ياليل الشقا ياليل ياليل يا ليـل=علامـك تجد كل ليلة حسـوفي
حسوفي على راع الرموش المظاليل=عليه الخفوق يحن لهفه وخوفي
ليا من ذكرت اللي مضى من تعاليل=تلعثم لساني ما نطقت الحروفي
زمان الهنا ولى ويا ويل يا ويل=يا ويلي من أشواقٍ(ن)تصارع بجوفي
أبي صاحبي مشتاق له يا هلي حيل=غرامه ذبحني وتحداني ظروفي
غرامه مسوي في خفوقي غرابيل=سقمني وأنا عيني لسقمي تشوفي
تمنيت حظي بالليال المقابيل=يجيبه لكن الحظ عيـا يروفي
أخذ صاحبي والحظ ذيب الرياجيل=على سكته طول بوقتي وقوفي
عيوني تراقب كنها من درابيل=وأنا حيلتي يالليل صفق الكفوفي
أغني لحون الشعر وأبدع مواويل=وأسامر بليلي ساريات الطيوفي
توخر صحيبي ما بعث لي مراسيل=وأنا ما خبرته بالمودة عيوفي
أخبره حنون ما يحب البهاذيل=ليا من وعد ما يخلف الوعد يوفي
يا حظ العنا وشبدل الحال بلحيل=من الوقت وإلا حوف ولفي وحوفي
ياليل الشقا ياليل ياليل يا ليل=علامك تجد كل ليلة حسـوفي