يا شموع السهر ليل السمر ما طاب=كل ما أشعلت شمعه تنطفي شمعه
السمر ما يطيب إلا مع الأحباب=حول نور الشموع تكون مجتمعه
ضوء شمع الهوى لقلوبنا جذاب=وإن طفته الرياح يصيبنا صرعه
جئت بسهر معك وأريح الأعصاب=مير زاد الوجع بمسامرك وجعه
بعد حطيت من دونك دريشة باب=ما بقي غير أعود وأسرع الرجعه
طابت النفس من ليل الهوى الكذاب=دام مالك ولا لي بالسهر نفعه
عزة النفس خير من الشقا الغصاب=كان مالي مكانة خربت الطمعه
السهر بالمجامل يتعب الطلاب=والفقر في معزة خير من شبعه
الكرامة كريمة ما تبي لأسباب=والحذر خير من غفلة بها وقعه
مير يا ليل برحل وأبدي المرقاب=الخلا صاحب اللي ما لقي صنعه
ماني اللي يخاف من الخلا وذياب=ولاني اللي تهده بالزمن جزعه
من تربا على ظهر الخطر ما هاب=يسري الليل ما خرت له الدمعه
دام الأحلام راحت بين ضرس وناب=ما عليًه من الكبوات والرمعه
يا شموع السهر ليل السمر ما طاب=كل ما أشعلت شمعه تنطفي شمعه