي تحسب الوضع ساده
العقـل نعمـه والتكّبـر زريـه
والدين رحمة والعبـاده سعـاده
والفضل لله والتغطـرس خطيـه
اسمع كلامي حسب نص الا فاده
وانت اعتبرها من صحيبك وصيه
الرزق قسمتْ ربنا فـي عبـاده
كلن عطـاه الله قسمـه عطيـه
كلن حسب ما الله كتب له واراده
وانا رضيت بما تحوشـه يديـه
العبد لوّ رزقه يجـي بإجتهـاده
كانت بنوك الشرق والغرب ليّـه
ومن غير ذلك كان عندي زيـاده
عماير اهـل ادبـي والفيصليـه
وعندي وعندي في التجاره عماده
ومؤسسـات كلـهـا عالمـيـه
وعندي على تجار لندن سيـاده
وتُجّار اهل باريـس والبندقيـه
وحطيت برج المملكة لي عيـاده
وسويت لي مضياف في العاذريه
وسويت شرهات وسويت عـاده
وسويت مضمار الفرس والمطيه
والمستحق اعطيه وادفع سـداده
امـا عطـا محتـاج ولا هديـه
كلن حسب ظنه وحسب اعتقـاده
وانا على ظني شرحت القضيـه
ولبيّت يا هـذا الزمـان ونكـاده
كمٍ من حليٍ قام يشـذب حليّـه
الادمي ينّحب حسـب اقتصـاده
اما . هنـى . ولا حيـاةٍ شقيـه
العبد لو حصـل هـواه ومـراده
يمكن يمـوت وعلتـه داخليـه
العمـر يفنـا والليالـي مـزاده
شبنـا ودنيانـا كماهـا صبيـه
لولا التفنن في الذكـاء والبـلاده
ماصارت عقول الثعالـب ذكيـه
واللي غباه اصبح مغطي فـواده
يبقى مكانه ضمـن قـوم غبيـه
اللـي يدمـر مجتمعـه وبـلاده
اكيـد مالـه عنـدنـا قابلـيـه
انا عرفـت مزوّريـن الشهـاده
اللي تبث السـم فـي الشاذليـه
هبي عليهم ياسفـوف الرمـاده
هبت عصير هب تالـي عشيـه
مالي وراهم صبح لليل وسـواده
ذمتـك ياخـولان منهـم بريـه
ابعد عن اهل الشك واهل القراده
في يوم من الايام مالـك هويـه
البعد عنهـم والتوّحـد عبـاده
يكفيني اهل المعرفـه والحميـه
ربعن لهم بالطيب والجود عـاده
على سلـوم اجدادهـم الاوليـه
الدين فيهـم والـولاء للقيـاده
علـى كتـاب الله وسنـة نبيـه
اللـي يشاركنـي شرابـه وزاده
واللي يدافع فـي غيابـي عليـه
دايم على الله منهجه واعتمـاده
هذا الخوي اللي ينومس خويـه
وختم الكلام العلم هـذا حصـاده
العقـل نعمـة والتكّبـر زريـه
عسى النسيم اللي يذعذع بـراده
عسى عبيره طـم نجـد العذيـه
خولان بن عامر
التميز
الإهداءات
العقـل نعمـه والتكّبـر زريـه ...
رد: العقـل نعمـه والتكّبـر زريـه ...
