يا خي خل العتب مافيه داعي عتب=ما يعتب الا حبيب ليا فقد له حبيب
المملكة دارنا غصبٍ(ن)على أطلق شنب=من عهد الأجداد ماهي بالزمان القريب
من بحر جدة ليا ساحل خليج العرب=داري وربعي ولاني بالمنازل غريب
مهد الحضارات فيها والكرم والنسب=والدين منبعه منها والنبي المهيب
لا من بغيت المصايف ما خشيت النهب=أزورها ما عليه يا معاتب رقيـب
القى بها جو ممتع بالمكان العجب=رهيب يا جو داري بالمصايف رهيب
المملكة غير ياللي تدرسون الكتب=شوفوا بها معجزات المملكة ياعجيب
فيها الرخاء والأمن والدين عز الطلب=نعمة من الله عظيمة بالزمان المريب
فيها فواكه كثيرة والعسل والعنب=الطيب فيها قلوب الناس مثل الحليب
لا من طرأ لي أسير ما حداني كرب=أطرف مكانٍ(ن)ليا من زان جوه يطيب
أنزل بها وأتمشى لو مابه سبب=الرأس مرفوع لا طالب ولاني طليب
أمشي على الهون فيها وإن مشيت الخبب=ماهو عليًه كليف ولا نعده معيب
أنا وطن في وطن صدوق معرف كذب=لكن دون الوطن حريب وأشرس حريب
أجاوب الذئب لا منه بصوته قنب=بمسالباتٍ(ن)يسابق صوتها للقنيب
ماهمني لو يسيل الدم لين الركب=دون الوطن كلنا حماه شبٍ(ن)وشيب
أرسى من طويق وأعنف من لهيب الشهب=اللي نريده نطوله بالرضا والغصيب
ما عمر راسٍ(ن)يعود في مكان الذنب=الرأس مرفوع عالي ما يطوله ذنيب
حنا ليا قيل حنا متلفين العصب=سم المعادي نحصده بالنهار العصيب
ياكم دارت رحانا فوق روس وقبب=محظوظ منهو نجا لو كان حتى صويب
النار ما تالع الا في هشيم الحطب=والشمس ما تغرب إلا باتجاه المغيب
يا خي خل العتب مافيه داعي عتب=ما يعتب الا حبيب ليا فقد له حبيب