يا ملهمة فكري بحلو القصايد=أنتي جنوني بالهوى يا غلايه
نامي بقلبي والمشاعر وسايد=توحين دقاته تعرفي بلايـه
لولا غرامك ما عشقت الطرايد=الشاردات من القصايد هوايه
عاني قصيدي فوق جيدك قلايد=ياللي غرامك في حياتي حكايه
حكايتي واياك قرب وبعايد=لو تنشر بتفوز باحلى روايه
فريدةٍ(ن)وأنتي فريدة فرايد=يا سقم قلبي بالغرام ودوايه
هواك فيني طول الايام سايد=تحكم بروحي من أول بدايه
أهواك في وقت الرخا والشدايد=معي رفيقة عمر حتى النهايه
كل يوم حبك بالمعاليق زايد=يشعل وجودي والقصايد مرايه
تخبرك عن حالي وكثر الوجايد=اللي تغشاني صباح ومسايه
لا نامت عيونٍ(ن)تحب الرقايد=سريت مع طيفك بليا هدايه
الشوق فيني مشعلٍ(ن)له وقايد=وأحلام ليلي سارياتٍ(ن)معايه
أدورك واللهف بالجوف كايد=يا غايتي مالي سوى الوصل غايه
دنياي من دونك هموم ونكايد=حبك منعني عن دروب الغوايه
حصنتي إحساسي بزين العوايد=بالمختصر من غير زيف ودعايه
لولاك عشقي كان ذا الحين بايد=لكن لقيت بكل ذاتك هنايه
يا ملهمة فكري بحلو القصايد=أنتي جنوني بالهوى يا غلايه