خفي ونينك واسكني يا حمامه=ياللي على فرقا وليفك تونيـن
هيجتي بقلبي هواه وغرامه=ونيت مع ونتك وأدمعتي العيـن
مسحت للدمعة بحيد العمامه=خايف يلاحظها من الناس عذلين
ناسٍ(ن)تدور للحكي والملامه=أفعالهم تغلب فعول الشياطين
تغلب عليهم بالطبوع الرخامه=نقالة المقيول ما بيني وبين
اللي يوده خافقي بو لثامه=غاياتهم تفريق ما بين قلبين
ما كسبوا إلا شينهم والندامه=يا علهم من شين في شين في شين
من بادي الدنيا ليوم القيامه=ما يلتقون الخير بالعسر واللين
لكن حمامة فوق راس العدامه=لا تتعبين القلب وأنتي تنوحين
الله يجيب أحبابنا بالسلامة=وبعد الونين أسمعك وأنتي تغنين
على غصين البيشمة والبشامه=فرحانةٍ(ن)مع ولفك اللي تحبين
ترقص لك من البهجة طيور اليمامه=وأنا بصدري قلب يرقص من البين
على وليفٍ(ن)حال دونه عسامه=ما شفت زوله عاد له عدة سنين
عيني عليها من فراقه غمامه=والقلب ينزف والقصائد براهين
ما باقي إلا عزتي والكرامه=هي راس مالي في جميع الميادين
عزيز نفس ومن رجال الشهامه=دامي على وجه الثرا تحتي الطين
خفي ونينك واسكني يا حمامه=ياللي على فرقا وليفك تونين