فرصة عمر مرت كما حلم مسرور=ما عشت عنها يا مخاليق ما أسهى
جاني رفيق الحلم زاهي بلا غرور=مشاعري والشعر بالزين تزهـى
يا مرحبا ياللي كما شرقة النور=وألذ من شهد المناحيل وأشهى
يا ريحة الياسمين والورد مأجور=يا نسمة النسناس في سودة أبها
قالت:أميري قلت:بالحب مأمور=حبك ملك للقلب يأمر وينهى
حياك ربي إسكني قلب وشعور=قلبي وطنك وعنك ما عاد يلهى
كافي زمانٍ(ن)فات وسنين وشهور=راحت سدى ليتك حبيبي تسلها
يا ما تمنيتك تجيني على الفور=تبري جروح الروح يا أخر أملها
لكن حدتك ظروف يا مشبه الحور=والشوق فيني يا بعد عمري أدهى
أحلم بشوفك منتظر فرصة حضور=تحضن بقايا الروح والشرب يرهى
تمطر وتروي قلب بالوجد مفطور=من غيثك الساري ليا الصبح ما أجهى
يا بسمة الأيام للوصل مشكور=أعمارنا وأحلامنا حسب أجلها
فرصة عمر مرت كما حلم مسرور=ما عشت عنها يا مخاليق ما أسهى