أسعد الله لياليكم وأيامكم
أحبك كلمةٍ(ن)لكنها دستور للعشاق=وأنا وياك عشناها مشاعر عشق زلزاله
أحبك باب ندخل منه للي داخل الأعماق=ليا منا داخلنا به عرفنا كامل أشكاله
شربنا من صفاها وإنكوينا بجمرها الحراق=وهذي سنة الأيام عدالة ومياله
قبل لا تنطق الكلمة غدا بين القلوب عناق=وضمت صدق ما قلتي قبل للصمت يغتاله
وفينا للعهد محدٍ(ن)على الثاني بعمره باق=قبل لا ينشغل في حالته يسأل عن أحواله
تقول بخير لو إنك تحس بداخلك دقاق=وأقول بخير وأنا حالتي من بعدكِ(ي)حاله
نسابق للحلوم ونحض الأطياف حي سباق=ما بين الذات والإحساس كن الثاني قباله
نسامر للطيوف من الغروب لساعة الإشراق=ونحض للأمل لا حال دون الثاني وصاله
ليا سج الفكر ينوض طيفك نوضة البراق=وتغدي من سنا نوره سحايب دمع هماله
تمر أيام بعد أيام من نار الهوى ما فاق=يخاف ليا شكى يجرح شعور حبيبٍ(ن)ناله
جمال الحب يا كل الغلا لقلوبنا سراق=غرقنا في بحره وحلمنا سابح على جاله
تشب النار فينا لا خشينا بالليال فراق=ويشرق ليلنا بوصالنا ويقل ولواله
أحبك كلمةٍ(ن)لكنها دستور للعشاق=وأنا وياك عشناها مشاعر عشق زلزاله