بدايتي واياك مهما وصفتها=مثل النهاية معك لن كان وصفت
كبرت عن أشياء كثيرة وعفتها=إلا غرامك زاد فيني ولا عفت
ياما كثير من الخراعيب شفتها=لكن كماك وعزة الله ما شـفت
ما حركن حسي وطافن وطفتها=عندك وقفت مسمرٍ(ن)فيك ماطفت
مشاعري والروح لأجلك وقفتها=جابتني الأقدار عندك و وقفت
ما عاد لي شفٍ(ن)بغيرك صرفتها=من زود حبك ياغرامي تصرفت
كل العذارى من حسابي حذفتها=إلا أنت باقي لين بتقول خرفت
كل العروق بورد حبك رصفتها=أطرب ليا منك مع النود هفهفت
أسهر مع أطيافك تلوفي ولفتها=أسعد بلوفتها وتسعد ليا لفت
مهما ظروف الوقت تقسى ماخفتها=خوفي عليك وبس لن قلت لك خفت
هذي حياتي معك لأجلك عسفتها=عشق وغرام وشوق ياذوق عسفت
لأجلك ومن شأنك حياتي عرفتها=وهبتها لرضاك بعد تعرفت
أيام عمري بإتجاهك حرفتها=واللي بقي من عمر بالشوق لحفت
نهايتي واياك مهما وصفتها=مثل البداية معك لن كان وصفت