يا خوي السنين الماضية كيف حالك؟=ما نسيتك بحل ولا نسيتك سفر
بذمتي ما نسيتك يا غلا طاب فالك=أذكرك بالسعودية وداخل مصـر
أنت دايم ببالي مثل ماني ببالك=يا خدين المشاعر دون كل البشر
أنت بالقلب وحدك يا غرامي لحالك=ما ينافسك فيني غير نبض وشعر
مسكنك بالخفوق المنفتن في جمالك=أنت ضحكة بعيني وأنت فيها نظر
أنت قطعة من التفكير كلي حلالك=ذا خبر كان ما عندك بحالي خبر
ماني اللي يدور بالمحبة بدالك=الجفا والتباعد ما ببالي خطر
كل يوم أتمنى يا غلاي إتصالك=من بداية لقانا لين تال العمر
سوق يمي دلالك يا فديت لدلالك=أنت فوقي حبيب الروح تأمر أمر
حلم عمري وصالك لا عدمت لوصالك=لا يطول إنتظاري بعد قل الصبر
الحق لقلبي اللي من محبتك هالك=والعمر كان روح ماش غيره عمر
ما يريح فؤادي غير ذاتك يا مالك=كل فكرة براس وكل نبضة صدر
لا سمعتك يصير الدم بالقلب سالك=وإن توخرت عني صاب حالي كدر
قلبي اللي حكمته عايشٍ(ن)في مجالك=وإن تماديت بغيابك تراه انتحر
حث خطوة مجيك لا توانى رحالك=لا تدور عذر ماني بقابل عذر
ذا جوابٍ(ن)كتبته حين جاني سؤالك=كل يومٍ(ن)تغيبه صار يعدل شهر
يا خوي السنين الماضية طاب حالك؟=ما نسيتك بحل ولا نسيتك سفر