الأبيات بدون مقدمات
ليت دارٍ(ن)سكنها مترف الكفين=تقترب دونها وأشوف مزيونها
مير دارٍ(ن)سكنها ناعم الخدين=حظنا والمسافة جات من دونها
والليالي تمر وشوفتك يا زين=كايدة والعيون الجمر في نونها
أسهر الليل كله ما تنام العين=كن جمر الغضا مشعول بجفونها
أتغنى بحسنك نادر الثقلين=مسرج خيول شعري وأتبع لحونها
كل ليلة وطيفك للعيون ايبين=ثم يشعل بروحي طيفك جنونها
راحت سنين وأخشى من بعدها سنين=تتعب النفس والدنيا شحب لونها
يا غرام الليالي بالعسر واللين=وش علاج الجروح اللي تعرفونها
حالتي يا غرامي كل يوم تشين=كن كبدي بنار البعد يكوونها
ودي إنك تجيني والظروف تزين=مير روحي بلاها بعد مضنونها
وين والله مدري كيف وإلا وين=الأماني كبار ومتعبة كونها
كل ما قلت تصلح والعلاج يحين=شان وجه الزمان وغير ظنونها
بيننا يا مناتي حال ذئب البين=والمشاعر يكون الله في عونها
حظنا يا غناتي موجع الإثنين=حسبي الله على الأيام وطعونها
متعبتني وأعرفك تشتكي ما تبين=تكتم الونة اللي فيني غبونها
ادري إنك تعاني والغرام لعين=ونة العشق خوف الناس يوحونها
وأدري إنك بحالي يا غلا تدرين=مير نفسي ضمنتك سر مكنونها
أنت سر الحياة بخافقٍ(ن)مسكين=منك يأخذ قسا دنياه وليونها
ليت دارٍ(ن)سكنها مترف الكفين=تقترب دونها وأشوف مزيونها
التميز
الإهداءات
نادر الثقلين !!!
رد: نادر الثقلين !!!
