ديوان الأمير الشاعر: بدر بن عبد المحسن؟؟؟؟

يسعد صباحك

يسعد صباحك .. ليلنا تو ماجا
الشمس غابت واشرقت عندكم شمس

هى شمسنا اللي في جبينك تلاجا
والا قمرنا اللي فقدناه من امس

ليل السما برد وسحاب وعجاجا
يامن يشب النور في الخاطر العمس

انتى وانا لو كان منا نتناجــا
لاماطفت في خاطري شمعه الهمس

ياللى جرحتك مالجرحي علاجا
ادري الجروح النازفه تكره .. اللمس

بقول احبك وان عقدتى الحجاجا
لا قولها ثنتين واربع مع خمس

ويسعد صباحك يابعد كل ماجا
وماراح من عمري وانا في رجا الشمس

تالي نهار

تالي نهار وعاتق الشمس مذبوح
والوقت لو تدرين للوقت ذباح

كن السما صوتً من الذعر مبحوح
والليل خيلٍ سود للضي تجتاح

وسحايبٍ فوق الشفق كنها قروح
على جبينٍ ما شكى كثر ما طاح

لاذت عصافير المسا في ذرا الدوح
وتنفس سراج الوهن بين الألواح

حبيبتي ضاق الفضى وين باروح
وان رحت ظلم النفس للنفس ما راح

مجروح ماهو هم لو قلت مجروح
يالله عسى ما اصير في قلبك جراح

تبسمي برقٍ على ثغرك يلوح
بشد له مدام في العمر مـرواح

غزيت وجه الصبح من غير مصلوح
وانكفت دون الشمس هقوات ورماح


بحر العيون

تقول اللي طرف عينك أنا مدري هدب أو عود
أحس اني من اللي صابها ماشوف قدامي

ضحكت .. وقلت لاتخافي على بحر العيون السود
على شط الكحل مريت .. وهذا موضع أقدامي

أدوّر عن ذهب عمري .. أدور كنزي المفقود
وأشوف الموج يطوي الموج ويبحر مركب أحلامي

عيوني بسمة اعيونك ولو صارت مطر ورعود
أبا اشرب من ظما دمعك وابااغسل جرحي الدامي

عطيني عيونك الليلة .. وباكر ياعساه صدود
أمانه لا مسحتي الكحل خلي طيف أحلامي

أحبك كان يكفي الحب جروحي في هواك شهود
أنا اللي راس مالي حلم .. وهم الدنيا قدامي


الجميلة

أطوي الجديلة في كفوفي .. وهي ليل
ولا من طويت اليل .. صار الجديله

حلمٍ جمعني فيك .. ما كان بالحيل
حلمٍ ولكن .. شوفتي لك قليله

ناديت لك لين إسمعتني المواصيل
واشتقت لك .. كن العمر صار ليله

ولمستك بروحي .. وكانت قناديل
أصابعي .. والقلب نار.. وفتيله

ما هو غريب .. أبتل من جارف السيل
لا شك ينبت في عروقي خميله


تعبت أسافر

تعبت أسافر في عروقي ومليت
من جلدي اللي لو عصيته غصبني

ياما تجاوزت الجسد واستقليت
عن الألم .. لاشك جرحي غلبني

أنا سجين الحال .. مهما تسليت
وانا الطليق وكل شيٍٍ قضبني

حريتي لاعل .. يا كود ياليت
اما شفت حيٍٍ جاد لي ماسلبني

وليت يا ليل التباريح وليت
اما محاني الحزن والاكتبني

كل السما في دفتري وان تجليت
مثل الشموس .. غبار قبري حجبني

لي صاحب وان ما تخلى تخليت
لا بد ما نهدم .. ولا بد نبني

تخير

أنا ما أشير بالفرقا .. ولا أحدك على المقعاد
تخيَر في طريق الوصل .. والا درب هجراني

حرام الوصل ما يجمع قلوبٍ عن هواها بعاد
وبعض البعد لو عذب يجمع بين خلاني

تحسب ان الهوى ضحكة دقايق عشتها في ميعاد
إلى ما رحت تنساها .. وتنسَى الوعد وتنساني

ألا يا صاحبي .. الرفقة ترى مَا هِى ثياب جداد
تبدلها متى مليت .. وتلبس غيرها ثاني

إلى ضاع الوفا .. مابه هوى بارجيه أنا .. ووداد
ترى ذا الفرق .. بين أقرب قريب .. وبين عدواني

تحاكيني بطرف لسان وهرجي من صميم فواد
وتاقف من بعيد .. ويم درب الموت تنخاني


البحـــار

أنشد البحار على سر الحنين
عن قصيد البحر .. وجروح السفين

عن حبال الشوق تظمأ للشطوط
عن حروق الملح في شفاه السنين

ما عرفت الغوص في اليم المخيف
ولا رهنت العمر في الدر الثمين

جيت أنا من نجد .. في قلبي الرياض
وفي عروقي التهم .. والبيت الأمين

في كفوفي تصرم نخيل الحسا
ومن ذواري الرمل غادي لي جبين

جيتكم .. والعشق يطرحني سؤال
هو صحيح الشط له صدر ويدين

عانقتني بيوتكم .. وأنا بعيد
ما عبرت الجسر .. ما شفت القطين

ياهوى البحرين مريت الديار
عابرٍ والقلب باللهفة ضنين

لين حطت بي رحالي في هواك
وانبعث نبع المحبة في الكنين


أبي النسيان

تذكرتك .. وأبي النسيان ألايا خل ساعدني
أنا مالي ورى الذكرى .. إلى مات الأمل خيره

أنا ودي على الفرقا حبيبي لو تعاهدني
وإلى شفتك .. تصد ولاتجيب لما مضى سيره

تخيّر غير هذي الأرض .. مكانٍ به تواعدني
تخيّر لك مكانٍ صعب .. أعرف فيوم تقديره

عسى الجرح الذي يدينك أشوفه عنك يبعدني
أنا اللي أكرهك .. وأحبك .. شعورٍ صعب تفسيره

حسيبك .. يالهوى الظالم .. حسيبك لاتعاندني
بيلقى صاحبي غيري وأباالقى في العرب غيره


أبهــــــا

كل ما كتبت أبها .. نشت فوق الأوراق
سحابةٍ .. وابتل في الصدر معلوق

أخيل بين أصابعي .. نوض براق
وكن القمر ينبت له غصون .. وعروق

شقت ثياب الليل .. عن جلد الأشفاق
لا بان لي معنى0 .. ولا زانت طروق

ضاع القصيد00وما بقى غير الأشواق
وأحلى الشعر ما يكتب الشوق في الشوق

إن خان بي الشاعر .. فأنا جيت عشاق
وكل عاشق لا بد ما يطلب حقوق

يا سودة أبها .. خاشري كل شعاق
كبد السما لا شك لدي لي بموق

إن كان أبو بندر على الوصل سباق
لي الفخر .. إني من الشيخ مسبوق

لأجلك عسير .. أزعلت خلاني فراق
جيتك .. ودونك أشهب القاع مشقوق

لي ديرةٍ خدانها مثل الآفاق
فاطرافها .. وديان .. وجبال .. وعروق

وحّد ما بين ترابها .. دين وأخلاق
وفرّق شمل عدوانها .. كفر وعقوق


الأربعيني

ادري ان الوقت يذهب ما يعود
اربعينٍ فارقتني يالعنود

ماطر الايام من غيم الزمان
ما يبل الريق لو مهما يجود

كم شربته صافيٍ بارد قراح
ما دريت ان الظما سر الوجود

كل شمسٍ تلمس اشجار العمر
تحرق الاوراق وتجف الفنود

وكل ريحٍ تدفع شراع العمر
ينقطع به حبل ويميل العمود

اربعين مرت وتوني صغير
انتظر لعل تصدق لي الوعود

والغريب اني على هذا مغبوط
ادري اني بخير لا شفت الحسود

الزمن يا بنيتي كله زوال
ما تخلد كود لحظات السجود

مالنا فيك يا الطيب نصيب

مالنا فيك ياالطيب نصيب
الله اللي كتب هذا السفر

جيت دار الفنا مثل الغريب
ورحت عنها مراويح المطر

كن ودك تغيب ولا تغيب
صرت مثل السنابل والزهر

يافهد وش نقول انك حبيب
صافي الحب في قلبك نهر

يافهد وش نقول انك قريب
اسأل العين عن قرب النظر

يافهد نكتبك لطفٍ وطيب
أو نعزي بك رجال الفخر

يافهد .. نندهك ليتك تجيب
فاقدينك مثل شمس وقمر

سهم الأقدار يقتل من يصيب
يالله انا .. رضينا بالقدر

بس في صدورنا دمع ونحيب
لو نثرناه .. ذوب له صخر

اه يا لجراح

لا جيت أنا بــ سامحك..
تبكي الجراح ما ودها..
مشتاق ودي أصافحك..
عيت يدي لا مدها...
آه. .يا لجراح .. راح اللي راح ..
وراحتي .. من يا ترى بيردها ..
يا حب.. ياذ كرى واسم..
مدري انا ابكي عليك من العذاب اوابتسم..
صدقني في يأسي .. نفسي تبي نفسي تبيك ..
لا يا دفا شمسي تبيك..
ليه خنتني ..الله عليك ..
آه يا الجراح .. راح اللي راح..
وراحتي .. من يا ترى بيردها ..
لا تحاكي عيوني .. يمطر سحاب الملح ..
ولا تلمس أشجوني .. ينبت في قلبي جرح ..
ناظرني يا خلي .. جرح انا كلي ..
وشلون أبـ ارضى الصلح ..
فصل الخريف حبي ..حزن وورق أصفر..
...ودعني يا قلبي..وخل العذاب أقصر..
آه يا الجراح .. راح اللي راح..
وراحتي .. من يا ترى بيردها ..


جمرة غضى

جمرة غضى .. أضمها بكفي
أضمها حيل . .
أبي الدفا .. لو تحترق كفي
وأبي سفر لليل
بردان أنا تكفى .. أبي احترق بدفا
لعيونك التحنان .. فعيونك المنفى
جيتك من الإعصار .. جفني المطر .. والنار
جمرة غضى
والله الجفا برد .. وقل الوفا برد
والموعد المهجور ما ينبت الورد
ياحبي المغرور .. ياللي دفاك اشعور
رد القمر للنور .. واحلى العمر .. في وعد
بردان .. بردان أنا تكفى.. أبي احترق بدفا
يا أول الحب .. شفتك أنا مره
واهديت لك قلب
ورديت لي جمرة
ومن يومها كان الرحيل
وليل الشتا .. القاسي الطويل
وآه يا الحنين
لليل باب له حارسين
برد وسحاب



كافي عتاب


البارحة والقلوب أصحـاب كنت القمر وأنت تمدحني
واليوم .. لي مخلبين ونــاب ومشا هد الـدم يفرحني
كذاب هذا المـدح كـذاب وكـذّاب ذنمٍ يجـرحني
إنسـان..ماني نجم وشـهاب وليتك مـلاكٍ وتصلحـني
لي صرت عـاري..علي ثياب بالله وشـلون تفضحـني
اخطيت واخطيت كافي عتاب إنطـق بحكمي وريحـني
ياصـاحبي ماقطعت أرقـاب عـدلٍ قصـاصي وتذبحني
ولاني بعد أجمل الأصـحاب الأجمـل إنـك تسـامحني

انا الجفا


عن كل نجم ظهر بسدل أجفاني
لعل ما عيش حزني لحظة غروبه
وعن كل خلٍِ طويل الصمت كفاني
الصاحب اللي قليل الهرج عذروبه
وعن كل ثوبٍ جديد باالبس أكفاني
وأدله ولا ألقى رسايل هم في جيوبه
أنا الجفا ليه أخاف الناس تجفاني
وأنا الحبيب الذي من يعشق عيوبه
راعي الوعد وأن صدق مرة ولاقاني
يحتار بين السراب وقلب محبوبه
يامن عذابه يشققني ويرفاني
فرقاك غصب علي بالحيل مكتوبه
خبرت نصف تعب من نصفه الثاني
بعضي الرماد وبعضي نار مشبوبه


الله يرد خطاك


الله يرد خطاك لدروب خلانك ..
لعيون ما تنساك لو طال هجرانك ..
دام الأمل موجود فالنفس خضاعه ..
حق العيون السود السمع والطاعه

الله يردك لي .. يا مطول غيابه ..
يا معـذبي هجري .. مدري وش أسبابه ..
دام الأمل موجود .. فالنفس خضاعه ..
حق العيون السود السمع و الطاعه ..

ياللي بعدك اليوم .. نبكي على باكر ..
صبري عليك يدوم .. مادمت أنا فاكر ..
إن الأمل موجود .. فالنفس خضاعه ..
حق العيون السود السمع و الطاعه ..



حسايف


التفت ...
وتوها ... توها ما اختفت ...
ما**اها الليل ... باللون الحزين ...
التفت ... وتعالت صرخته ...
في نظرته ...
صاح ... لكن بالنظر ...
وان**ر .... شوفه عثر ...

حسايف .. تذبل الضحكه وهى بين الشفايف ..
تذبل الفرحه وتضيع ...
ويصبح الكون الوسيع ...
مايكفي خطوتين .. لا**اه الليل بااللون الحزين ..
يوم مدلها يده ..
كانت الرجفه لقا ..
ودعت فيها الشقا ..
وتركت بين الاصابع ..
عطــرهــا ..
وعمرها ... ما جت على وقت الوعد ...
إلا ذاك اليوم ...
و عمرها ... ما بكت .. و ما ضحكت ...
ما حكت له .. واسكتت
مثل ذاك اليوم ...
كانت أجمل من خياله ... كانت انضر ...
كانت أكثر ... من أماني عمره الظامي حنين ..
و اختفت ... من **اها الليل باللون الحزين

اختفت في الطريق اللي معه ...
كانت تجيه ...
كيف دربٍ جمعه معها ... خذاه ...
ليتها اختارت سواه ...
تزرع القرقا لياليها ... عليه ...
وحسايف ... حسايف ...


غربه وليل


غربه وليل .. وعمر ضايع ..
وحب ضايع .. في مركب أماني ..
ماله دليل
وانت يا اغلي الحياة ..
في الحب ناسي .. ليتك تقاسي ..
لو قليل ..
يا خطوة دمع فوق الخد..
يا جرح .. يا عمري ماله حد ..
يا حب كبير .. يا حزن كثير ..
يا ليل البعد والتفكير ..
حبيبي .. وكل سنا عمري .. وثواني بسمتك كله
عذابي وقلت انا صبري .. اداري لوعتي فـ ظله
وفات العمر تغريبه ..
وضمت بسمتك .. غيبه
وعشت الحب في ليلي..
وذاب الصبر من ويلي
غربه وليل وعمر ضايع ..
وحب ضايع ..
في مركب أماني ماله دليل
وانت يا .. اغلي الحياة ..
في الحب ناسي .. ليتك تقاسي ..
لو قليل

منقول ((تجميع))

مشكور على الموضوع المميز

مشكووور على النقل الجميل

الله يعطيك العافية

لك خالص التحية

القناص



الله يعطيك الف عافية على الديوان الجميل المميز وننتظر الجديد



لـــــــــــك تـــــــحـــــــيـــــــاااااااااااااااااااااااااا اااااااااااااااااتـــــــــي



أمير القوافل

مشكور والله يعطيك ألف عافيه



تحياتي

مشكور اخوي على مادونته



تحياتي

مشكور والله يعطيك العافيه

القناص


شكرا لك على النقل الرائع



تقبل تحياتي

مشكوووووور

والله يعطيك الف عافيه

من أرقى الشعراء الامير بدر بن عبد المحسن

شكرًا لك اخي الكريم