يالله يامنزل تبارك وياسين = ‍ أمرك مقدر والمقدر هلابه
اعوذ بإسمك من عيون الشياطين = ‍ ومن لاذ بالله حصنه وإتقابه
يالله يافارض صلاة المصلين= ‍ تجعل لربعي دعوة مستجابة
ربعي عتيبه مكرمين المجلين = ‍وشيوخهم رمز الوفا والمهابة
يامن خلقت أدم بعلمك من الطين = ‍علماً تبناه القدر واغتنابه
وفق لمن يسهر على نصرة الدين = ‍مافيه درباً للهدى إلا مشابه
شيخاً على صدقه شهود وبراهين =‍ حقق لشعبه ما أعلنه في خطابه
فخر الملوك مرجحين الموازين = ‍ اللي على نهج النبي والصحابة
عبدالعزيز بيوم واحد وخمسين ‍= وحد وطنا والجميع ارتضابه
واليوم عبدالله على الراس والعين ‍= مافيه مرقى للعلا إلا رقابه
على أيمنه سلطان أمير البليغين ‍= رايه ليا أوحاه اللبيب اكتفابه
عضود أبو متعب ملوك وسلاطين =‍ يشهد له التاريخ رسم وكتابه
تشهد جاكرتا وانقره والفلبين = ‍ واحداث سيرلانكا وغزه وطابه
وما بالعراق وما حصل في فلسطين = ‍ وما قدم للبنان يلقى ثوابه
واعطا شعوب أفريقيا كل شي زين = ‍ وأصلح شعوباً فرقتها العصابة
والمغرب عن الطيب ماهم بعيدين ‍= ياما تكفل به وياما احتفابه
واعطا لأروباء كل دعماً وتمكين ‍= مما عطا البسنه شموخ ونجابه
شايل هموم الناس موتى وحيين = ‍ وما من مصاب إلا يخفف مصابه
وقال لشعوب أقصا آسيا لاتخافين= ‍ مافيه داعي للحزن والكأبة
جاوه وباكستان والهند والصين =‍ واحداث سونامي وقسوة عذابه
ودول الخليج الست قلباً وعينين= ‍ في جسم واحد مايلوث جنابه
في الواجبات وفي الحقوق متساوين ‍= سيفاً تجلت سلته مع نصابه
عشنا سوا معهم على العسر واللين = ‍ النهج واحد والعوايد تشابه
وقال اليمن وأهله علينا عزيزين = ‍ نشوفهم بقلوبنا أهل وقرابه
لبلادنا تهوى نفوس المحبين = ‍ولها القلوب اتذوب شوف وصبابه
واجب علينا نصرة المستغيثين ‍= والمسلم اللي مايخيب الرجا به
هذي مزايا ملحقين المخلين ‍= إليا أختلط عج الرمك والضبابه
شعباً عليه من الشجاعة نياشين ‍= في ظل أبو متعب ذار من لجابه
وقبيلة عتيبة على العهد ماضين = ‍ أكبر قبيلة حجم وأصدق صلابه
منزالها بين الجدي والهلالين =‍ في موقعاً تحمى جباله شعابه
مابين حرب وعزوة مطير ويمين = ‍ وبين السراة وبين شرقي غرابه
وبين الدواسر والبقوم والقحاطين= ‍ وسبيع والحرث وكلاً بدابه
على الوفا والاحترام متصافين= ‍ وكلاً عرف درب الهدى واهتدابه
هذي قبايل نجد والكل دارين = من غيرها اللي شرب ماه ورعابه
تعلن ولاها للملوك الميامين = ‍ أشبال ابو تركي وزهرة شبابه
قادة وطنا في القدايم وهالحين= ‍ والكل منهم نستظل بثيابه
مع دولتاً في ظلها مستقلين= ‍ ‍ تحكم بشرع الله وتطبق كتابه
عند العناد ترجع الصاع صاعين =‍ وعند الرضا ألطف من نسيم السحابه
بأشرف علم تزهاه نخلة وسيفين= ‍ ولفظ الجلالة شرفة واعتلابه
هذي بلاد الحرمين الشريفين = ‍ وهذا ملكها وأمته وإنتسابه
أرضاً جعلها الله مروج وبساتين= ‍ تشرب من ماه الي قراحاً شرابه
شعباً لميلات الدهر مستعدين = ‍وكلاً لما يعناه يحسب حسابه
ماني بالنعرات رافع عناوين =‍ ولا أقمت لجل العنصرية خطابه
حنا سعوديين دايم عزيزين = ‍ لا عنصريه لا جهل لا حرابه
شعباً بتوفق من الله غنيين = ‍علم وتطور غيرنا ما اهتنابه
عشنا بأمان مواطنين ومقيمين = ‍ بأنحاء وطنا اللي نقدس ترابه
وبمناسبة ماللمزايين من دين =‍ عند القبايل حان وقت الوفا به
صاحت عتيبه وينكم يالشجيعين ‍= ياصور صرحاً ماتزعزع عتابه
برقا وروق أبناء ثبيت الأصيلين ‍= ومن ثبت أصله شرفه واعتزابه
الجد ثابت بن سعد ثالث اثنين =‍ نشت هوازن من ثنايا عضابه
ياعزوتي لو وقعتي بدر وحنين ‍= عادت لعينيها رميت العصابة
وسارت لجان الملتقى قبل شهرين ‍= وكلاً حسم رايه وجهز ركابه
للملتقى اللي في انتظاره من سنين =‍ اليوم التاريخ باع وشرابه
اربعمية والف وثمانية وعشرين =‍ عشرين من شوال تم اللقابه
لقاء الشعار اللي لرؤياه شفقين = ‍ كلاً سمع ذكره وكلاً درابه
رفرف على الصحراء وأنار الميادين =‍ نوراً يعود الفضل للي بدابه
مشعل ولد عبدالعزيز أحمر العين =‍ ياحظ من عند اللزوم التقابه
عاد الحياة المشرقة للمزايين= عبر الخليج ونجد واللي نشابه
وتطلقت في البر مثل الشياهين =‍ تشتاق للحادي وصوت الربابه
هذي طرات الروح ياعاشق الزين = ‍ زيناً على العشاق طول غيابه
وإن كان للأبل الأصايل موامين = حنا لها أوسع صدر وأكثر رحابه
نعطي الجوائز ونصرف لها الملايين = ‍ نوصي بصحتها وحسن الرقابه
والكل منا يعطي الطاق طاقين ‍= لو تطلب الي من ورا الصين جابه
يانجد كررت القوافي لبيتين= ‍ تأكيد والتأكيد مابه غرابه
قصيدتي يانجد ون وثمانين ‍= بيتاً تراقبها عيون الذيابه
وحنا على اوزان الشعر مستقلين =‍ ناخذ سنى شمسه ونترك سرابه
بإسم الشيوخ المخلصين النزيهين= ‍ قادة عتيبه للشرف والحزابه
وإن كان ماسميتهم هم مسمين =‍ تشهد لهم واحات نجد وهضابه
يامرحبا بضيوفنا المحترمين ‍= اقولها عن عزوتي بالنيابة
ترحيب بالأقصين منهم والأدنين =‍ اللي حضر واللي يجي مرحبابه
نفرش لهم درب المحبه رياحين = ‍ ودرباً يضايقهم علينا اجتنابه
قبيلتي تشكر جهود الوفيين ‍= وتشكر من أثرا الملتقى واعتنابه
وتشكر مناديب الصحف والمذيعين = ‍ وعلم الفضائيات والي سمابه
ومشعل عطا لأهل المزايين تأمين= ‍في كل عام تموت به وتحيابه
تموت لو عاد الجهل بيننا بين ‍= وتحيا إن زرعنا الحب في كل غابه
حب الوطن مع دمنا بالشرايين ‍= نعتز فيه وعزته من شبابه
هل تسمحون بجملتاً بين قوسين= ‍ تمسح خطأ الشاعر وتثبت صوابه
يقول أبو متعب على الشعب ثنتين = ‍ دين ووطن مامن وراها طلابه
عاش الوطن عاش الملك قولوا أمين= شاعر بدأ بإسم الوطن وانتهابه
وأختم بذكر اللي لوجه ملبين =‍ لاخاب طلابه ولا صك بابه