ياورد يا ريحان يافل ياموز=ايامنا ما عاد يعجب زمنها
ما عاد تعجبني تعابير ورموز=طلاسم الايام مليت منها
لو كان حبك داخل القلب مغروز=لكن ظروف الوقت حظي وطنها
كل ما بغيت أجيك حطت لي حجوز=ليتك تسأل القلب والروح عنها
أحس قلبي داخل الجوف محزوز=محبتك بالقلب دافع ثمنها
ثمن غرامك شوق وأشجان ودزوز=في نفس غيرك يا غلا ما سكنها
أنت الوحيد اللي به أحلامي تفوز=لو كان روحي شاكية من شجنها
وأنت الوحيد اللي مغازلك بيجوز=لو كان غيرك من قصيدي فتنها
تهوى قصيدي بس أنا الك محجوز=يا ملهم بيوت القصيد ولحنها
هواك عشش بالحشا عمر مكنوز=خلف الضلوع اللي غرامك قطنها
محال تلقى داخل افكاري هموز=إلا طيوفك هاجسي مرتهنها
لكن علام الحظ يعكز بعكوز=حلو الأماني تحت باطه دفنها
مرت سنين وحظنا لاوي البوز=كل ما تزين أحلامنا يمتهنها
كنه دفاع الجو وسلاحه كروز=دمر لأمانينا وصافي لبنها
ياورد يا ريحان يافل ياموز=ايامنا ما عاد يعجب زمنها