الله يسعدكم أين ما كنتم
لي رفيق درب باعدت بيني وبينه السنين
ولكن على قول المثل : لا بد للحي يتلاقى
وجدته بعد زمن بالصدفة
فحبيت أهديه هذه الأبيات
اهداء للأستاذ الشاعر والأديب والإعلامي
الشريف بندر الجودي
كبير مراقبي الإذاعة السعودية
علها تروق له ولكم
اعطيك يا بندر من الشعر بيتين=بيت لزمالتنا وبيت لوفانا
تذكر زمانٍ(ن)فات كنا وراعين=واليوم شابت يا رفيقي لحانا
وتذكر زمان الورد وسط البساتين=بالطائف المأنوس غضٍ(ن)كمانا
تذكر زمان الدرس ماهو بذا لحين=ايام كان العلم منه إرتوانا
واليوم يابندر نشابه غريبين=ما كننا في درب واحد مشانا
ما كن عمرٍ(ن)فات ينعد بسنين=راحت سنين وعنها ما درانا
يا سرعها سرعاه بالعسر واللين=تركض وحنا ما لحقنا هوانا
نسعى ورى الدنيا سواة المساكين=ما ندري انا مشترين لغثانا
واليوم وجه الوقت ماعاد هو زين=زين الزمن عود كثيره ورانا
شبنا بعد كنا سواة السلاطين=أيام يا بندر يذري ذرانا
وأنا أشهد إن الشيب يا صاحبي شين=لو هو وقار البيض تضحك علانا
وشلون عاد نقول ياليل يا عين=دام العذارى مقفية ما تبانا
ما يعرفون إنا قنينا مزايين=ياما كسبنا من بيوع وشرانا
نشري بكاش ولا نساوم على دين=ياكم دارت بالليلي رحانا
لكن يا هيهات من بعد الألفين=قامت ثنى يا رفيقي يدانا
ما باقي إلا ثالث يشد ثنتين=من عقب ما صارت تقارب خطانا
يالله تثبتنا على الحق والدين=يارب تقبل بالخواتم دعانا
يا خالق الأكوان رب النبيين=تلطف بنا يا عالم في خفانا
تغفر لنا الزلات يارب يا معين=بعفوك تجاوز عن خطايا جنانا
يارب تكتبنا عبادٍ(ن)مصلين=يا رب ما غيرك إلاهٍ(ن)رجانا
لا من غدينا طين في داخل الطين=واللي بكانا بعد مدة نسانا
رحماك يا رحمن في لحظة السين=تنزل علينا رحمتك وتهدانا
التميز
الإهداءات
شبنا بعد كنا سواة السلاطين !!!
رد: شبنا بعد كنا سواة السلاطين !!!
