الأبيات الليلة كالعادة
بدون مقدمات
ياليت عيني تهتني بشوفة الزين=حتى ولو إنه مدى العمر مره
لعلني أرتاح من حلمي الشين=اللي جلب فوق الخفوق المضره
يرتاح فكري من شباح وتلاوين=دايم وهي من كل صوب تمره
وليا التقينا وطاحت العين بالعين=يكفي لنا خلسة من الوقت نظره
أما طلعنا كلنا من المجانين=والا إختلفنا وكل واحد بعذره
لكن متى ماظن في يوم بيحين=هذا اللقا لو كان فيه المسره
بنعيش بالأحلام ونقول بعدين=كل واحد(ن)عايش على قد فكره
لكن أنا بقول لأجل تدرين=وبشوف ردة فعلك(ي)والمبره
حلم جمع مابيننا نحن الأثنين=مزينه من حلم(ن)ولله دره
زرع بقلبي عشق يكفي ملايين=وسكب بعيني الف عبره وعبره
شوق وغرام ولهف القاه من فين=روحي تقلب بين برده وحره
تكفين ياكل الغلا والف تكفين=قلب(ن)عشقكِ لا تهينين قدره
لا تتركينه للشقا والطواعين=اللي تعاقب كرة بعد كره
عندك دواه إن كان ودك تداوين=والا بيدينك إحفري لحد قبره
حنا كذا من طين ونعود للطين=ما نحمل من أحلامنا قدر ذره
شبي علي إن كان ودك تشبين=لا تحسبين حساب لوم ومعره
بس المهم إنك على الروح ترضين=حتى ولو إني عليك أتشره
يالله تبدل عسر الأيام باللين=أحس في قلبي من العشق جمره