خالد يا أمير الشعـر يادايـم السيـف=يا فارس الكلمة الى عـرض الطيـف
يا اللي وضعت الشعر في راس تشريف=و رد يت له طعمـه وريحـه ولونـه
ياعاسف الكلمة كمـا عسفـت الخيـل=على الطروق اللي تبيهـا بـلا ميـل
حلحيل بن حلحيل مـن جـد حلحيـل=نسل الحرار اللـي العـدو يرعبونـه
يكفينـا مـن حرفـك محـزم زهابـه=و فـي كـل حـال جاهـزات ركابـه
حرفـك كمـا رجـل شجـاع ثيابـه=متشمـره و دايـم منـفـذ ردونــه
صقر وحبارى وخيل وضبي الصحاري=وطعس وغدير وعشب روض البراري
و القمـرا والنجمـه وليـل الغـداري=و ضو و معاميل و سحاب و مزونـه
ونجد وهواها ونخلها وقصرها الطيـن=وسيف الشجاع اللـي يـذل المعاديـن
و قصة بناهـا دولـة العـز و الديـن=و حكـام صلـوا لواحـدا يرتجونـه
رسمتها للفكـر صـوره مـن القـاف=صوره حقيقيه من ابـلاغ الاوصـاف
اليـا قريناهـا غـدت كنهـا تشـاف=بالعين من هاجـس رسمهـا بكونـه
منـك عرفنـا العيـن تقـدر تكـلـم=و دون الكفوف الرمش يقـدر يسلـم
عـز الله انـا مـنـك دوم انتعـلـم=الحب و سلـوم العـرب مـع فنونـه
من بادي الوقت البشر حطهـا امثـال=و في كل مجلس اصبحت دوم تنقـال
لومـرت عصـور عليهـا للاجـيـال=تبقـى و شاعرهـا بهـا يذكـرونـه
و الحكمة نلقاهـا بزمـان العجايـب=مـن راس شاعرهـا لحـل النشايـب
لروس عنيـده و القلـوب العطايـب=فيهـا جوابـه دون مـا يسئلـونـه
و قصة عنود الصيد وستـل جناحـه=لراعي المقانيص اصبحت له سلاحـه
و فطنة فؤاده فـي مسـاه و صباحـه=يـوم قراهـا قـام يقنـص بهـونـه
وحرفه بغريب الدار يحكي عن السـور=اللي يرد الصوت مـن قلـب مهجـور
يسئل عن احبابه ولا يسمـع الشـور=فيهـم مـن الادنيـن حتـى يجونـه
و طال السفر لو قالهـا كـل مشتـاق=لخل رحل عـود مـن الـود منسـاق
يحمل معاذيـره و يحضنـه باعنـاق=و يقابلـه و ماتصـد عنـه عيونـه
و سمـرت تحكـي خوتـه للقوافـي=اللـي يحملـهـا هـمـوم خـوافـي
و خـوت نجـوم جوهـا دوم دافـي=مـن القوافـي الدافيـه و الحنـونـه
اون من صـدره اسكتـت كـل ونـه=مذهولـه بتسمـع وش اللـي يكنـه
حتـى ونيـن الريـح وقـف يضنـه=يشكي عليه الحـال يبغـى المعونـه
و اللي يعاني و ماعرف سـر آهـات=في داخلـه يسمـع قصيـدة معانـات
ويدري حياته يعيشها كيـف ماجـات=ياخـذ مـن ايامـه و يسـدد ديونـه
صادق ابو بندر تـرى الكايـد احلـى=لا من بغيـت العـز و الـراس يعلـى
لا تنظـر الهيـن ولـو لـك تحـلـى=و ما كل معروض البشـر يشترونـه
و في من يقول الزين رسمه للاشبـاه=الوانهـا حروفـه و بروازهـا شفـاه
نشـوف فيهـا كيـف معبـود سـواه=جمـال عـن زيـن البشـر يفرقونـه
حكمة و احاسيس ومعانـي وتشبيـه=نلقا بحرفـه جعـل مـا يـوم نبكيـه
و هذا الذي خـلا البشـر دوم تطريـه=شعـر لقـو بـه كـل شـي يبونـه
حرفك غدا كنـه غـذا منـه نعتـاش=حرفك لقينـا فيـه مايبـرد الجـاش
حرفك يـدل الفكـر لاصـار منـداش=في حيرته في ضيعتـه فـي ضنونـه
عرضه ولويحاني وصخري ومسحوب=وهجيني بحروفك لقـت كـل مطلـوب
حرفك على طرق الشعر كنـه يـذوب=شهدا مـن شفاهـك يحلـي لحونـه
عز الله انك فـارس القـاف والطـرق=من شعرك اللي بين الاشعار به فـرق
ولونسئل الاشجار عن طايـر الـورق=من وين لحنه تقـول خالـد غصونـه
من مثل ابو بندر لمس كـل احسـاس=بحروف شعره واعجبت كل الاجنـاس
من مثـل قافـه بالقوافـي للانفـاس=اصبح مثل عطـر البشـر ينشقونـه
والله أميـر الشعـر يادايـم السيـف=من حرفك اللي مثمـرا دايـم مريـف
ودي اوصف فيك وياصعـب توصيـف=مثلـك وابـي منـي العـذر تقبلونـه