يا هلا يا مرحبا يا شبيهٍ(ن)بالظبي =يا هني عيني بشوفتك يا ريم الفلا
ارحبي يا نبض الاشواق ياريم ارحبي=كل ما فيني يهلي هلا بك يا هلا
اقلطي على خفوقي تغلي وإطلبي=أمري واللي تبينه يجيك مكمـلا
امسحي اللي تبينه بقلبي واكتبي=كل ما فينك من احساس واشواق وحلا
واكتبيي فيني غرامك بلحمي وعصبي=يابعد كل الأحبه ويا كل الغلا
قربي مني يا روح المحبة قربي=عالجي قلبي من الحب قلبي مبتلا
حطي كفوفك علي الصدر حسي وش يبي=والوجع اكويه من جمر شفه مشعلا
ثم صبي فوق جرحي عسيل مذوبي=من مناحل خلف حمر الشفاه تجملا
وإسكبي زيت الوناسة على نار حطبي=ثم قول قوم دف الضلوع النحلا
منك يا كل الأماني علاجي وسببي=وإن بذلتي للدوا كل همي ينجلا
هكذا جيتك من أقصاي يابعد عربي=مستجير بجنتك يا بعد كل الملا
مدي كفوفك خذيني وعزك بشنبي=ياعبير الشوق قلبي بحبك إمتلا
أنتي اللي راس مالي وأشوفك مكسبي=العمر من دون شوفك مثل نازل خلا
السنين تمر من عمر ذاتي تنهبي=والخفوق اللي تولع بحبك ما سلا
يا هلا يا مرحبا يا شبيهٍ(ن)بالظبي=يا هني عيني بشوفتك يا ريم الفلا