لقيت لي قافٍ(ن)مكمل مثمن=قالوه قبلي في قديم الليالي
فكري على شأنه من الشعر دندن=ذكرت من قاله وصار لزوالي
ذكرتهم والقلب في داخلي حن=ذكرت هاذيك السنين الخوالي
مطلق وعايض شعرهم كان متقن=مثل الذهب مصدره صم الجبالي
عايض بدعه ورد مطلق ممكن=واقفوا وخلوا قافهم للتوالي
تحت الثرا كل واحدٍ(ن)ءله مسكن=تفرقوا بعد الوصل والوصالي
حكمٍِِ(ن)على كل الخلائق مقنن=سنه عليهم متصف بالكمالي
الكل تحت الأرض لابد يدفن=محد(ن)مخلد والبقا ذا محالي
أحد(ن)يموت بماش وأحد(ن)من الطعن=ليا حان وقته ما يفيد إنتشالي
حق(ن)على الكافر وحق(ن)لمؤمن=طريق ماشي للنسا والرجالي
كل حي فيه الروح بالأنس والجن=هالك ولو طالت عليه المهالي
واللي بها موجود لو ظن ماظن=لابد يوم يصير منزله خالي
واللي بعده يقول:مرحوم ياهن=لا جات له سيرة وجا له مجالي
دنيا غرورة مالها للبشر أمن=كم فرقت مابين غالي وغالي
فيها نتقلب كننا حمسة البن=في كف حماس بجنب الدلالي
ما تنشدك يا من أنته ولد من؟=لابد تشرب مر من بعد حالي
ما فيه قلب الا من أوجاعها ون=ولافيه فرق بين داني وعالي
حتى ولو إنه خفا حاول يكن=ما فيه عين(ن)دمعها ما يسالي
لو أمهلت بالعمر ما يمهل الوهن=من بعد قوة ضعف يا هم لاالي
نعيمها مايدوم لو كان يفتن=كذا هو من بعد حل إرتحالي
ملعونة واللي بها حق يلعن=كم حي فيها صار بالأرض بالي
يا قاري الأبيات واضح غرضهن=الحال من بعضه لحالك وحالي
وأختم هجوسي بعد بالفكر هدن=بذكر الاله المتصف بالجلالي

المشاركة الأصلية كتبت بواسطة الـسـيـف (المشاركة 55962) صح لسانك .. كما عودتنا بإبداعك ونثر كلماتك الجميلة الله يعطيك العافية .. تقبل مروري المتواضع

المشاركة الأصلية كتبت بواسطة سكون الليل (المشاركة 55970) يسلموا علي هده الايادي كل الابيات كلها جميله