رزنامة الأيـام مـع مـرّ الأيـام=ترزم وتدفعهـا هبـوب الرياحـي
ترمي سهمها كل ما طيرهـا حـام=وطير السعد منها كسير الجناحـي
يا مرتجين الخير من مطلع العـام=الشر زاد وساد .. والخير ماحـي
لو بثّت الأخبار معها النباء الهـام=يا ليت ما بثّـت وفـاة الرياحـي
أوّ ليتها كانت من حساب الأوهـام=لاشكّ علم الموت ما بـه مزاحـي
دقّات قلبي عنـد تحطيـم الأرقـام=تسطي ويبطي خاطري ما أستراحي
لا والله إلاّ مات فـدّاح الأخصـام=اللي عليه الشعّـر جـرّ المناحـي
علم وفرقه بان عن كـلّ الأعـلام=رفرف .. وصابته المنايا وطاحـي
بيطار عدّ وردّ .. شامخ ومقـدام=جبل محصّن من جميـع النواحـي
حاكم شعر .. مدام للشّعـر حكـام=كم زاح حكمه حاكم ٍ مـا يزاحـي
له سيرة ٍ بيضاء وله سيف صرّام=وإليا جرح يصرف علاج الجراحي
مدات كفّـه بالوفـاء حظهـا قـام=ماهيب مدّات الكفـوف الشحاحـي
من عزوة ٍ تجمع عزيزن وكـرام=أهل المراجل مبعديـن الشباحـي
فـي حبّهـم والله مانيـب منـلام=والحبّ ما بيـن القبايـل مباحـي
أعزّي الأصحاب من قلب منضـام=يا كبر همّك يا القلوب الصحاحـي
وأعزي الشعّار من كـلّ الاقـوام=في فقد طير ٍ من طيور الفلاحـي
عساه بالفردوس في ظل الإسـلام=من رحمة الله لا بس ٍ له وشاحي
يآرد على حوض النبي خير الأنام=مثواه في الجنّه .. وشربه قراحي

خيم الحزن في صدري ونـوخ ركابـه=وابتدا ليل هم ونـوم عينـي هجرتـه
ما بقى للقصايد وسط صدري رحابـه=غير هم لي اجتاح الخفاء ما شكرتـه
كل مخلوق فا الدنيـا مقـدر حسابـه=لو يقولون توه ما خلص مـن ثمرتـه
والسبايـب تفـاوت والمنايـا تشابـه=واجل الانسان تكتب ساعته من صغرته
اه يا اخويه اللي مـا تعـوض غيابـه=اشهد اني فقدته واشهد انـي خسرتـه
كيف ابنساه وادله واتنسـى مصابـه=وكل طاروق لا جيت ابتدي به ذكرتـه
يا بدر كل كسر يهون واجبر صوابـه=غير كسر يبي يبطي وانا مـا جبرتـه
رحمة الله على اللي له مقام ومهابـه=منبر الطيب يوم الطيب تثمر شجرتـه
من فراقه غديت اقنب قنيـب الذيابـه=وبح صوتي ودمعي من عيوني نثرتـه
ودي اسلى عن الهاجوس واصك بابـه=مار همي وحزني ساقني مـا قدرتـه

أكبر حزن خيَّم بعام الثلاثين!=الظلم في غَزّه, وموت الرياحي
يارب يامعبود تنصر فلسطين=وترحم فقيد المرجله والكفاحي
صباح يوم السبت.. ذقت الاَمرّيَن=وش هالخبر؟..وش هالحزن ياصباحي؟
مرحوم يامذكور فيْ العسر واللين=ذِكرِه بطيب,وعزّ,وامجاد..فاحي
ابو بدر غالي ومن قوم غالين=اِظهور السواني, موُرِدين السلاحي
جيره,وصحبه سايره في الشرايين=وانساب واِعنوّه..ووَصلٍ مُباحي
وفيصل صديق..وله بقلبي عناوين=ماغيّرت فيها هبوب الرياحي
يابو بدر واللْه ماحنّا براضين=لكن حمام الموت بالغصب ناحي
يامال جنَّة خِلد بين الكريمين=اهْل السعد,والديِن,والاِنشراحي
ويحسن عزا ربعك كعام المعادين=واهَلْك,واِعيالك..وماراح! راحي
واِختامها.. ننعاك والدمع فيْ العين=ونلقاك يافيصل فيْ بدر الرياحي