سلام رديه تنعنش مثل هبات النسيم= ليا سرى نسناسها فوق الخميل المزهري
يابن هليل وش طروقك بعد عسيت الحزيم= عسا ه ربع من خيال الصيف والا مدهري

يامرحبا ترحيبة من راس رجال حكيم=امبخرة بالعود لكن عطرها من عنبري
جاته رشوش ما تعقب شيء بالنبت الهشيم=لا تنفع الديرة ولا تسمن حلال من هري

الك البقا ياشيخنا ياصاحب الفكر الفهيم= يااللي على المعنى وطرق القاف رجال(ن) جري
يالله تعوض ديرة الجدان يالرب الكريم= حتى الشجاري تكتسي باوراقها بعد العري

لو أرعدت لو برقت ما جالها لو هي وسيم=الأرض قفرا والمسايل ثورت بس غبري
يابعد ركبة ياسعد على شرورة والقصيم=لو أرعدت سحاب صيف ما تعقب امطري

يوم ارعدت ياصاحبي صوت الرعد يرزم رزيم= قلت السيول برادة الله تفري الوادي فري
هذي بركة(ن) روحت لديار غنام وغنيم= والديره القشرا تلاوفها عوالي وصفري

فراش خير وربنا ياصاحبي دايم رحيم=بكرة يجيك الخير من يم البحور مثوري
يسق الديار اليابسة ويخضر العود القديم=واللي بيوته ما تذري ما يبا يلقى ذري