العام يوم السحايب والمطر انهمر=كانت تصور وقايعها بجـوالها
كانت تصور نواحيها وترسل صور=وأفرح ليا رن جوالي بمرسالها
وتقول جاكم مطر وأقول جانا مطر=وتقول صور لي المزنة وهمالها
صورت برق السحاب اللي سمك من عصر=وأرسلت صورته للي طيبٍ(ن)فالها
الجادل اللي تربت بين بر وبحر=ترجي وصالي وأنا طمعان بوصالها
ماكنها غير لمع البرق وإلا قمر=ما مثلها بالعذارى حظ من نالها
لعبت بعقلي وقلبي حبها يا بشر=من حب نفسي لها شربت فنجالها
هاثم قالت:بغيب غياب يمكن شهر=صعبة ظروفي وأنا صدقت لأقوالها
قلت:أنتظر للمجي وإلا بلاش أنتظر=قالت:بجي كود نفسي حانت أجالها
ما كنت أظن الغياب يطول كنه دهر=أبطت عليًه وروحي همها طالها
مرت سنة من بعدها ما وصلني خبر=يا من يبشر لشاعرها عن أحوالها
جوالها منفصل مدري عليًه حظر=ترضي به أعمامها وتفرح أخوالها
وإن كان ماهو كذيا ياصنوف القهر=الله يحييك نفسي همها جالها
إلى متى بتصبر مر طعم الصبر=النفس من زود همي صار يرثالها
الصبر مرٍ(ن)مذاقه والمغيبه أمر=يا عز روحي من الأحلام وأعمالها
الضيق واصل مداه مضايقٍ(ن)للصدر=ما عادت النفس تطعم لذة أمالها
ما صرت أميز بوقتي بين فرح وكدر=كل المشاعر بقلبي زاد ولوالها
ياليتها بس ترسل للمغيبة عذر=لو كان ماهو صحيح الروح يحلا لها
اليوم يوم السحايب والمطر انهمر=ما كل جوال صور مثل جوالها